މިލާން (ސެޕްޓެމްބަރު 7) - ޗެމްޕިއަންސް ލީގުގެ ދެ ވަނަ ބުރުގެ ޖާގައެއް ހޯދުމަށް އިންޓަ މިލާނަށް ބޭނުންވަނީ 10 ޕޮއިންޓް ކަމަށް އެ ޓީމުގެ ކޯޗު ސިމޯނޭ އިންޒާގީ ބުނެފި އެވެ.
މި ސީޒަންގެ ޗެމްޕިއަންސް ލީގުގައި އިންޓަ އޮތް ގުރޫޕް ސީ އަކީ މި މުބާރާތުގެ "މަރުގެ" ގުރޫޕެވެ. މި ގުރޫޕްގައި އިންޓައާ އެކު ބަޔާން މިއުނިކާއި ބާސެލޯނާ ހިމެނެ އެވެ. ދެން އޮތީ ޗެކް ރިޕަބްލިކްގެ ވިކްޓޯރިއާ ޕްލެޒެން އެވެ.
މި ގުރޫޕްގައި މިރޭ އަމިއްލަ ދަނޑުގައި އިންޓަ ނުކުންނާނީ ބަޔާން މިއުނިކްއާ ދެކޮޅަށެވެ.
އިންޓަ އަކީ އެންމެ ފަހުން ޗެމްޕިއަންސް ލީގު ކާމިޔާބުކުރި އިޓަލީގެ ކްލަބެވެ. އިންޓަ އިން 2010 ވަނަ އަހަރު ޗެމްޕިއަންސް ލީގު ކާމިޔާބުކުރީ ފައިނަލްގައި ބަޔާން ބަލިކުރުމަށް ފަހު އެވެ.
މެޗުގެ ކުރިން އިއްޔެ އޮތް ނޫސްވެރިންގެ ބައްދަލުވުމުގައި އިންޒާގީ ބުނީ 10 ޕޮއިންޓާ އެކު އިންޓަ އަށް ދެ ވަނަ ބުރުގެ ޖާގައެއް ލިބޭނެ ކަމަށް ގަބޫލުކުރާ ކަމަށެވެ. އަދި މިރޭގެ މެޗުގައި ބަޔާންއާ ދެކޮޅަށް ނުކުންނާނީ އެ ޓީމުގެ ފެންވަރު ވަރަށް ރަނގަޅަށް ދަނެގެން ކަމަށް އިންޒާގީ ވަނީ ބުނެފަ އެވެ.
"އަހަރަމެންނަށް އެނގޭ ކަމަކީ 10 ޕޮއިންޓް ހޯދަން ޖެހޭކަން. މިއީ ވަރަށް ވާދަވެރި ގުރޫޕެއް. މިދިޔަ ސީޒަންގައި އަހަރަމެން ވާދަކުރި ގުރޫޕަށްވުރެ މާ އުނދަގޫ ގުރޫޕެއް،" އިންޒާގީ ބުންޏެވެ. "އަހަރަމެންނާ ދެކޮޅަށް ނުކުންނަ ޓީމުގެ ފެންވަރު އެނގޭ. އެއީ މި މުބާރާތް ކާމިޔާބުކުރާނެ ކަމަށް ބެލެވޭ ފޭވަރިޓުންގެ ތެރޭގައި ހިމެނޭ ޓީމެއް."
މުބާރާތުގައި އޮތް އެންމެ ވަރުގަދަ އެއް ކްލަބާ ދެކޮޅަށް ބަޔާން ނުކުންނައިރު، އިޓާލިިއަން ސީރިއާގައި އެންމެ ފަހުން އެ ޓީމު ކުޅުނު މެޗުގައި އޭސީ މިލާން އަތުން ވަނީ ބަލިވެފަ އެވެ.
ބަޔާންއާ ދެކޮޅަށް މިރޭ އިންޓަ ކުޅޭ މެޗުގައި ވެސް އެ ޓީމުގެ ބެލްޖިއަމް ފޯވަޑް ރޮމެލޫ ލުކާކޫ އަށް ނުކުޅެވޭނެ އެވެ. ލުކަކޫ އަށް ދިމާވެފައިވާ އަނިޔާގެ މައްސަލަ އިން ސަލާމަތްވެ، އަލުން ކުޅެން ނުކުންނަން ވަގުތު ނަގާނެ ކަމަށް އިންޒާގީ ވަނީ ކުރިން ބުނެފަ އެވެ.
ބަޔާންގެ ކޯޗު ހޫލިއަން ނާގަލްސްމަން ބުނީ މިއީ އޭނާގެ ޓީމަށް ސީޒަނުގެ ކުރީކޮޅުގައި ރަނގަޅު ފޯމެއްގައި ކުރިއަށްދާން ބަލާއިރު މުހިންމު ޗެލެންޖެއް ކަމަށާއި މި ޓެސްޓުން ކުރި ހޯދައިގެން ނޫން ގޮތަކަށް ބޭނުންވާ މަންޒިލަށް ދާން އުނދަގޫވާނެ ކަމަށެވެ.
އިންޓަ އާއި ބަޔާން ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
