ލިވަޕޫލް (މާޗް 12) - މިސްރު ފޯވާޑް މުހައްމަދު ސަލާހު، ލިވަޕޫލާ އެކު ހަދާފައިވާ ކޮންޓްރެކްޓް އާ ކުރުމާ ބެހޭގޮތުން ގޮތެއް ނިންމަން ޖެހޭނީ އޭނާ އަމިއްލަ އަށް ކަމަށް އެ ޓީމުގެ ކޯޗު ޔާގެން ކްލޮޕް ބުނެފި އެވެ.
ސަލާހު، 29، ލިވަޕޫލާ އެކު ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ސަލާހު ލިވަޕޫލްގައި މަޑުކުރަން ބޭނުންވި ނަމަވެސް އެއްބަސްނުވެވި އޮތީ މުސާރައަކާ މެދުގަ އެވެ.
ރިޕޯޓްތައް ބުނާގޮތުން ސަލާހު ލިވަޕޫލްގައި މަޑުކުރަން ކިޔާ މުސާރަ އުޅެނީ ހަފްތާ އަކު 450،000 ޑޮލަރަށް ވުރެ މަތީގަ އެވެ. ލިވަޕޫލުން އެ އަގު ދޭނަަމަ އެ ކްލަބްގެ މުސާރަ ޕޮލިސީ އަށް ބޮޑު ބަދަލެއް ގެންނަން ޖެހޭނެ އެވެ. އެހެންވެ، ލިވަޕޫލުން ހުށަހަޅާފައިވަނީ އެ ކްލަބުން ގެންގުޅޭ މުސާރައިގެ އޮނިގަނޑަށް ފެތޭ ގޮތަށް 30 އަހަރުގެ ކުޅުންތެރިއަކަށް ދެވޭނެ އެންމެ ބޮޑު މުސާރަ ސަލާހު އަށް ދޭށެވެ. އެއީ ހަފްތާ އަކު 380،000 ޑޮލަރު ލިބޭ ގޮތަށެވެ. އެކަމަކު، ސަލާހާއި އޭނާގެ އޭޖެންޓް ރެމީ އައްބާސް އެ ހުށަހެޅުމާ މެދު ހިތްހަމައެއްނުޖެހެ އެވެ.
ޕްރިމިއާ ލީގުގައި މި ހަފްތާގެ މެޗުތަކުގެ ކުރިން އޮތް ނޫސްވެރިންގެ ބައްދަލުވުމުގައި ކްލޮޕް ގާތުގައި ސަލާހުގެ މުސްތަގުބަލާ ބެހޭގޮތުން ސުވާލުކުރުމުން ބުނީ މި ވަގުތު ހާލަތު އޮތީ މަޝްވަރާގެ މޭޒުގައި ކަމަށެވެ. އަދި އެއްވެސް ވަރަކަށް ކްލަބުން ވެސް އަދި ސަލާހު ވެސް މިކަން ވަކި މިސްރާބަކަށް ގެންދަން ބޭނުންވެގެން ނޫޅޭ ކަމަށް ކްލޮޕް ވަނީ ބުނެފަ އެވެ.
"މީގެ އޮތީ ސަލާހު ނިންމާ ނިންމުމެއް. ކްލަބްގައި ނުހުންނާނަމެކޭ އެއް ނުބުނޭ، އެހެންވީމަ އެއީ ރަނގަޅެއް. މޯ (ސަލާހު) އެބަ ބޭނުންވޭ މި ކްލަބް ކުރިއަރައިގެންދާން. އެ ވިސްނުމުގައި ބަލާއިރު، ކްލަބުން ބޭނުންވާ ކަންކަން ސަލާހަށް ވެސް އެނގޭނެ. އެހެންވީމަ މީގެ އަވަސް އަރުވާލައިގެން އުޅެން ޖެހޭ ކަމެއް އޮތް ކަމަކަށް ނުދެކެން،" ކްލޮޕް ބުންޏެވެ.
ކްލޮޕްގެ މި ވާހަކަތައް މީޑިއާގައި ދައުރުވާން ފެށުމާ އެކު ސަލާހުގެ އޭޖެންޓް ރެމީ އައްބާސް ވަނީ ޓްވިޓާގައި ސަމާސާ މިޒާޖަކަށް ޓްވީޓެއްކޮށްފަ އެވެ. އިނގިރޭސި ނޫސްތަކުން ރިޕޯޓްކުރާގޮތުގައި ރެމީ އައްބާސްގެ މި ޓްވީޓާ އެކު ދޭހަަވަނީ ސަލާހުގެ ފަރާތުން އޮތް ހުށަހެޅުމަށް ލިވަޕޫލުން އެއްބަސްނުވެއްޖެނަމަ އޭނާ ކްލަބް ދޫކޮށްލުމުގެ ފުރުސަތު އޮތް ކަމެވެ.
ރޯމާ ދޫކޮށް 2017 ވަނަ އަހަރު 40 މިލިއަން ޑޮލަރަށް ލިވަޕޫލަށް ބަދަލުވި ސަލާހަކީ ފާއިތުވި ސީޒަންތަކުގައި ލިވަޕޫލްގެ އެޓޭކްގެ މައި ކުޅުންތެރިޔާ އެވެ. ލިވަޕޫލަށް ކުޅުނު 237 މެޗުން ސަލާހު ވަނީ 152 ގޯލު ޖަހައި، ކްލަބްގެ ގިނަ ރެކޯޑްތަކެއް މުގުރާލައިފަ އެވެ. ސަލާހު، މިދިޔަ އޮކްޓޫބަރު މަހު ދިން އިންޓަވިއުއެއްގައި ވަނީ ކެރިއަރު ނިމެންދެން ވެސް ލިވަޕޫލްގައި މަޑުކުރަން ބޭނުންވާ ކަމަށް ބުނެފަ އެވެ. އެކަމަކު، ކޮންޓްރެކްޓްގެ ކަންކަން މިދާގޮތުން ސަލާހު ކައިރި މުސްތަގުބަލެއްގައި ވެސް އެހެން ޓީމަކުން ފެނުމުގެ ފުރުސަތު އެބައޮތެވެ.
