ރަމަޟާން ކްރިކެޓް ކާނިވަލްގެ އޯޕަން ޓޭޕްބޯލް މުބާރާތުގެ ފައިނަލް މެޗުގައި މިއަދު ހަވީރު، އެވިއާ މޯލްޑިވްސް ބަލިކޮށް މޯލްޑިވްސް އެއާޕޯޓްސް ލިމިޓެޑް ކޮމްޕެނީ (އެމްއޭސީއެލް) އިން ހޯދައިފި އެވެ.
ކުޅިވަރު އެކުވެނި އެއް ނަމްބަރު ދަނޑުގައި މިއަދު ހަވީރު ކުޅުނު ފައިނަލްގައި މެޗުން އެމްއޭސީއެލް މޮޅުވީ ހަ ވިކެޓުންނެވެ. އެމްއޭސީއެލް އަށް ޓޮސް ދިމާވުމުން ނިންމީ ފީލްޑް ކުރުމަށެވެ.
އެވިއާ އިން ކުޅެން އަރައި އަށް އޯވަރު ހަަމަވިއިރު ހެދުނީ 117 ލަނޑެވެ. އެ ޓީމުން އެންމެ ގިނަ ލަނޑު ހެދީ 26 ބޯޅައިން 51 ލަނޑު ހެދި ޖިލްވާޒް ރަޝީދު އެވެ. އަދި އައިހަމް ޒިޔާދު ވަނީ 16 ބޯޅައިން 27 ލަނޑު އެއްކޮށްފަ އެވެ. ޖަވާބުގައި އެމްއޭސީއެލް އިން ކުޅެންއަރައި ހަ އޯވަރުތެރޭ ވަނީ 119 ލަނޑު ހަދައި، މެޗުން މޮޅުވެފަ އެވެ. އެމްއޭސީއެލް ޓީމަށް އެންމެ ރަނގަޅު ކުޅުމެއް ދެއްކީ ހަތް ބޯޅައިން 34 ލަނޑު ހެދި އާދަމް ނާސިފު އެވެ. އެ ޓީމުގެ މުއާވިއަތު އަބްދުލް ގަނީ ވަނީ އަށް ބޯޅައިން 33 ލަނޑު ހަދައިފަ އެވެ. އަދި މުހައްމަދު ޝާފީ ވަނީ އަށް ބޯޅައިން 26 ލަނޑު އެއްކޮށްފަ އެވެ.
އެވިއާ މޯލްޑިވްސް އާއި އެމްއޭސީއެލް ކުޅުނު ފައިނަލް މެޗުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
އޯޕަން ޓޭޕް ބޯލް މުބާރާތުގެ އެންމެ ގިނަ ލަނޑު ހެދީ އެވިއާގެ ޖިލްވާޒް އެވެ. މި މުބާރާތުގެ އެންމެ ގިނަ ވިކެޓް ނެގީ އެމްއޭސީއެލްގެ އަހުމަދު އަމީލް އެވެ. މުބާރާތުގެ ފައިނަލް މެޗަށް ފަހު ބޭއްވި އިނާމް ދިނުމުގެ ރަސްމިއްޔާތު ޝަރަފްވެރިކޮށްދެއްވީ ފައުންޑާ އެން ސީއީއޯ އޮފް ލިލީ ގްރޫޕް އަލްފާޝިލް އަހުމަދު ނާސިރު އެވެ. އަރިހުގައި ކްރިކެޓް ބޯޑްގެ ނައިބު ރައީސް އަހުމަދު ހުސެއިން (ކުޑަ ދޮނާ) ބައިވެރިވެވަޑައިގެންނެވި އެވެ.
ރަމަޟާން ކްރިކެޓް ކާނިވަލްގެ ކޮމްޕެނީ ޓޭޕް ބޯލް މުބާރާތް މިއަދު ފެށިއިރު، ތިން މެޗު ކުޅުނެވެ.
ހެނދުނުގެ ފުރަތަމަ މެޗުގައި އިކުއިވަލަންޓްސްއާ ބައްދަލުކޮށް ފްރެންޑްސް އޮފް މޯލްޑިވްސް ކާމިޔާބުކުރީ 6 ވިކެޓުންނެވެ. އިކުއިވެލަންޓުން އަށް އޯވަރުތެރޭ 87 ލަނޑު ހެދިއިރު، އެ ޓީމުގެ ރަކީބް 17 ލަނޑު ހެދި އެވެ. ޖަވާބުގައި ފްރެންޑްސް އޮފް މޯލްޑިވްސް އިން ކުޅެން އަރައި ހަ އޯވަރުތެރޭ 90 ލަނޑު އެއްކޮށް މެޗުން މޮޅުވީ އެވެ. އެ ޓީމުގެ ސާނަކަ ވަނީ 34 ލަނޑު ހަދައިފަ އެވެ.
ދެ ވަނަ މެޗް އެމްޓީސީސީ ބީ ޓީމާ ބައްދަލުކޮށް އެލިއާ މޯލްޑިވްސް ކާމިޔާބުކުރީ ހަ ވިކެޓުންނެވެ. އެމްޓީސީސީ ބީ ޓީމުން އަށް އޯވަރުތެރޭ 95 ލަނޑު ހެދިއިރު، އެ ޓީމުގެ މޫރްތީ ސެވާން ވަނީ 22 ލަނޑު ހަަދައިފަ އެވެ. ޖަވާބުގައި އެލިއާ މޯލްޑިވްސް ކުޅެންއަރައި ހަ އޯވަރުތެރޭ 100 ލަނޑު ހަދައި، މެޗުން މޮޅުވި އެވެ. އެ ޓީމަށް އެންމެ ރަނގަޅު ކުޅުމެއް ދެއްކީ 10 ބޯޅައިން 33 ލަނޑު އެއްކުރި މުހައްމަދު ރިލްވާން އެވެ.
މިއަދުގެ ތިން ވަނަ މެޗުގައި އަހިންސަކާސްއާ ވާދަކޮށް ފަތަހަ ސްޓާސް މޮޅުވީ ހަތް ވިކެޓުންނެވެ. އަހިންސަކާސް އިން އަށް އޯވަރުތެރޭ 133 ލަނޑު ހެދިއިރު، އެ ޓީމުގެ ތާރަކަ ވަނީ 30 ލަނޑު ހަދައިފަ އެވެ. އަދި އެ ޓީމުގެ މަދުވާލް ވަނީ 29 ލަނޑު ހަދައިފަ އެވެ. ފަތަހަ ޓީމުގެ ބާބުލް ވަނީ ދެ ވިކެޓް ނަގައިފަ އެވެ. ޖަވާބުގައި ފަތަހަ ސްޓާސް އިން ކުޅެންއަރައި 136 ލަނޑު ހަދައި، މެޗުން މޮޅުވި އެވެ. އެ ޓީމުގެ ރޯމަން މިއާ ވަނީ 14 ބޯޅައިން 35 ލަނޑު ހަދައިފަ އެވެ. އަދި މެހެދީ ހަސަން ވަނީ 14 ބޯޅައިން 34 ލަނޑު އެއްކޮށްފަ އެެވެ.
ރަމަޟާން ކްރިކެޓް ކާނިވަލްގެ ސަރުކާރު އޮފީސްތަކުގެ މެދުގައި ކުޅެވޭ އޮފީސް ޓޭޕް ބޯލް މުބާރާތް ދެ މެޗު މާދަމާ ކުޅެވޭނެ އެވެ. ފުރަތަމަ މެޗުގައި ބައްދަލުކުރާނީ މީރާ އާއި އެމްއެމްއޭ އެވެ. ދެ ވަނަ މެޗްގައި ޕޮލިސް ކްލަބާއި ރައީސް އޮފީހުގެ ޓީމު ވާދަކުރާނެ އެވެ. ކުޅުން ކުރިއަށްދާނީ ކުޅިވަރު އެކުވެނިގެ ކްރިކެޓް ދަނޑުގައި ހަވީރު 16:00 ފެށިގެންނެވެ.
