މުޅި ރާއްޖެ އަށް ހުޅުވާލައިގެން ބޭއްވޭ އެންމެ ބޮޑު ފުޓްސަލް މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގައި ރޭ ޒޯން ބުރުގެ ކުޅުން ފެށިއިރު، ތިން މެޗެއް ފޯރިގަދަ ކުޅުމަކަށް ފަހު އެއްވަރުވިއިރު، ފުރަތަމަ މޮޅު ހޯދީ ހދ. ނާވައިދޫ، ށ. ކަނޑިތީމު އަދި އދ. އޮމަދޫ އެވެ.
ރޭ ކަނޑިތީމުން މޮޅުވީ ހއ. ހޯރަފުށްޓާ ކުޅެގެން 5-0 އިންނެވެ. ނާވައިދޫން ވަނީ ށ. މިލަންދޫ އަތުން 6-2 އިން މޮޅުވެފަ އެވެ. އަދި އޮމަދޫ އިން ވަނީ މ. މުލަކު އަތުން 3-2 އިން މޮޅުވެފަ އެވެ. ރޭ އެއްވަރުވެފައިވަނީ ކ. ކާށިދޫ އާއި އއ. މަތިވެރި 2-2 އިންނާއި ޅ. ހިންނަވަރާއި ކ. ގާފަރު ކުޅުނު މެޗު 3-3 އިން އަދި އދ. މަމިގިއްޔާއި މ. ދިއްގަރު 3-3 އިންނެވެ.
ރެހެންދި ފުޓްސަލް ދަނޑުގައި ރޭ ކަނޑިތީމުން ހޯރަފުށި ބަލިކުރިއިރު ގޯލުތައް ޖެހީ އަހުމަދު ރިޒާން ދެ ގޯލާއި މުހައްމަދު ޝާން، އިބްރާހިމް ނަދާދު އަދި އަހުމަދު ޒަމީމް އެވެ. މެޗުގެ މޮޅު ކުޅުންތެރިއަކަށް ހޮވުނީ ނަދާދު އެވެ. ނާވައިދޫން މިލަންދޫ ބަލިކުރިއިރު، ގޯލުތައް ޖެހީ މެޗުގެ މޮޅު ކުޅުންތެރިޔާ އަބްދުﷲ ވިސާމް ހަތަރު ގޯލާއި މުހައްމަދު ނާޝިދު އަދި އިރުފާން މުހައްމަދު ގޯލެކެވެ. މިލަންދޫގެ ދެ ގޯލު ޖެހީ އިބްރާހިމް ޒާހީ އާއި ހަސަން ނާސިހު އަހުމަދު އެވެ.
އޮމަދޫން މުލަކު ކޮޅަށް ގޯލުތައް ޖެހީ މެޗުގެ މޮޅު ކުޅުންތެރިޔާ އަލީ އަަޒުމީ ދެ ގޯލާއި އަހުމަދު އަހުސަން ގޯލެކެވެ. މުލަކުގެ ތަރި ޔަސްފާދު ހަބީބު (މުލަކޭ) ނުލައި އެ ޓީމުން ކުޅުނު މެޗުގައި އެ ޓީމުގެ ލަނޑުތައް ޖެހީ ސުޖުއާން ހުސެއިން އާއި އާދަމް ޝަހީމް (އާނާ) އެވެ.
މަތިވެރިން ރޭ ވަނީ ފުރަތަމަ ދެ ގޯލުގެ ލީޑެއް ނަގައިފަ އެވެ. ފުރަތަމަ ހާފުގައި އަރުޝަދު އަބްދުލް ލަތީފް ޖެހި މޮޅު ގޯލުން ލީޑުނެގިއިރު، ދެ ވަނަ ގޯލު ޖެހީ ދެ ވަނަ ހާފުގައި އިސްމާއިލް ނަސީމް އެވެ. ކާށިދޫން އެއްވަރުކުރީ ފަހަތުން އަރައި ދެ ގޯލު ޖަހައިގެންނެވެ. އެ ގޮތުން ފަހު މިނިޓްގައި ޝައްފާން ހަލީމް އޭރިއާތެރެއިން ލިބުނު ފުރުސަތުގައި ގޯލަށް ބޯޅަ ވައްދާލިއިރު، ކާށިދޫން އެއްވަރުކުރީ މެޗު ނިމެން ހަ ސިކުންތަށް ވެފައި ހުއްޓައި ލިބުނު ޕެނަލްޓީއެއް ކާމިޔާބު ކޮށްގެންނެވެ. އިލްވާން މުހައްމަދު ޖެހި ޕެނަލްޓީ ވަނުމާ އެކު މެޗުގެ ވަގުުތު ހަމަވެގެން ނިމުނީ އެއްވަރުވެގެންނެވެ.
ހިންނަވަރުގެ ދެ ކުޅުންތެރިން ކައިރިން ގާފަރުގެ ގައިސާން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ގާފަރުގެ ގައިސާން އަބޫބަކުރު މާހިރު ޖެހި ދެ ގޯލުން ގާފަރުން ލީޑުނަގާފައިވަނިކޮށް، ހިންނަވަރުގެ އަހުމަދު އަވީން މުހައްމަދު ގޯލެއް ޖަހައި، އެ ޓީމަށް އުންމީދެއް ހޯދައިދިނެވެ. އަނެއްކާ ވެސް ގައިސާން އިތުރު ގޯލެއް ޖަހައި، އޭނާގެ ހެޓްރިކް ފުރިހަމަކޮށް، ގާފަރަށް ދެ ގޯލުގެ ލީޑެއް ނަގައިދިނެވެ. ހިތްވަރު އެލުވާނުލައި، ހިންނަވަރުން ކުރި މަސައްކަތުގެ ނަތީޖާ ރަނގަޅެވެ. އެ ޓީމުން ވަނީ ފަހު ހަތް މިނިޓް ތެރޭ ދެ ގޯލު ޖަހައި އެއްވަރުކޮށްފަ އެވެ. އެ ގޮތުން ގޯލުުތައް ޖެހީ އަވީން އާއި އަބްދުﷲ ނަފާޒް އެވެ. މެޗުގެ މޮޅު ކުޅުންތެރިއަކީ ގާފަރު ޓީމަށް ހެޓްރިކެއް ހަދައިދިން ގައިސާން އެވެ.
މާމިގިލިން ކުޅުނު މެޗު ފަށައިގެން ފުރަތަމަ މިނިޓް ތެރޭ އެ ޓީމުގެ ހައިޝަމް އަރީފް (ހައި) ވަނީ ގޯލެއް ޖަހައި ލީޑުނަގައިފަ އެވެ. މާގިނައިރެއްނުވެ، މެޗުގެ ތިން ވަނަ މިނިޓްގައި ދިއްގަރުގެ އަހުމަދު މިދުހަތު މަހުމޫދު ވަނީ ގޯލެއް ޖަހައި އެއްވަރުކޮށްފަ އެވެ. މެޗުގެ ހަތަރު ވަނަ މިނިޓްގައި ހިސާމް ސަލީމް (ކޮކީ) ވަނީ ގޯލެއް ޖަހައި، އަނެއްކާ ވެސް މާމިގިއްޔަށް ދެ ވަަނަ ފަހަރަށް ލީޑުނަގައިދިނެވެ. އަދި އޭގެ ތިން މިނިޓް ފަހުން ކޮކީ ވަނީ އިތުރު ގޯލެއް ޖަހައި މާމިިގިއްޔަށް ލީޑުފުޅާކޮށްދީފަ އެވެ.
ދިއްގަރުން ނަތީޖާ ހަމަހަމަކުރީ މެޗުގެ ފަހު ހާފުގެ ވެސް ފަހު ވަގުތުގަ އެވެ. އެ ޓީމަށް މެޗުގެ 31 ވަަނަ މިނިޓްގައި މިދުހަތު ދެ ވަނަ ގޯލެއް ޖަހައިދީ އުންމީދެއް ހޯދައިދިނެވެ. މެޗުގެ ފަހު މިނިޓް ތެރޭ ދިއްގަރަށް އެއްވަރުކޮށްދިނީ އެ ޓީމުގެ ކެޕްޓަން އިބްރާހިމް ރިއްފަތު އެވެ. ހާފުގެ މެދެއްހާ ހިސާބުން މާމިގިލީ ކުޅުންތެރިންގެ ތެރެއިން މިދުހަތު ފޮނުވާލި ބޯޅަ އަމާޒުވީ ގޯލުގެ ކަނަށެވެ.
ޒޯނުތަކުގައި ވާދަކުރާ ޓީމުތައް
ޒޯން 1
ގްރޫޕް އޭ: ށ. ކަނޑިތީމް (އަތޮޅު ޗެމްޕިއަން)، ހއ. ހޯރަފުށި، ހދ. ވައިކަރަދޫ، ގްރޫޕް ބީ: ށ. މިލަންދޫ، ހދ. ނައިވައިދޫ (އަތޮޅު ޗެމްޕިއަން)، ހއ. އިހަވަންދޫ (އަތޮޅު ޗެމްޕިއަން)
ޒޯން 2:
ރ. ދުވާފަރު (އަތޮޅު ޗެމްޕިއަން)، ބ. އޭދަފުށި (އަތޮޅު ޗެމްޕިއަން)، ނ. ކުޑަފަރި
ޒޯން 3:
ކ. ކާށިދޫ، ކ. ގާފަރު (އަތޮޅު ޗެމްޕިއަން)، ޅ. ހިންނަވަރު (އަތޮޅު ޗެމްޕިއަން)، އއ. މަތިވެރި (އަތޮޅު ޗެމްޕިއަން)
ޒޯން 4:
އދ. އޮމަދޫ، އދ. މާމިގިލި (އަތޮޅު ޗެމްޕިއަން)، މ. ދިއްގަރު، މ. މުލައް (އަތޮޅު ޗެމްޕިއަން)
ޒޯން 5:
ދ. ކުޑަހުވަދޫ (އަތޮޅު ޗެމްޕިއަން)، ފ. ބިލެއްދޫ (އަތޮޅު ޗެމްޕިއަން)، ތ. އޮމަދޫ، ތ. ތިމަރަފުށި (އަތޮޅު ޗެމްޕިއަން - އެންމެ ފަހުގެ މުބާރާތުގެ ޗެމްޕިއަން)
ޒޯން 6:
ލ. ގަން (އަތޮޅު ޗެމްޕިއަން)، ގދ. ވާދޫ (އަތޮޅު ޗެމްޕިއަން)، ގއ. މާމެންދޫ (އަތޮޅު ޗެމްޕިއަން)، ގއ. ކޮނޑޭ
ޒޯން 7:
ސ. ފޭދޫ، މާލެގަން
ޒޯން 8:
މާފަންނު، ވިލިމާލެ، ހުޅުމާލެ، ހެންވޭރު
ކޮންމެ ޒޯނަކުން ވެސް އެއް ވަނަ ދެ ވަނަ ޓީމު ގަދަ 16 ޓީމު ވާދަކުރާ ބުރަށް ކޮލިފައިވާނެ އެވެ.
މުބާރާތުގައި މިރޭ ވެސް ހަ މެޗެއް ކުޅޭ ގޮތަށް ވަނީ ހަމަޖެހިފަ އެވެ. އެ ގޮތުން 20:15 ގައި ފަށާނީ ލ. ގަމާއި ގދ. ވާދޫގެ މެޗާއި ރ. ދުވާފަރާއި ބ. އޭދަފުށި މެޗެވެ. އޭގެ ގަޑިއިރެއް ފަހުން، 21:15 ގައި ސ. ފޭދޫ އާއި ޏ. ފުވައްމުލަކު މާލެގަން ކުޅޭ މެޗާއި ގއ. މާމެންދޫ އާއި ގއ. ކޮނޑޭ ކުޅޭ މެޗު ފަށާނެ އެވެ. އަދި 23:15 ގައި ތ. ތިމަރަފުށްޓާއި އޮމަދޫ ކުޅޭ މެޗާއި ދ. ކުޑަހުވަދޫ އާއި ފ.ބިލެއްދޫގެ މެޗު ކުޅޭނެ އެވެ.
