ލުސޭން، ސްވިޒަލެންޑް (ސެޕްޓެމްބަރު 2) - ޔުއެފާގެ ފައިނޭންޝަލް ފެއާ ޕްލޭ (އެފްއެފްޕީ) ގަވައިދާ ހިލާފުވެގެން ފިޔަވަޅު އެޅި ކްލަބުތަކުގެ ތެރޭގައި އިންޓަ މިލާނާއި ޔުވެންޓަސް އަދި ޕީއެސްޖީ ހިމެނިއްޖެ އެވެ.
އެފްއެފްޕީއާ ހިލާފުވެގެން ޔުއޭފާ އިން ވަނީ މި ތިން ކްލަބުގެ އިތުރުން، އިޓަލީގެ އޭސީ މިލާނާއި ރޯމާ އާއި ތުރުކީގެ ބެސިކްޓަސް އާއި ފްރާންސްގެ މާސޭ އަދި މޮނާކޯ ވެސް ޖޫރިމަނާކޮށްފަ އެވެ.
އެކަމަކު، މި ކްލަބުގެ ތެރެއިން އެންމެ ބޮޑު ޖޫރިމަނާއެއް ކުރީ ޕީއެސްޖީ އެވެ. ޔުއޭފާ އިން ވަނީ ޕީއެސްޖީ 10 މިލިއަން ޔޫރޯ (10 މިލިއަން ޑޮލަރު) އިން ޖޫރިމަނާކޮށްފަ އެވެ.
ރޯމާ، ފަސް މިލިއަން ޔޫރޯ (ފަސް މިިލިއަން ޑޮލަރު) އިން ޖޫރިމަނާކުރިއިރު، އިންޓަ އިން ދައްކަން ޖެހެނީ ހަތަރު މިލިއަން ޔޫރޯ (ހަތަރު މިލިއަން ޑޮލަރު)ގެ ޖޫރިމަނާއެކެވެ. ޔުވެންޓަސް 3.5 މިލިއަން ޔޫރޯ (3.5 މިލިއަން ޑޮލަރު) އިން ޖޫރިމަނާކުރިއިރު، އޭސީ މިލާން ޖޫރިމަނާކުރީ ދެ މިލިއަން ޔޫރޯ (ދެ މިލިއަން ޑޮލަރު) އިންނެވެ. ބެސިކްޓަސް ޖޫރިމަނާކުރީ ހަ ލައްކަ ޔޫރޯ (ހަ ލައްކަ ޑޮލަރު) އިންނެވެ. އެންމެ ކުޑަކޮށް ޖޫރިމަނާކުރީ މޮނާކޯ އާއި މާސޭ އެވެ. މި ދެ ޓީމަށް ވެސް ލިބުނީ ތިން ލައްކަ ޔޫރޯ (ތިން ލައްކަ ޑޮލަރު)ގެ ޖޫރިމަނާއެކެވެ.
ޔުއެފާ އިން ބުނީ މި ކްލަބުގެ ޖޫރިމަނާކުރީ 2018 އިން 2020 ވަނަ އަހަރާ ހަމަައަށް ކްލަބުތަކުގެ މާލީ ހިސާބުތައް ޔުއޭފާގެ ފައިނޭންޝަލް ކޮންޓުރޯލް އިން ދިރާސާކުރިއިރު، މި ކްލަބުތަކުން ތިން އަހަރުގެ ތެރޭގައި ހޯދާފައިވާ އާމްދަނީ އަށް ވުރެން ހަރަދު އިތުރުވެފައިވާތީ އެވެ.
ރޯމާ އާއި އިންޓަ ފިޔަވައި، ދެން އޮތް ކްލަބުތައް ވަނީ ތިން އަހަރުގެ ތެރޭގައި ޔުއެފާގެ އެފްއެފްޕީ ގަވައިދަށް މަލީ ހިސާބުތައް ފެއްތުމަށް އެއްބަސްވެފަ އެވެ. ރޯމާ އާއި އިންޓަ އެއްބަސްވެފައިވަނީ ހަތަރު އަހަރުގެ ތެރޭގައި މާލީ ހިސާބުތައް ރަނގަޅުކުރުމަށެވެ.
ޔުއޭފާ އިން ދީފައިވާ މުއްދަތުގެ ތެރޭގައި މި ކްލަބުތަކުގެ މާލީ ހިސާބުތައް ރަނގަޅުނުވެއްޖެނަމަ، ޔުއޭފާ އިން ކޮށްފައިވާ ޖޫރިމަނާ އިތުރުވެގެން ދާނެ އެވެ.
"ކްލަބުތަކާއެކު އެއްބަސްވެފައިވަނީ 2026 / 2025 ވަނަ އަހަރުގެ ސީޒަނަށް މާލީ ހިސާބުތައް އެފްއެފްޕީ ގަވައިދަށް ފައްތަން. މި މުއްދަތުގެ ތެރޭގައި ކޮންމެ އަހަރެއްގައި ވެސް ފުރިހަމަކުރަންޖެހޭ ޓާގެޓްތަކެއް ކަނޑައަޅާފައިވާނެ،" ޔުއޭފާ އިން ބުންޏެވެ.
ޔުއެފާ އިން ފިޔަވަޅު އަޅާނެ ކަމަށް ބެލެވުނު ކްލަބްތަކުގެ ތެރެއިން ސަލާމަތްވި އެއް ޓީމަކީ އާސެނަލް އެވެ.
