ދުބާއީ، ޔުނައިޓެޑް އަރަބް އެމިރޭޓްސް (ސެޕްޓެމްބަރު 11) - ޕާކިސްތާން 23 ލަނޑުން ބަލިކޮށް، ސްރީ ލަންކާ އިން ހަ ވަނަ ފަހަރަށް ކްރިކެޓް އޭޝިއާ ކަޕް ޗެމްޕިއަންކަން މިރޭ ހޯދައިފި އެވެ.
ލަންކާގެ މި ކާމިޔާބީއާ އެކު އެ ޓީމުން ވަނީ ކްރިކެޓް އޭޝިއާ ކަޕްގައި އިންޑިއާގެ ރެކޯޑާ ގާތަށް ޖެހިލައިފަ އެވެ. އިންޑިއާ އިން ހަތް ފަހަރު ތަށި ހޯދިއިރު، ލަންކާ އިން ވަނީ ހަ ފަހަރު ތަށި އުފުލާލައިފަ އެވެ. ލަންކާ އަށް ޗެމްޕިއަންކަން މި ހޯދުނީ އަށް އަހަރުގެ މެދުކެނޑުމަކަށް ފަހު އެވެ. ލަންކާ އިން މީގެ ކުރިން ޗެމްޕިއަންކަން ހޯދީ 1986، 1997، 2004، 2008، އަދި 2014 ވަނަ އަހަރު އެވެ.
ދުބާއީގެ އިންޓަނޭޝަނަލް ކްރިކެޓް ސްޓޭޑިއަމްގައި މިރޭ ކުޅުނު ފައިނަލް މެޗުގައި ޓޮސް ދިމާވުމުން ޕާކިސްތާނުން ނިންމީ ފީލްޑް ކުރުމަށެވެ. ލަންކާ އިން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 170 ލަނޑު ހެދި އެވެ. ބެޓިންގައި ލަންކާ އަށް ފަށައިގެން ތަފާތެއް ނުދެއްކި އޮއްވައި، ފަސް ވަނަ އަށް ކުޅެން އެރި ބަނޫކާ ރާޖަޕަކްސަ ވަނީ ނުބައިނުވެ، 71 ލަނޑު އެއްކޮށްދީ، އެ ޓީމަށް ކޮންފިޑެންސް ހޯދައިދީފަ އެވެ.
ލަންކާ ކުޅުންތެރިން މިރޭގެ ފައިނަލް މެޗުގެ ކުރިން އުފާފާޅުކުރަނީ.--- ފޮޓޯ: އޭއެފްޕީ
ހަތް ވަނަ އަށް ކުޅެން ނުކުތް، ލަންކާގެ ބެޓްސްމަން، ވަނިންދޫ ހަސަރަންގާ، 36 ލަނޑަށް ނުބައިވިއިރު، އޭނާ ވެސް ވަނީ ލަންކާގެ ސްކޯރިން ރަނގަޅު ކުރުމުގައި އިސް ރޯލެއް އަދާކޮށްފަ އެވެ.
ޕާކިސްތާނުން ކުޅެން އެރިއިރު، ލަންކާގެ ފީލްޑަރުން ތިބީ މި ފަހަރުގެ މުބާރާތުގައި އެ ކުޅުންތެރިން ދައްކަމުން އައި ކުޅުމާ އެކު ރަނގަޅު ފޯމެއްގަ އެވެ. ޕާކިސްތާނަށް އެންމެ ގިނަ ލަނޑު އެއްކޮށްދިނީ އޯޕަނިން ބެޓްސްމަނުންގެ ތެރެއިިން މުހައްމަދު ރިޒްވާން އެވެ. އޭނާ ނިުބައިވީ 55 ލަނޑަށެވެ.
ޕާކިސްތާންގެ ކެޕްޓަން، ބާބަރު އާޒަމް، އޯޕަނިން ބެޓްސްމަނެއްގެ ގޮތުގައި ރިޒްވާނާ އެކު ކުޅެން އެރި ނަމަވެސް އާޒަމް އަށް ހެދުނީ އެންމެ ފަސް ލަނޑެވެ. އެއީ ޕާކިސްތާން މި މެޗުގައި ޕްރެޝަރަށް ވެއްޓުނު އެއް ސަބަބެވެ.
ފީލްޑިންގައި އެންމެ ރަނގަޅު ކުޅުމެއް ދެއްކީ ލަންކާގެ ޕްރަމޯދު މަދުޝަން އާއި ހަސަރަންގާ އެވެ. މަދުޝަން ހަތަރު ވިކެޓް ނެގިއިރު، ހަސަރަންގާ ވަނީ ތިން ވިކެޓް ނަގައިފަ އެވެ.
މުބާރާތުގެ ފޭވަރިޓުންގެ ގޮތުގައި ބެލެވުނު އިންޑިއާ ކެޓީ ސުޕަ ފޯ ސްޓޭޖުގައި (ގަދަ ހަތަރެއްގެ ބުރުގައި) ޕާކިސްތާން އާއި ލަންކާ އަތުން ބަލިވުމުންނެވެ.
ލަންކާގެ މަދުޝަން މިރޭގެ މެޗުގެ ތެރެއިން އުފާފާޅުކުރަނީ: ޕާކިސްތާންގެ އެޓޭކް ހުއްޓުވުމުގައި މަދުޝަން މުހިންމު ވިކެޓްތަކެއް ނެގި.--- ފޮޓޯ: އޭއެފްޕީ
ލަންކާ މުބާރާތް ފެށީ ބައްޔަކުންނެވެ. ފުރަތަމަ މެޗުގައި އަފްގާނިސްތާން އަތުން ބަލިވި ނަމަވެސް އިނގިރޭސި ކޯޗު، ކްރިސް ސިލްވާވުޑްގެ އިރުޝާދުގެ ދަށުން ލަންކާ ވަނީ ދެން ކުޅުނު ފަސް މެޗުން މޮޅުވެ، ޗެމްޕިއަންކަން ހޯދައިފަ އެވެ. ގްރޫޕް ސްޓޭޖުގައި އަފްގާނިސްތާން އަތުން އަށް ވިކެޓުން ބަލިވި ނަމަވެސް ގަދަ ހަތަރު ޓީމުގެ ބުރުގައި ލަންކާ އިން ވަނީ ހަތަރު ވިކެޓުން އަފްގާނިސްތާންގެ މައްޗަށް ކުރިހޯދައިފަ އެވެ.
ކުރިން އިންގްލެންޑްގެ ގައުމީ ޓީމަށް ވެސް ކޯޗުކޮށްދިން ސިލްވާވުޑް ބުނީ ލަންކާގެ މި ކާމިޔާބީގެ ސިއްރަކީ އެއްވެސް އިރެއްގައި ޓީމު ބައިބައިވިޔަނުދީ އެއް ވިސްނުމެއްގައި މަސައްކަތް ކުރުން ކަމަށެވެ. އަދި ފުރަތަމަ މެޗުން ބަލިވި ނަމަވެސް ކޮންމެ ކުޅުންތެރިއަކު އަމިއްލަ ނަފްސަށް އޮތް އިތުބާރު ގެއްލުނަނުދީ ރަނގަޅަށް މަސައްކަތް ކުރިކަން ސިލްވަވުޑް ފާހަގަކުރި އެވެ.
