މާލެ ސިޓީ ކައުންސިލުން ބާއްވާ އަގުބޮޑު ޕާކް ވޮލީބޯޅަ މުބާރާތުގެ އަންހެން ޑިވިޝަނުގެ ފައިނަލުން މޯލްޑިވްސް ވޮލީބޯލް ވެޓެރަންސް އާއި ޕޮލިސް ކްލަބް އޭ އިން ހޯދިއިރު، ފިރިހެން ޑިވިޝަނުގެ ފައިނަލުގައި ޑީވީވީއޭ ސްކައިސް އާއި ޑީވީވީއޭ ޝޫޓާސް ބައްދަލުކުރަން ޖެހިއްޖެ އެވެ.
އަންހެން ޑިވިޝަނުގެ ފައިނަލުން ޖާގަ ހޯދި މޯލްޑިވްސް ވޮލީބޯލް ވެޓެރަންސް އާއި ޕޮލިސް ކްލަބް އޭ ވަނީ މިހާތަނަށް ހުރިހާ މެޗަކުން މޮޅުވެފަ އެވެ. އަދި ފިރިހެން ޑިވިޝަނުގެ ފައިނަލުން ޝޫޓާސް ޖާގަ ޔަގީންކުރީ މެޗަކުން ބަލިނުވެ އެވެ. ދެ ވަނަ ބުރުގައި ޝޫޓާސް އިން ވަނީ ސްކައިސް ބަލިކޮށްފަ އެވެ. ފައިނަލް މެޗުތައް އޮތީ އަންނަ ހުކުރު ދުވަހުގެރޭގަ އެވެ.
އައިމިނަތު އަރީޝާ، ހައްވާ ސަހާ، އައިޝަތު މާޖިދާ، ފާތިމަތު މަޒިއްޔާ އަދި އައިޝަތު ހަސްނާ ހިމެނޭ ވޮލީބޯލް ވެޓެރަންސް ޓީމުން ރޭ ކުޅުނު ސެމީ ފައިނަލުގައި ވަނީ ސީދާ ދެ ސެޓުން ޑީވީވީއޭ ކުއީންސް ބަލިކޮށްފަ އެވެ. ސެޓުތައް ގެންދިޔައީ 21-10، 21-19 އިންނެވެ. ކުއީންސް ޓީމުގައި ހިމެނެނީ ޔުމްނާ އަބްދުލް އަޒީޒް، އައިޝަތު ޝައްފަ، އައިޝަތު ނާޒިމާ، ސުހާނާ އަހުމަދު އަދި މުނާ މުނީރް އެވެ.
ޕާކް ވޮލީ މުބާރާތުގެ އަންހެން ޑިވިޝަނުގައި ރޭ ކުޅުނު މެޗެއްގެ ތެރެއިން.--- ފޮޓޯ: އަބްދުﷲ އިޔާން/ އަދަދު
އަންހެން ޑިވިޝަނުގެ އަނެއް ސެމީގައި ޕޮލިސް ކްލަބް އޭ ވަނީ 21-13، 21-09 އިން ވޮލީބޯލް ޔޫތު ނިއު ޖެނެރޭޝަން ބަލިކޮށްފަ އެވެ. ވޮލީބޯލް ޔޫތު ނިއު ޖެނެރޭޝަން ޓީމުގައި ހިމެނެނީ ނަރީމާ އިދުރީސް (ނަންނި)، ފާތިމަތު ލިވާ ހުސެއިން، މައިހާ އަލީ، އައިޝަތު ޒުނީތާ އަދި ޝަމްހާ ރިޔާޒު (ޝަމްކޮ) އެވެ. ޕޮލިސް ކްލަބް އޭގައި ހިމެނެނީ ހައްވާ ރާޝިދާ (ހައްވަ)، އައިޝަތު ވިޝާމާ، މަރިޔަމް ހަލީމް، ފާތިމަތު އަނާލް އަދި މަރިޔަމް އަޒީފާ އެވެ.
އަންހެން ޑިވިޝަނުގެ ފަސް ވަނަ ޓީމު ހޮވަން ރޭ ކުޅުނު މެޗުން މޮޅުވީ އެސްޕިރޭޝަން ފޯ އޯލް އިނީޝިއޭޓިވް ސްޕޯޓްސް ކްލަބް އެވެ. އެ ޓީމުން ވަނީ ކްލަބް ވޮލީބޯލް 2-1 ސެޓުން ބަލިކޮށްފަ އެވެ. ސެޓުތައް ދިޔައީ 05-21، 21-17 އަދި 12-15 އިންނެވެ. ފިރިހެން ޑިވިޝަނުގެ ފަސް ވަނަ ހޮވަން ކުޅުނު ރޭންކިން މެޗުން މޮޅުވީ ކުޑަހެންވޭރު ޔުނައިޓެޑް އެވެ. އެއީ ގުޑީސް ސްޕޯޓްސް ކްލަބް 2 އާ ވާދަކޮށް 2-1 ސެޓުންނެވެ. ސެޓުތައް ދިޔައީ 15-21، 22-20 އަދި 15-09 އިންނެވެ.
ފިރިހެން ޑިވިޝަނުގެ ފުރަތަމަ ސެމީގައި ޑީވީވީއޭ ބުލްސް އަތުން ސްކައިސް މޮޅުވީ 2-1 ސެޓުންނެވެ. ސެޓުތައް ދިޔައީ 21-16، 17-21 އަދި 12-15 އިންނެވެ. ޑީވީވީއޭ ސްކައިސް ޓީމުގައި ހިމެނެނީ އިބްރާހިމް ރަޝީދު، ޝިރްހާން އަބްދުލް ސައްތާރު، އަހުމަދު އަލީ، ހުސެއިން ޝާހިދު (ޝާޑު) އަދި އަދުނާން އަބްދުލް ހަމީދު އެވެ. އަދި ބުލްސް ޓީމުގައި ތިބީ އާދަމް ނަސީމް (އެޑަމް)، ހަސަން އާމިރު، ހުސެއިން ނައީމް، މުހައްމަދު ރަޝީދު އަދި އަހުމަދު ނިޒާމް އެވެ.
ފިރިހެން ޑިވިޝަނުގެ ދެ ވަނަ ސެމީގައި އިސްމާއިލް ސާޖިދު (ކުޑަކާއްޓެ)، އިބްރާހިމް ފަލާހު އަބޫބަކުރު، ސޯދިގު މޫސާ، މުހައްމަދު އަދި އިސްމާއިލް ޝިހާބް ހިމެނޭ ޑީވީވީއޭ ޝޫޓާސް ޓީމުން ވަނީ ސީދާ ދެ ސެޓުން ވޮލީބޯލް ވެޓަރަންސް ބަލިކޮށްފަ އެވެ. ސެޓުތައް ގެންދިޔައީ 21-11، 21-15 އިންނެވެ. ވޮލީބޯލް ވެޓަރަންސް ޓީމުގައި ތިބީ މުހައްމަދު އަލީ (ޑެންޒޯ)، އަލީ ޝިމާލް، އިބްރާހިމް އާދިލް، މުމްތާޒް އަލީ (މުންތޭ) އަދި ހުސެއިން ހަމީދު އެވެ.
މުބާރާތުގައި މިރޭ އޮތީ ދެ ޑިވިޝަނުގެ ތިން ވަނަ ހޮވާ މެެޗެވެ. ފިރިހެން ޑިވިޝަނުގައި ކުޅޭނީ ވޮލީބޯލް ވެޓަރަންސް އާއި ޑީވީވީއޭ ބުލްސް އެވެ. އަންހެން ޑިވިޝަނުގެ ތިން ވަނަ ހޮވާ މެޗުގައި ބައްދަލުކުރާނީ ކުއީންސާއި ވޮލީބޯލް ޔޫތު ނިއު ޖެނެރޭޝަން އެވެ.
