ސަރުކާރުން ކުޅިވަރުގެ އިންފްރާސްޓްރަކްޗާ ޑިވެލޮޕްކުރަން ކުރާ މަސައްކަތުގެ ތެރެއިން ރަށްރަށުގައި ގާއިމްކުރާ ވޮލީކޯޓުތަކުގެ ތެރެއިން އއ. މަތިވެރީގައި އެޅި ވޮލީ ކޯޓު ރަސްމީކޮށް އިއްޔެ ހުޅުވައިފި އެވެ.
އިއްޔެ ހަވީރު މަތިވެރި ވޮލީ ކޯޓު ހުޅުވުމުގެ ގޮތުން ބޭއްވި ހާއްސަ އިވެންޓްގައި ކުޅިވަރާ ބެހޭ ވަޒީރު އަހުމަދު މަހުލޫފްގެ އިތުރުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުހައްމަދު ރަނޭޝް (ރަނޭ) އަދި ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު ބައިވެރިވެވަޑައިގެންނެވި އެވެ..
މި އިވެންޓްގައި ވާހަަކަ ދައްކަވަމުން މިނިސްޓަރު މަހުލޫފް ވިދާޅުވީ ސަރުކާރުން ކުޅިވަރުގެ އިންފްރާސްޓްރަކްޗާ އަށް ހާއްސަ އަހައްމިއްޔަތުކަމެއް ދީގެން ކުރެވޭ މަސައްކަތުގައި ރަށްރަށުގައި ރަނގަޅު ފެންވަރުގެ ގިނަ ވޮލީ ކޯޓުތަކެއް އެޅުމުގެ ވިސްނުން އެބަހުރި ކަމަށެވެ. އެ ގޮތުން މިހާތަނަށް ވެސް ބައެއް ރަށްރަށުގައި ވޮލީ ކޯޓުތައް އަޅާފައިވާއިރު، ކުރިއަށް އޮތްތަނުގައި އިތުރު 50 ރަށެއްގައި ވޮލީ ކޯޓުތައް އަޅާނެ ކަމަށް މިނިސްޓަރު ވިދާޅުވި އެވެ.
ވީއޭއެމްގެ ރައީސް ރަނޭޝް ވިދާޅުވީ، ސަރުކާރުން ވޮލީބޯޅަ ކުރިއަރުވަން ކުރާ މަސައްކަތުގައި ގާއިމްކުރާ ވޮލީ ކޯޓުތަކުގައި ވީއޭއެމްގެ ހަރަކާތްތައް ކުރިއަށް ގެންގޮސް މުޅި ކުޅިވަރު ކުރިއަރުވަން ފަސޭހަތަކެއް ވެގެންދާނެ ކަމަށެވެ.
ރާއްޖޭގެ އަތޮޅުތަކަށް ހާއްސަ ރާއްޖެ އެޓޯލް ވޮލީބޯލް ޗެމްޕިއަންޝިޕްގެ މެޗުތައް މިހާރު ފެށިގެން ކުރިއަށްދާއިރު ކުރިއަށް އޮތްތަނުގައި އެ މުބާރާތުގެ މެޗުތައް ރަނގަޅު ފެންވަރުގެ ވޮލީ ކޯޓުތަކުގައި ކުޅެވޭ ގޮތްވުމަކީ އެ މުބާރާތުގެ ފެންވަރު ރަނގަޅުވުމަށް ފަހިވާނެ ފުރުސަތެއް ކަމަށް މީގެ ކުރިން ވީއޭއެމްގެ ރައީސް ރަނޭޝް "އަދަދު" އަށް ދެއްވި އިންޓަވިއުއެއްގައި ވަނީ ވިދާޅުވެފަ އެވެ.
މަތިވެރި ވޮލީ ކޯޓު ހުޅުވުމަށްފަހު ވަނީ ގައުމީ ސީނިއާ އަންހެން ވޮލީބޯޅަ ޓީމާއި މަތިވެރި ޓީމުގެ މެޗެއް ކުޅެފަ އެވެ. މި މެޗު ސީދާ ތިން ސެޓުން ކާމިޔާބުކުރި ގައުމީ އަންހެން ވޮލީ ޓީމެވެ. އޭގެ އިތުުރުން ރޭ ވަނީ ވެޓަރަންސް ވޮލީބޯޅަ މެޗެއް ވެސް ކުޅެފަ އެވެ. މި މެޗުގައި މިނިސްޓަރު މަހުލޫފް ވެސް ބައިވެރިވެވަޑައިގެންނެވި އެވެ.
މީގެ ކުރިން ސަރުކާރުން ވަނީ ރ. ކިނޮޅަހާއި އދ. ދިއްދޫގައި އައުޓް ޑޯ ވޮލީ ކޯޓް އަޅައިފަ އެވެ.
