ރާއްޖޭގައި އެންމެ ޕްރޮފެޝަނަލްކޮށް ހިންގާ ބެޑްމިންޓަން ކްލަބް، ރިވައިވަލް ސްޕޯޓްސް ކްލަބުން ތިން އަންހެން ކުޅުންތެރިއަކަށް ބެޑްމިންޓަން ކެރިއަރެއް ބިނާކުރަން ބޮޑު ފުރުސަތެއް ތަނަވަސްކޮށްދިނުމުގެ މަސައްކަތް ފައްޓައިފި އެވެ.
އެ ގޮތުން ރިވައިވަލް އިން ފެށި ތިން މަހުގެ ޓްރަޔަލްގައި ބައިވެރިވާ ތިން ކުޅުންތެރިންނަކީ، ފިރުޝާނާ ނަސީރު އާއި މާޝާ ރަޝީދު އަދި ޒޯޔާ ހަސަން ޒަރީރު އެވެ. މި ތިން ކުޅުންތެރިން ވެސް ވަނީ ބެޑްމިންޓަންގެ ގައުމީ ފެންވަރުގެ އެކި މުބާރާތްތަކުގައި ކުޅެ، ފާހަގަކޮށްލެވޭ ކާމިޔާބީތަކެއް ހޯދައިފަ އެވެ.
އެ ގޮތުން، ފިރުޝާނާ އަކީ މި ވަގުތަށް ބަލާއިރު ގައުމީ މުބާރާތުގެ ދެ ވަނަ ޑިވިޝަނުގެ އެންމެ ފަހުގެ އަންހެން ސިންގަލްސް، އަންހެން ޑަބަލްސް އަދި އަންހެން މިކްސް ޑަބަލްސް ޗެމްޕިއަނެވެ. އޭނާ ވަނީ މީގެ ކުރިން ބެޑްމިންޓަން އެސޯސިއޭޝަނުން ބޭއްވި ބައެއް ޓީމު އިވެންޓް މުބާރާތްތަކުގައި ރިވައިވަލް އަށް ވެސް ކުޅެފަ އެވެ.
ޓްރަޔަލުން ދެން ފުރުސަތު ދިން މާޝާ އަކީ މީގެ ކުރިން، 2018 އިން 2021 އަށް ގައުމީ ބެޑްމިންޓަން ސްކޮޑުގައި ޓްރެއިނިން ފުރިހަމަކޮށްފައިވާ ކުޅުންތެރިއެކެވެ. މާޝާ އަކީ މީގެ ކުރިން ރާއްޖޭގެ 19 އަހަރުން ދަށުގެ އަންހެން ސިންގަލްސް، އަންހެން ޑަބަލްސް އަދި އަންހެން މިކްސް ޑަބަލްސް ޗެމްޕިއަނެވެ. އެއީ 2018 ވަނަ އަހަރުގެ އިންޓަ ސްކޫލް މުބާރާތުގައި އޭނާ ހޯދާފައިވާ ކާމިޔާބީތަކެވެ.
ބެޑްމިންޓަންގެ ޓީމު އިވެންޓް މުބާރާތެއްގެ ތެރެއިން ފިރުޝާނާ: އޭނާ އަކީ ގައުމީ ލެވަލްގެ ގިނަ ކުޅިވަރުތަކެއްގައި މޮޅު ކުޅުމެއް ދައްކާ ކުޅުންތެރިއެއް.--- ފޮޓޯ: އަދަދު
ރިވައިވަލް އިން ފުރުސަތު ދިން ޒޯޔާ އަކީ މީގެ ކުރިން ޖޫނިއާ ނެޝަނަލް ޕޫލުގައި ޓްރެއިނިން ހެދި ކުޅުންތެރިއެކެވެ. އޭނާ ވަނީ 2019 ވަނަ އަހަރު ބޭއްވި އިންޓަ ސްކޫލް މުބާރާތުގެ 14 އަހަރުގެ ކެޓަގަރީން ފާހަގަކޮށްލެވޭ ވަނަތަކެއް ހޯދައިފަ އެވެ.
ޒޯޔާ، ފިރުޝާނާ އަދި މާޝާގެ ޓްރަޔަލްގެ މުއްދަތަކީ ތިން މަސް ކަމުގައި ވިޔަސް، މި ތިން ކުޅުންތެރިން މި ޓްރަޔަލްގައި ކުރާ މަސައްކަތް ބެލުމަށް ފަހު، އެކަށީގެންވާ ޓާގެޓްތަކެއް ހާސިލްކޮށްފިނަމަ ތިން ކުޅުންތެރިންނަށް ވެސް އަންނަ އަހަރުގެ ނިޔަލަށް ރިވައިވަލްއާ އެކު ޓްރެއިނިން ކުރިއަށްދިއުމުގެ ފުރުސަތު އޮންނާނެ އެވެ.
މި ކުޅުންތެރިންގެ ޓްރެއިނިންތައް ވެސް ކުރިއަށްގެންދާނީ ރިވައިވަލްގެ ފުލްޓައިމް ކޯޗު، ނަޝްފާން މުހައްމަދު އެވެ.
ރިވައިވަލްގެ ކޯޗު ނަޝްފާނަކީ ބައިނަލްއަގުވާމީ އަދި ގައުމީ ލެވަލްގައި ގިނަ އަހަރުތަކެއް ކުޅެފައިވާ އަދި ކޯޗިންގައި ވެސް ރަނގަޅު މަސައްކަތްތަކެއް ކުރަމުން އަންނަ ފަރާތެކެވެ. ދާދި ފަހުން ބެޑްމިންޓަން ވޯލްޑް ޗެމްޕިއަންޝިޕްގައި ރާއްޖޭގެ އެއް ވަނަ އަންހެން ޑަބަލްސް ޕެއާ، އައިމިނަތު ނަބީހާ އާއި ފާތިމަތު ނަބާހާ ކުޅުނުއިރު، ކޯޗެއްގެ ގޮތުގައި ބައިވެރިވީ ނަޝްފާން އެވެ.
ރިވައިވަލް އަކީ 2019 ވަނަ އަހަރު ޖުލައި މަހު އެއް ވަނަ ދުވަހު ވުޖޫދުވި ކްލަބެކެވެ. އެ ކްލަބުން އަންނަނީ ބައިނަލްއަގުވާމީ މުބާރާތްތަކާއި ރާއްޖެ އަށް ހުޅުވާލައިގެން ބޭއްވޭ މުބާރާތްތަކުގައި ފާހަގަކޮށްލެވޭ ކާމިޔާބީތަކެއް ހޯދަމުންނެވެ. މީގެ އިތުރުން ބެޑްމިންޓަނުން އެކި ކުޅުންތެރިންނަށް ރަނގަޅު ކެރިއަރެއް ބިނާކުރުމަށް ފުރުސަތު ފަހިކޮށްދޭން ސްކޮލަޝިޕްތައް ވެސް ރިވައިވަލްގެ ފަރާތުން އަންނަނީ ދެމުންނެވެ.
