މާލެ ސިޓީ ކައުންސިލުން ބާއްވާ ފޯރިގަދަ ޕާކް ވޮލީބޯޅަ މުބާރާތުގައި ރޭ ކުޅުނު މެޗުތަކުން މޯލްޑިވްސް ވޮލީބޯލް ވެޓެރަންސްގެ ދެ ޓީމާއި އެސްޕިރޭޝަން ފޯ އޯލް އިނީޝިއޭޓިވް ސްޕޯޓްސް (އާއި) އިން ކުޅުނު ދެ ވަނަ މެޗުން ވެސް މޮޅުވެ، ދެ ވަނަ ބުރުގެ ފުރުސަތު ބޮޑުކޮށްފި އެވެ.
އަންހެން ޑިވިޝަނުގައި ވާދަކުރާ ވޮލީބޯލް ވެޓެރަންސް ޓީމުން ވަނީ އެ ޓީމު ވާދަކުރާ ގްރޫޕް އޭގައި ކުޅުނު ފުރަތަމަ މެޗުން އަލްމާ ސްޕޯޓްސް ކްލަބް ބަލިކޮށްފަ އެވެ. ރޭ ވޮލީބޯލް ވެޓެރަންސް އިން ޖީޖީ ސްޕޯޓްސް ކްލަބް ޕާކް ވިމެންސްގެ މައްޗަށް ކުރިހޯދީ 21-11، 21-09 އިންނެވެ. ވޮލީބޯލް ވެޓެރަންސްގެ އަންހެން ޓީމުގައި ހިމެނެނީ އައިމިނަތު އަރީޝާ، ހައްވާ ސަހާ، އައިޝަތު މާޖިދާ، ފާތިމަތު މަޒިއްޔާ އަދި އައިޝަތު ހަސްނާ އެވެ.
ވޮލީބޯލް ވެޓެރަންސްގެ ފިރިހެން ޓީމުން ވަނީ ފިރިހެން ޑިވިޝަނުގެ ގްރޫޕް އޭގައި އެ ޓީމުން ކުޅުނު ފުރަތަމަ މެޗުގައި ކުޑަހެންވޭރު ޔުނައިޓެޑް ބަލިކޮށްފަ އެވެ. އަދި ރޭ ވޮލީބޯލް ވެޓެރަންސް އިން ވަނީ ސްޕޯޓްސް ކްލަބް ސިޓީ ސީދާ ދެ ސެޓުން، 21-10، 21-11 އިން ބަލިކޮށްފަ އެވެ. ވޮލީބޯލް ވެޓަރަންސް ފިރިހެން ޓީމުގައި ހިމެނެނީ މުހައްމަދު އަލީ (ޑެންޒޯ)، އަލީ ޝިމާލް، އިބްރާހިމް އާދިލް، މުމްތާޒް އަލީ (މުންތޭ) އަދި ހުސެއިން ހަމީދު އެވެ.
ސްޕޯޓްސް ކްލަބް ސިޓީއާ ދެކޮޅަށް ރޭ ވޮލީބޯލް ވެޓެރަންސް ފިރިހެން ޓީމުން ކުޅުނު މެޗުގެ ތެރެއިން.-- ފޮޓޯ: އަބްދުﷲ އިޔާން/ އަދަދު
އަންހެން ޑިވިޝަނުގެ ގްރޫޕް ސީގެ މެޗުން އާއި މޮޅުވީ ޑީވީވީއޭ ސްޓާސް އަތުން ސީދާ ދެ ސެޓުންނެވެ. ސެޓުތައް ދިޔައީ 21-16، 21-19 އިންނެވެ. އާއި ޓީމުގައި ހިމެނެނީ ސޮފާ، ޒީނިޔާ، މުއީނާ، ރަފްހާ އަދި ޒަހާނާ އެވެ. އާއި ޓީމު ކުޅުނު ފުރަތަމަ މެޗުން ވަނީ 2-1 ސެޓުން ޕޮލިސް ކްލަބް ބީ ބަލިކޮށްފަ އެވެ.
އިއްޔެ ހަވީރު ކުޅުނު ފިރިހެން ޑިވިޝަނުގެ ގްރޫޕް ޑީގެ މެޗުން ކްލަބް ޔޫތު ސިޓީ ވަނީ 2-1 ސެޓުން ޕޮލިސް ކްލަބް ސީ ބަލިކޮށްފަ އެވެ. ސެޓުތައް ދިޔައީ 21-18، 17-21 އަދި 15-09 އިންނެވެ. ރޭ ކުޅުނު ގްރޫޕް ޑީގެ މެޗުން ޑީވީވީއޭ ބުލްސް 21-11، 21-13 އިން ޑީވީވީއޭ ސުޕަ ސްޓާސް ބަލިކޮށްފަ އެވެ. ފިރިހެން ޑިވިޝަނުގެ ގްރޫޕް ބީގައި ޕޮލިސް ކްލަބް އޭ އިން ވަނީ 21-19، 21-09 އިން ޖީޖީ ސްޕޯޓްސް ކްލަބް ޕާކް ބޯއީސް ޖޫނިއާ ބަލިކޮށްފަ އެވެ. އަދި ފިރިހެން ޑިވިޝަނުގެ ގްރޫޕް ސީގައި ވަނީ ގުޑީސް ސްޕޯޓްސް ކްލަބުން ވަނީ 21-16، 21-15 އިން ޑީވީވީއޭ ޝޫޓާސް ބަލިކޮށްފަ އެވެ. މިއީ ގުޑީސް ހޯދި ދެ ވަނަ މޮޅެވެ.
އަންހެން ޑިވިޝަނުގެ ގްރޫޕް ބީގައި ރޭ އެލްކިއު ސްޕޯޓްސް ކްލަބް އަތުން ދެ ސެޓު އެއް ސެޓުން މޮޅުވީ ޑީވީވީއޭ ނިއު ސްޓާސް އެވެ. ސެޓުތައް ދިޔައީ 21-10، 13-21 އަދި 21-15 އިންނެވެ. އަންހެން ޑިވިޝަނުގެ ގްރޫޕް ޑީގައި ޕޮލިސް ކްލަބް ސީ އިން ވަނީ 21-16، 21-15 އިން ވޮލީބޯލް އެކެޑަމީ ބަލިކޮށްފަ އެވެ.
މުބާރާތުގައި މިއަދު ހަވީރު ކުޅޭނީ ފިރިހެން ޑިވިޝަނުގެ ގްރޫޕް ޑީގެ މެޗެކެވެ. ކްލަބް ޔޫތު ސިޓީ ބައްދަލުކުރާނީ ޑީވީވީއޭ ސްކައިސްއާ އެެވެ. މިރޭ އެ ގްރޫޕްގައި ޑީވީވީއޭ ސުޕަސްޓާސް އާއި ޕޮލިސް ކްލަބް ސީ ބައްދަކުކުރާނެ އެވެ. ފިރިހެން ޑިވިޝަނުގެ ގްރޫޕް އޭގައި މިރޭ ކުޅޭނީ ކްލަބް ޓީނޭޖާއި މޯލްޑިވްސް ވޮލީބޯލް ވެޓެރަންސް އެވެ. ގްރޫޕް ބީގައި އޮތީ ޕޮލިސް ކްލަބް އޭ އާއި ކްލަބް ވޮލީބޯލްގެ މެޗެވެ. އަދި ގްރޫޕް ސީގައި މިރޭ ކުޅޭނީ ޖީޖީ ސްޕޯޓްސް ކްލަބް ޕާކް ބޯއީސް އާއި ޑީވީވީއޭ ޝޫޓާސް އެެވެ.
އަންހެން ޑިވިޝަނުގައި ވެސް މިރޭ ހަތަރު މެޗެއް އޮންނާނެ އެވެ. ގްރޫޕް އޭގައި ކުޅޭނީ ސްޕޯޓްސް ކްލަބް ޖައިޝާ އާއި މޯލްޑިވްސް ވޮލީބޯލް ވެޓެރަންސް އެވެ. ގްރޫޕް ބީގައި ޑީވީވީއޭ ކުއީންސް އެލްކިއު ސްޕޯޓްސް ކްލަބާ ކުޅޭނެ އެވެ. ގްރޫޕް ސީގައި ޕޮލިސް ކްލަބް ބީ އިން ނުކުންނާނީ ޑީވީވީއޭ ސްޓާސްއާ ދެކޮޅަށެވެ. އަދި ގްރޫޕް ޑީގައި ކްލަބް ވޮލީބޯލް އިން ޕޮލިސް ކްލަބް ސީއާ ކުޅޭނެ އެވެ.
