ޓިއުރިން (ސެޕްޓެމްބަރު 12) - އިޓާލިއަން ލީގުގައި ރޭ ޔުވެންޓަސް އާއި ސެލަނިޓާނާއާ ބައްދަލުކުރި މެޗު 2-2 އިން އެއްވަރުވިއިރު، މި މެޗުން ބަލިނުވެ ޗެމްޕިއަންސް ލީގުގައި ބުދަ ދުވަހު ކުޅޭ މެޗަށް ކުރިމަތިލުމަކީ ހިތްހަމަޖެހުމެއް ކަމަށް ޔުވެންޓަސްގެ ކޯޗު މަސިމޯ އަލެގްރީ ބުނެފި އެވެ.
ޔުވެންޓަސްގެ ދަނޑުގައި ރޭ ކުޅުނު މެޗުގެ ފުރަތަމަ ހާފުގައި އެންޓޯނިއޯ ކަންޑްރޭވާ އާއި ކްރިސްޓޯފް ޕިއަޓެކް ޖެހި ލަނޑުތަކާ އެކު، ސެލަނިޓާނާ އިން ވަނީ ދެ ލަނޑުގެ ލީޑެއް ނަގައިފަ އެވެ.
އެކަމަކު، މެޗުގެ 51 ވަނަ މިނިޓުގައި ޔުވެންޓަސްގެ ބްރެޒިލް ޑިފެންޑަރު ގްލެއިސަން ބްރެމާ ޖެހި ލަނޑާއި، މެޗުގެ އިތުރު ވަގުތުގައި ލިއަނާޑޯ ބޮނުއްޗީ ޖެހި ލަނޑާއެކު ޔުވެންޓަސް އިން ވަނީ މެޗުގެ ނަތީޖާ އެއްވަރުކޮށްފަ އެވެ.
މިއީ އަނިޔާގެ ގިނަ މައްސަލަތަކާ ކުރިމަތިލާފައިވާ ޔުވެންޓަސް މި ސީޒަންގައި އެއްވަރުވި ހަތަރު ވަނަ މެޗެވެ. ޔުވެންޓަސް ތާވަލްގެ 8 ވަނައިގައި އޮތީ 10 ޕޮއިންޓާ އެކު އެވެ.
މެޗަށް ފަހު ޔުވެންޓަސްގެ ކޯޗު އަލެގްރީގެ ބުނީ ޗެމްޕިއަންސް ލީގުގައި ބުރާސްފަތި ދުވަހުގެ ރޭ ބެންފީކާއާ ދެކޮޅަށް ކުޅޭ މެޗަށް ނުކުންނައިރު، މި މެޗުން ބަލިނުވުމަކީ ކުޅުންތެރިންނަށް ލިބޭނެ ހިތްހަމަޖެހުމެއް ކަމަށެވެ.
"މެޗުން މޮޅުވި ނަމަ ތާވަލްގައި ތަންކޮޅެއް ކުރިއަށް ޖެހިލެވުނީސް. އެކަމަކު މެޗުން ބަލިނުވުމަކީ ޗެމްޕިއަންސް ލީގު މެޗަށްދާއިރު ކުޅުންތެރިންގެ މޫޑް ތަންކޮޅެއް ރަނގަޅުވާނެ ކަމެއް،" އަލެގްރީ ބުންޏެވެ.
ސެލަނިޓާނާގެ ކުޅުންތެރިއަކު ކައިރިން ޔުވެންޓަސްގެ މިލިކް ބޯޅަ ހިފައިގެންދަނީ.--- ފޮޓޯ: އޭއެފްޕީ
މި މެޗުގެ އިތުރު ވަގުތުގައި ޔުވެންޓަސްގެ ޕޮލެންޑް ފޯވަޑް އަރްކަޑިއުޒް މިލިކް ތިން ވަނަ ލަނޑެއް ކާމިޔާބުކުރި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު މެޗުގެ ރެފްރީ ވަނީ އެ ލަނޑު އޮފްސައިޑް ކަމަށް ނިންމައިފަ އެވެ. އޮފްސައިޑް ކަމަށް ނިންމީ މިލިޗް ޖެހި ބޯޅަ ގޯލަށް ވަތްއިރު، އޮފްސައިޑް މަގާމެއްގައި ހުރި ބޮނުއްޗީ ކުޅުމުގެ ތެރެއަށް ވަދެހުރި ކަމަށް ބަލައިފަ އެވެ.
ގޯލު ޖެހުމަށް ފަހު މިލިޗް ޖޯޒީ ބޭލުމުން އޭނާ އަށް ދެ ވަނަ ރީނދޫ ކާޑާ އެކު ރަތްކާޑު ދެއްކިއިރު، އޭނާ ޖެހި ލަނޑާ އެކު ދެ ޓީމުގެ ކުޅުންތެރިންނާއި އޮފިޝަލުން ވަނީ ހިތްހަމަނުޖެހުންތައް ފާޅުކޮށްފަ އެވެ. އަދި ރެފްރީ ވަނީ އިތުރު ތިން ރަތް ކާޑު ދައްކައިފަ އެވެ. އެއީ ޔުވެންޓަސްގެ ކޯޗު އަލެގްރީ އާއި އެ ޓީމުގެ ހުއާން ކުއަޑްރާޑޯ އަދި ސެލަނިޓާނާގެ ޑިފެންޑަރު ފެޑްރީކޯ ފާޒިއޯ އަށެވެ.
އަލެގްރީ ބުނީ ވީއޭއާރް ބަލާފައި ރެފްރީ އެ ލަނޑު އޮފްސައިޑް ކަމަށް ނިންމިޔަސް، އެ ނިންމުމާ މެދު ސުވާލު އުފެދޭ ކަމަށެވެ.
"އަހަރެން ދުވަހަކު ވެސް މެޗަށް ފަހު ރެފްރީންނާ ވާހަކައެއް ނުދައްކަން. އެކަމަކު މި މެޗުގައި ލަނޑެއް ގޯސްކަމަށް ރެފްރީ އޮތީ ނިންމައިފަ. އެއީ ފެންނަން އޮތް ކަމެއް،" އަލެގްރީ ބުންޏެވެ. "ލަނޑު ޖެހިއިރު (ސެލަނިޓާނާގެ) ކަންޑްރޭވާ ހުރީ ކޯނަރު ދަނޑި ކައިރީގައި. އެހެންވީމަ، ފަހަރެއްގައި އޭނާ އެތާހުރުމުން އެއްވެސް ކުޅުންތެރިއަކު އޮފްސައިޑް ނުވެދާނެ. އެކަމަކު، އެކަން ފެންނަ ވީޑިއޯއެއް އަދި އަހަރެން ނުދެކެން."
