އިންޑިއާ ފުޓްބޯޅަ ފެޑެރޭޝަނު (އޭއައިއެފްއެފް)ގެ އާ ރައީސް ކަލްޔާން ޗޯބޭ ދާދި ފަހުން ފީފާގެ ރައީސް ޖިއާނީ އިންފަންޓީނޯއާ އެކު ބޭއްވި ބައްދަލުވުމުގައި އިންޑިއާގެ ގްރާސްރޫޓް ލެވަލްގައި ފުޓްބޯޅައިގެ ކަންކަން ރަނގަޅު ކުރުމުގެ ގޮތުން ސްކޫލް ސިލަބަސް ތެރޭގައި ފުޓްބޯޅަ އުނގަނައިދިނުމުގެ މަސައްކަތް ފެއްޓުމުގެ މަޝްވަރާތައް ކުރިއަށްގެންގޮސްފި އެވެ.
އިންޑިއާގެ ފުޓްބޯޅަ ލެޖެންޑް، ބައިޗުން ބުޓިއާގެ މައްޗަށް ބޮޑު އަގުލަބިއްޔަތަކުން ކުރިހޯދައި، އިންޑިއާ ގައުމީ ޓީމުގެ ކުރީގެ ކީޕަރު ޗޯބޭ އެ ގައުމުގެ ފުޓްބޯޅަ ރައީސްގެ މަގާމަށް އިންތިހާބުވެވަޑައިގަތީ މި މަހު ދެ ވަނަ ދުވަހު އެވެ. އިންޑިއާ ފުޓްބޯޅަ އަށް ތިން ވަނަ ފަރާތެއްގެ ނުފޫޒު ފޯރުވާ ކަމަށް ބުނެ، މިދިޔަ މަހު ފީފާ އިން އިންޑިއާ ސަސްޕެންޑް ވެސް ކުރި އެވެ. އެކަމަކު، ފީފާގެ އެންގުމާ އެއްގޮތަށް ކަންކަން ކުރުމުން ސަސްޕެންޝަން އުވާލި އެވެ.
އޭއައިއެފްއެފްގެ އާ ހިންގާ ބޯޑުގެ މެމްބަރުން ފީފާގެ ރައީސް އިންފަންޓީނޯއާ އެކު ބައްދަލުވުން ކުރިއަށް ގެންދިޔައީ މި މަހު ނުވަ ވަނަ ދުވަހު ގަތަރުގެ ދޯހާގަ އެވެ.
އެ ބައްދަލުވުމުގައި ވާހަކަ ދައްކަވަމުން، ޗޯބޭ ވިދާޅުވީ އޭނާ އިންތިހާބުވެވަޑައިގަތީ 1.4 ބިލިއަން މީހުން ދިރިއުޅޭ ގައުމެއްގެ ފުޓްބޯޅައިގެ ކަންކަން ހިންގުމަށް ކަމަށާއި އެންމެ ބޮޑު އިސްކަމެއް ދޭނީ ހަމަހަމަކަމާ އެކު ޑިވެލޮޕްމަންޓްގެ ކަންކަން ކުރިއަށް ގެންދިއުމަށް ކަމަށެވެ.
"އަހަރެން ވާނީ (އިންޑިއާ ފުޓްބޯޅަ ފެޑެރޭޝަންގައި ހިމެނޭ) 35 މެމްބަރު އެސޯސިއޭޝަންގެ ކައިރިން ޑިވެލޮޕްމަންޓް ޕްލޭނެއް ހަދަން އަންގާފައި. އެ ހުރިހާ ސްޓޭޓް އެސޯސިއޭޝަނެއްގެ ޑިވެލޮޕްމަންޓް ޕްލޭން ލިބުނުހާ އަވަހަކަށް އަހަރެމެން އެކިއެކި ފަރާތްތަކުގެ ލަފާ ހޯދައިގެން، ފެޑެރޭޝަނުގެ ޑިވެލޮޕްމަންޓް ޕްލޭން ހަދާނަން،" ފީފާ މީޑިއާ އަށް އިން އިންޓަވިއުގައި ޗޯބޭ ވިދާޅުވި އެވެ.
"އަހަރެމެންގެ އެންމެ ބޮޑު ފޯކަސް އެއް އޮތީ ގްރާސްރޫޓަށް، ޔޫތު ފުޓްބޯޅަ ޑިވެލޮޕްކުރުމަށް، އެހެންވެ، އަހަރެމެން ބޭނުންވޭ ފީފާގެ ޓެކްނިކަލް އެހީ ހޯދައިގެން އިންޑިއާގެ ސްކޫލް ސިލަބަސްގައި ފުޓްބޯޅަ ހިމަނަން، ޑިވެލޮޕްކުރެވޭނީ އުނގަނައިދީ ފުރުސަތު ހޯދައިދީގެން،"
ފީފާ ފައުންޑޭޝަންގެ ފަރާތުން މިދިޔަ އަހަރުގެ އޮކްޓޫބަރު މަހުގައި ވަނީ އިންޑިއާގެ އޮޑިޝާގައި "ފުޓްބޯލް ފޯ ސްކޫލްސް" ޕްރޮގްރާމެއް ކުރިއަށް ގެންގޮސްފަ އެވެ. އެ ޕްރޮގްރާމްގައި 100 ކުދިންނާއި 60 ކޯޗުން ބައިވެރިވި އެވެ. ޗޯބޭ ވިދާޅުވީ ފީފާއާ ގުޅިގެން ދެމެހެއްޓެނިވި ގޮތެއްގައި އެ ޕްރޮގްރާމްތައް ހިންގަން ބޭނުންވާ ކަމަށާއި އެކަން ކުރެވޭނީ ސްޓޭޓްތަކުގެ ސަރުކާރާއި ސްކޫލްތަކާއި ގުޅިގެން ކަމަށެވެ.
ޗޯބޭ ވިދާޅުވީ ފީފާ އާއި އިންޑިއާ އިން ގުޅިގެން ކުރެވޭނެ ކަންކަމުގެ އިތުރު މަޝްވަރާތައް ކުރިއަށް ގެންދިއުމަށް ދެން ނިންމާފައިވަނީ އަންނަ މަހު އިންޑިއާގައި ހޯސްޓް ކުރާ 17 އަހަރުން ދަށުގެ އަންހެނުންގެ ފީފާ ވޯލްޑް ކަޕްގެ ތެރެއިން ކަމަށެވެ.
