މާލެ ސަރަހައްދުގެ ރައްޔިތުންނަށް ހިތްގައިމު ޕިކްނިކް އައިލެންޑެއް ވީހާ އަވަހަކަށް ހޯދައިދިނުމުގެ ބޭނުމަށް ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) ގެ މުވައްޒަފުންނާއި އިސް ބޭފުޅުން މި އީދު ހޭދަކުރަމުން އަންނަނީ ކުޑަގިރި ޕިކްނިކް އައިލެންޑުގަ އެވެ.
އެޗްޑީސީ އިން މާސްޓާ ޕްލޭން ތައްޔާރުކޮށް، ކުޑަގިރީގެ މަސައްކަތް ސަރުކާރުން ހަވާލުކޮށްފައިވާ ގޮތަށް ޖުލައި 26 އަށް ނިންމާ ދަތުރު ދެވެން ފަށާނެ ކަމަށް މީގެ ކުރިން އެ ކުންފުނިން ވަނީ ބުނެފަ އެވެ.
ކުޑަގިރި ޕިކްނިކް އައިލެންޑް ހުޅުވަން މިހާރު އެންމެ ފަހުގެ ތައްޔާރީތައް ވަމުން އަންނައިރު، މި އީދު ބަންދުގައި އެ ކުންފުނީގެ މުވައްޒަފުން ވަނީ އެތަނުގައި ވަސީލަތް ގާއިމްކުރުމާއި ތަންތަން ހެދުމުގެ މަސައްކަތް ކުރިއަށް ގެންގޮސްފަ އެވެ. އަމާޒަކީ ވީހާވެސް އަވަހަށް އެތަން އެކަށޭނަ، ހިތްގައިމު ތަނެއްގެ ގޮތުގައި ނިންމައިދިނުން ކަމަށް އެޗްޑީސީން ބުންޏެވެ.
މީގެ ކުރިން ވެސް އެޗްޑީސީން އިސްނަގައިގެން ކުޑަގިރި ފެހިކުރުމުގެ ގޮތުން ގަސް އިންދުމުގެ ޕްރޮގްރާމެއް ކުރިއަށް ގެންގޮސްފައިވެ އެވެ. އެ ހަރަކާތުގައި ވެސް އެ ކޯޕަރޭޝަންގެ މުވައްޒަފުން ވަނީ ބައިވެރިވެފަ އެވެ.
މި މަހުގެ ތެރޭގައި ޕިކްނިކް އައިލެންޑް ހުޅުވަން ތައްޔާރުވަމުން އަންނައިރު، ޕިކްނިކް އައިލެންޑަކުން ލިބެންޖެހޭ ގިނަ ހިދުމަތްތަކެއް އެ ރަށުން ލިބޭނެ ކަމަށް އެޗްޑީސީން ވަނީ ބުނެފަ އެވެ.
މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދާނެ ރަށެއް ނެތް މައްސަލައަށް ހައްލެއް ހޯދައި ދިނުމަށް ކ. ކުޑަގިރި ފަޅު ހިއްކައިގެން ޕިކްނިކް އައިލެންޑެއް ހަދަން އެމްޓީސީސީއާ ހަވާލުކުރީ މިދިޔަ ސެޕްޓެމްބަރު މަހުގަ އެވެ.
ޕިކްނިކް އައިލެންޑް ތަރައްގީކުރުމުގެ މަޝްރޫއުގެ ދަށުން ދެ ރަށެއް ހިއްކިއިރު، މި ދެ ރަށުގައި ވެސް، ދަތުރުދާ މީހުންނަށް ހާއްސަކޮށްގެން ތަފާތު އެކި ވަސީލަތްތައް ގާއިމުކުރެވޭނެ އެވެ. އޭގެ ތެރޭގައި ކޮޓަރިތަކާއި، ޕޫލް ސަރަހައްދަކާއި، ފުޓްސަލް ދަނޑު ފަދަ ތަންތަން ހިމެނެ އެވެ.
