ލިޒްބަން (އޭޕްރީލް 18) - ޕޯޗުގަލްގެ ރަސްމީ ލީގު، ޕްރިމޭރާ ލީގާގައި 58 މެޗު ބަލިނުވެ ފުރިހަމަކޮށް އެފްސީ ޕޯޓޯ އިން އިޓަލީގެ އޭސީ މިލާން އަތުގައި އޮތް ރެކޯޑަކާ ހަމަކޮށްފި އެވެ.
ޕޯޓޯ އިން ވަނީ މި ހަފްތާގައި ލީގުގައި ކުޅުނު މެޗުން 12 ވަނައިގައި އޮތް ޕޯޓިމޮނެންސޭ 7-0 އިން ބަލިކޮށްފަ އެވެ. މި ނަތީޖާއާ އެކު ޕޯޓޯ ލީގުގައި ބަލިނުވާތާ 58 މެޗު ހަމަވީ އެވެ. ޕޯޗުގީސް ލީގުގައި ކުރިން ބަލިނުވެ އެންމެ ގިނަ މެޗު ފުރިހަމަކުރުމުގެ ރެކޯޑް ހެދީ 56 މެޗު ބަލިނުވެ ނިންމާލި ބެންފީކާ އިންނެވެ.
ބެންފީކާގެ ރެކޯޑް ޕޯޓޯ އިން މުގުރާލާފައިވާއިރު، މިހާރު މި ވަނީ މިލާނުން 1991 އިން 1993 އާ ދެމެދު އިޓާލިއަން ލީގުގައި ބަލިނުވެ، 58 މެޗު ފުރިހަމަކޮށްގެން ހަދާފައިވާ ރެކޯޑާ ހަމަކޮށްފަ އެވެ. އެއީ މިލާނުން އިޓަލީ އާއި ޔޫރަޕް ފުޓްބޯޅައިގައި ފިޔަޖަހަމުން އަދި ދުވަސްވަރު ހެދި ރެކޯޑެކެވެ.
ދުނިޔޭގެ ފުޓްބޯޅަ އަށް ބަލާއިރު، ލީގު ފުޓްބޯޅައިގައި އެންމެ ގިނަ މެޗު ބަލިނުވެ، ފުރިހަަމަ ކުރުމުގެ ރެކޯޑް އޮތީ ރުމޭނިއާގެ ސްޓެއުއާ ބުކަރެސްޓް އަތުގަ އެވެ. އެ ޓީމުން ވަނީ ރުމޭނިއާ ލީގުގައި ބަލިނުވެ، 104 މެޗު ނިންމާލައިފަ އެވެ. އެއީ 1986 އިން 1989 އާ ދެމެދުގައި ހެދި ރެކޯޑް އެެކެވެ.
ޕޯޓޯ މި ވަގުތު ލީގުގެ އެއް ވަނައިގައި އޮތީ ނުވަ ޕޮއިންޓުގެ ލީޑަކާ އެކު އެވެ. އެއް ވަނައިގައި އޮތް ޕޯޓޯ އަށް 30 މެޗުން 72 ޕޮއިންޓް ލިބިފައިވާއިރު، ދެ ވަނައިގައި އޮތް ސްޕޯޓިން ލިޒްބަންގެ އޮތީ 30 މެޗުން 63 ޕޮއިންޓެވެ. އަދި ތިން ވަނައިގައި ބެންފީކާ އޮތީ 30 މެޗުން 67 ޕޮއިންޓް ހޯދައިގެންނެވެ.
އެންމެ ފަހުން ޕޯޓޯ މެޗަކުން ބަލިވީ މީގެ އެއް އަހަރާއި ފަސް މަހާއި 18 ދުވަސް ކުރިންނެވެ. ޕޯޓޯ ދެން އެންމެ އަވަހަށް ކުޅޭ ލީގު މެޗަކީ މި މަހު 25 ގައި ބްރާގާއާ ދެކޮޅަށް ކުޅޭ މެޗެެވެ. މި ސީޒަނުގައި ޕޯޓޯ ވަނީ އެކި މުބާރާތްތަކުގައި ފަސް ފަހަރު ބަލިވެފަ އެވެ. އެއީ ޗެމްޕިއަންސް ލީގުގެ ގްރޫޕް ސްޓޭޖުގައި ތިން މެޗާއި ޕޯޗުގީސް ކަޕްގެ އެއް މެޗާއި ޔޫރޮޕާ ލީގުގެ އެއް މެޗެވެ.
