ލިވަޕޫލް (ސެޕްޓެމްބަރު 6) - ލިވަޕޫލްގެ ކެޕްޓަން ޖޯޑަން ހެންޑަސަންގެ ފަލަމަސްގަނޑަށް ލިބިފައިވާ އަނިޔާގެ ސަބަބުން ތިން ހަފްތާއެއްހާ ދުވަހަށް ކުޅުމާ ދުރަށްދާން ޖެހިއްޖެ އެވެ.
މިިދިޔަ ބުދަ ދުވަހުގެރޭ ލިވަޕޫލުން ފަހު ވަގުތު ނިއުކާސަލް ޔުނައިޓެޑް ބަލިކުރި މެޗުގެ ދެ ވަނަ ހާފުގައި ހެންޑަސަން ފަޔަށް އަނިޔާވެގެން ބަދަލުކުރި އެވެ. އަނިޔާގެ ތަފްސީލް ދެނެގަންނަން ޓެސްޓްތަކެއް ހެދިއިރު، އެ މުއްދަތުގައި އޭނާ އަށް ވަނީ މިދިޔަ ހޮނިހިރު ދުވަހު ލިވަޕޫލުން ލަނޑެއް ނުޖެހި އެވަޓަންއާ އެއްވަރުވި މެޗު ގެއްލިފަ އެވެ.
ހެންޑަސަން، 32، ގެ އަނިޔާއާ ބެހޭ ތަފްސީލް ރިޕޯޓް ލިބިފައިވާއިރު، އޭގައިވާ ގޮތުން އޭނާ ތިން ހަފްތާއެއްހާ މުއްދަތަށް ކުޅުމާ ދުރުގައި ހުންނަން ޖެހޭނެ އެވެ. މާނަ އަކީ ލިވަޕޫލުން ދެން އެންމެ އަވަހަށް ކުޅޭ ހަތަރު މެޗު ހެންޑަސަން އަށް ގެއްލުމުގެ ފުރުސަތު އޮތުމެވެ.
ލިވަޕޫލަށް ދެން އޮތް މެޗުތަކަކީ މާދަމާރޭ ޗެމްޕިއަންސް ލީގުގައި ރަށުންބޭރު ނަޕޯލީއާ ދެކޮޅަށް ކުޅޭ މެޗާއި އިނގިރޭސި ޕްރިމިއާ ލީގުގައި ވުލްވްސް، ޗެމްޕިއަންސް ލީގުގައި އަޔަކްސް، އަދި ޕްރިމިއާ ލީގުގައި ޗެލްސީއާ ދެކޮޅަށް ރަށުންބޭރުގައި ކުޅެން ޖެހޭ މެޗެވެ. އެކަމަކު، ލިވަޕޫލުން ހެންޑަސަން އެނބުރި އަންނާނެ ކަމަށް އުންމީދުކުރަނީ މި މަހު 18 ވަނަ ދުވަހު ޗެލްސީއާ ދެކޮޅަށް ކުޅޭ މެޗަށެވެ.
ސީޒަންގެ ކުރީކޮޅުގައި ލިވަޕޫލަށް އަނިޔާގެ މައްސަލަތައް ބޮޑަށް ދިމާވެފައިވަނީ މިޑްފީލްޑަރުންނަށެވެ. އެ ގޮތުން ލީގުގެ ފުރަތަމަ މެޗުގައި ތިއާގޯ އަލްކަންޓާރާ އަށް އަނިޔާވިއިރު، އޭނާ މިހާރު ވަނީ އަނިޔާއިން ރިކަވާވެގެން ޓީމުގެ ފަރިތަކުރުންތަކާ ގުޅިފަ އެވެ.
ފިޓްކޮށް މެޗު ކުޅެވޭ ހާލަތުގައި ތިބި މިޑްފީލްޑަރުން މަދުވުމުން، ލިވަޕޫލުން ވަނީ ޓްރާންސްފާގެ ފަހު ދުވަހުގައި ލޯން އެއްބަސްވުމެއްގައި ޔުވެންޓަސް އަށް ކުޅެމުން އަންނަ ބްރެޒިލްގެ މިޑްފީލްޑަރު އާތޫރް މެލޯ ގެނެސްފަ އެވެ.
