މިލާން (އޮގަސްޓް 31) - އިޓާލިއަން ލީގުގައި ރޭ އިންޓަ މިލާނާއި ރޯމާ ކުޅުނު މެޗުތަކުން އެއްވަރުވިއިރު، އެންމެ ފަހުގެ ޗެމްޕިއަން އޭސީ މިލާން ކުޅުނު މެޗުގައި ސަސުއޯލޯއާ ލަނޑެއް ނުޖެހި 0-0 އިން އެއްވަރުވެއްޖެ އެެވެ.
އަމިއްލަ ދަނޑުގައި މޮންޒާއާ ދެކޮޅަށް ރޯމާ ވަނީ 3-0 އިން މޮޅުވެފަ އެވެ. އިންޓަ އިން ވަނީ ކްރެމޮނީސޭ އަތުން 3-1 އިން މޮޅުވެފަ އެވެ. ރޭގެ ނަތީޖާތަކަށް ފަހު އެއް ވަނައިގައި އޮތީ ހޯސޭ މޮރީނިއޯ ކޯޗުކޮށްދޭ ރޯމާ އެވެ. އެއީ ހަތަރު މެޗުން 10 ޕޮއިންޓާ އެކު އެވެ. ދެ ވަނައިގައި ނުވަ ޕޮއިންޓާ އެކު އިންޓަ އޮތްއިރު، ތިން ވަނައިގައި މިލާން އޮތީ އަށް ޕޮއިންޓް ހޯދައިގެންނެވެ.
އިންޓަ އިން ރޭގެ މެޗުގައި ލީޑުނެގީ ޔަކީން ކޮރޭއާ ޖެހި ގޯލުންނެވެ. މެޗުގެ 12 ވަނަ މިނިޓްގައި އިންޓަގެ އެޑިން ޒެކޯ ފޮނުވާލި ބޯޅަ ކްރެމޮނީސޭގެ ކީޕަރު އަންޑްރޭއި ރާޑޫ އަތުގައި ޖެހިފައި ނުކުތް ވަގުތު ކޮރޭއާ ވަނީ ރީބައުންސް ބޯޅަ ގޯލަށް ފޮނުވާލައިފަ އެވެ. މެޗުގެ 38 ވަނަ މިނިޓްގައި އިންޓަގެ ދެ ވަނަ ގޯލު ޖެހީ ނިކޯލޯ ބަރޭލާ އެވެ. މިއީ އޭރިއާތެރެއިން ހަކަން ޗަނޮނޮގްލޫ ނަގައިދިން ހުރަހަކުން ބަރޭލާ ވޮލީ އަކުން ޖެހި ގޯލެކެވެ.
މެޗުގެ 76 ވަނަ މިނިޓްގައި އިންޓަގެ ތިން ވަނަ ގޯލު ޖެހީ ލަޓާރޯ މާޓީނޭޒް އެވެ. އަނިޔާގެ ސަބަބުން ރޮމެލޫ ލުކާކޫ ކުޅުމާ ދުރުގައި ހުރި މި މެޗުގައި މާޓީނޭޒް ގޯލު ޖެހީ ބަރޭލާ ދިން ބޯޅަ ހިފައިގެން އޭރިއާތެރެއަށް ވަދެ ގޯލުގެ ދުރު ކަނަށް ބޯޅަ ފޮނުވާލައިގެންނެވެ. ކްރެމޮނީސޭގެ ހަަމައެކަނި ގޯލު މެޗުގެ 90 ވަނަ މިނިޓްގައި ޖެހީ ޑޭވިޑް އޮކެރޭކޭ އެވެ. އޭނާ އޭރިއާބޭރުން ޖެހި ބޯޅަ ގޯލަށް ވަންއިރު، އިންޓަގެ ގޯލްކީޕަރު ސާމިރު ހަންޑަނޯވިޗަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ.
ރޯމާ ދަނޑުގައި ރޭ ކުޅުނު މެޗުގެ 18 ވަނަ މިނިޓްގައި އެ ޓީމަށް ލީޑުނަގައިިދިނީ ޕައޮލޯ ޑިބާލާ އެވެ. ރޯމާގެ ފޯވާޑް ޓެމީ އަބްރަހަމް ބޮލުން ޖައްސާލި ބޯޅައެއް ހާފުގެ މެދެއްހާ ހިސާބުން ހިފައިގެން ގޮސް، އޭރިއާތެރެއަށް ވަދެ، ޑިބާލާ ޖެހި ބޯޅަ އަމާޒުވީ ގޯލުގެ ދުރު ކަނަށެވެ. މެޗުގެ 32 ވަނަ މިނިޓްގައި ރޯމާގެ ދެ ވަނަ ގޯލު ޖެހީ ވެސް ޑިބާލާ އެވެ. މިއީ ޓަމީ އަބްރަހަމް ޖެހި ބޯޅައެއް މޮންޒާގެ ކީޕަރު މިޝޭލޭ ޑި ގްރެގޯރިއޯ އަތުގައި ޖެހިފައި ނުކުތްވަގުތު ޑިބާލާ ރީބައުންސް ބޯޅައަކުން ޖެހި ގޯލެކެވެ. ޑިބާލާ ހެޓްރިކް ހަދަން ޖެހި ޝޮޓް ކީޕަރު ގްރެގޯރިއޯ ވަނީ މަތަކޮށްފަ އެވެ.
މެޗުގައި ރޯމާ އަށް ތިން ވަނަ ގޯލު ޖަހައިިދިނީ 61 ވަަނަ މިނިޓްގައި ރޮޖާ އިބާނިއޭޒް އެވެ. މިއީ ލޫކަސް ޕެލެގްރީނީ ނެގި ކޯނަރަކުން އިބާނިއޭޒް ބޮލުން ޖެހި ގޯލެކެވެ.
ސަސުއޯލޯ ދަނޑުގައި ރޭ އެ ޓީމަށް މިލާން މޮޅަށް ގޯލު ޖަހަން ރަނުގެ ފުރުސަތެއް ލިބުނެވެ. އެ ގޮތުން މެޗުގެ 23 ވަނަ މިނިޓްގައި ސަސުއޯލޯގެ ޑޮމެނިކޯ ބެރާޑީ ޖެހި ޕެނަލްޓީ މިލާންގެ ފްރާންސް ގޯލްކީޕަރު މައިކް މައިންގްނޯން ވަނީ މަތަކޮށްފަ އެވެ. މި މެޗުގައި މިލާނަށް ސަސުއޯލޯ ގޯލަށް އަމާޒުކޮށް މާ ނުރައްކާތެރި ހަމަލާއެއް ފޮނުވާލެވިފައިނުވެ އެވެ.
