ބާލިން (ސެޕްޓެމްބަރު 11) - ޖަރުމަނު ލީގުގައި މިރޭ ކޮލޯން އަތުން 1-0 އިން މޮޅުވެ ޔޫނިއަން ބާލިން ލީގުގެ އެއް ވަނަ އަށް ޖެހިލައިފި އެވެ.
ރަށުން ބޭރުގައި މިރޭ ކޮލޯން އަތުން މޮޅުވެ، ޔޫނިއަން ބާލިން އިން ޖަރުމަނު ލީގުގެ އެއް ވަނަ މަގާމަށް ޖެހިލީ 14 ޕޮއިންޓާ އެކު އެވެ. ދެ ވަނައިގައި 13 ޕޮއިންޓާ އެކު އޮތީ ފްރައިބާގް އެވެ. އެންމެ ފަހުގެ ޗެމްޕިއަން ބަޔާން މިއުނިކް އޮތީ 12 ޕޮއިންޓާ އެކު ތާވަލްގެ ތިން ވަނައިގަ އެވެ.
ޔޫނިއަން ބާލިން އިން މެޗު ފެށީ ވަރަށް ވަރުގަދަކޮށެވެ. އަދި މެޗުގެ ފުރަތަމަ ހަތަރު މިނިޓުގެ ތެރޭގައި އެ ޓީމުން ވަނީ ލީޑު ނަގައިފަ އެވެ. ޔޫނިއަން ބާލިންގެ ޝެރާލްޑޯ ބެކާ އޭރިޔާ ތެރެެއަށް ހުރަސްކޮށްލި ބޯޅަ ގޯލުގެ ތެރެއަށް އަމާޒުވީ ކޮލޯންގެ ޑިފެންޑަރު ޓީމޯ ހުއޭބާސްގެ ފައިގައި ޖެހިފަ އެވެެ.
އޭގެ ހަތަރު މިނިޓު ފަހުން ޔޫނިއަން ބާލިން އަށް ޕެނަލްޓީއެއް ލިބި، ލީޑު ފުޅާކުރުމަށް ރަނުގެ ފުރުސަތެއް ހުޅުވުނެވެ. އެކަމަކު، ޖޯޑަން ސެބާޗޫ ފޮނުވާލި ޕެނަލްޓީ ކޮލޯންގެ ގޯލްކީޕަރު މާވިން ޝުވާއެބޭ ވަނީ ދިފާއުކޮށްފަ އެވެ.
މި ސީޒަންގެ ބުންޑަސްލީގާގައި ޔޫނިއަން ބާލިން އަދި މެޗަކުން ބަލިނުވެ އެވެ. ކޮލޯން މި މެޗުން ބަލިވުމުން، ލީގުގައި މިހާތަނަށް ބަލިނުވެ އޮތް ހަމައެކަނި ދެ ކްލަބަކީ ޔޫނިއަން ބާލިން އާއި ބަޔާން އެވެ.
"ޓީމު އޮތީ ވަރަށް ރަނގަޅު ފައްތަރެއްގައި،" މެޗަށް ފަހު ޔޫނިއަން ބާލިންގެ ކެޕްޓަން ކްރިސްޓޮފާ ޓްރިމެލް ބުންޏެވެ. "އެހެންވެ މި ހިސާބުގައި (ތާވަލްގެ އެއްވަނައިގައި) ޓީމު މި އޮތީ."
ހޫލިއަން ނާގަލްސްމަންގެ ކޯޗުކަމުގައި ކުޅޭ ބަޔާން މިއުނިކުން ވަނީ ލީގުގައި އެންމެ ފަހުން ކުޅުނު ތިން މެޗުން ވެސް އެއްވަރުވެފަ އެވެ.
