ގައުމީ ބާސްކެޓްބޯޅަ ލީގުގެ އަންހެން ޑިވިޝަންގެ ފަހު މެޗަށް މިރޭ ނުކުންނައިރު، އެންމެ ފަހުގެ ޗެމްޕިއަން ކުއީންސް ބާސްކެޓްބޯލް ކްލަބްގެ މުހިންމު ކުޅުންތެރިންނަށް ވަނީ އަނިޔާގެ މައްސަލަ ކުރިމަތިވެފަ އެވެ.
ގައުމީ ލީގުގެ ފަހު މެޗުގައި ޗެމްޕިއަން ކުއީންސް ނުކުންނާނީ ސައިކްލޯންއާ ދެކޮޅަށެވެ. މި ދެ ޓީމު، ދެ ވަނަ ބުރުގައި ކުޅުނު މެޗުގައި ވާދަވެރި ކުޅުމަކަށްފަހު 64-62 ޕޮއިންޓުން ކާމިޔާބުކުރީ ސައިކްލޯން ބީސީ އެވެ.
ފަހު މެޗަށް ނުކުންނައިރު ކުއީންސްގެ އެންމެ މުހިންމު ދެ ކުޅުންތެރިންކަމަށްވާ އާމިނަތު ޝިއުރާ އަބްދުލްބާރީ އާއި ހައުމާ އުބެއިދުﷲ (ހައު) ހުރީ އަނިޔާގަ އެވެ. ހައު އަށް މި މެޗުގައި ކުޅެވުމުގެ ފުރުސަތު އޮތް ނަމަވެސް ޝިއުރާ އަށް މި މެޗުގައި ނުކުޅެވޭނެ އެވެ. ޝިއުރާ އަށް ލިބިފައިވާ އަނިޔާގެ ސަބަބުން އޭނާ އަށް ގައުމީ ލީގަށް ފަހު ފަށާ ގައުމީ މުބާރާތުގައި ވެސް ކުޅެވުމުގެ ފުރުސަތު ކުޑަ އެވެ.
މި ދެ ކުޅުންތެރިންނާ އެކު އެންމެ ފަހުން ކުޅުނު ތިން މެޗަށް ބަލާއިރު ވެސް ކުއީންސް މެޗުތަކުން މޮޅުވެފައިވަނީ ހަނި ފަރަގަކުންނެވެ.
ޓީމުގެ އެންމެ މުހިންމު ދެ ކުޅުންތެރިންނަށް މި މެޗުގައި ނުކުޅެވޭއިރު ދެން އެ ޓީމުގެ އެންމެ ފާހަގަކޮށްލެވޭ އެއް ކުޅުންތެރިޔާ ރައިފާ އިބްރާހިމް، އުމްރާގެ އަޅުކަން އަދާކުރުމަށް ގޮސް ހުރުމާ އެކު އޭނާ މި މެޗުގައި ނުފެންނާނެ އެވެ. ރައިފާ އެނބުރި ޓީމާއި ގުޅޭނެކަމަށް ބެލެވެނީ ގައުމީ މުބާރާތުގަ އެވެ.
ފަހު މެޗަށް ނުކުންނައިރު ސައިކްލޯން އޮތީ ރަނގަޅު ފޯމެއްގަ އެވެ. އެ ޓީމުގެ ބިދޭސީ ކުޅުންތެރިޔާ، އަނާ ބޮރޮންޔަކް މުޅި މުބާރާތުގައި ވެސް ތަފާތު މޮޅު ކުޅުމެއް ދައްކަމުން އަންނައިރު، ޝައިލާން އަފްޒަލް އާއި މަރިޔަމް ސޮފްވާ ހަސަން ވެސް އަންނަނީ ޓީމުގައި މުހިންމު ދައުރެއް އަދާ ކުރަމުންނެވެ.
މީގެ އިތުރުން ތަޖުރިބާކާރު ކުޅުންތެރިޔާ ހުސްނާ މުހައްމަދު (ހުސީ)ގެ ކުޅުން ވެސް ފާހަގަކޮށްލަން ޖެހެ އެވެ.
މިހާތަނަށް އަންހެން ޑިވިޝަންގައި ކުޅުނު މެޗުތަކަށް ބަލާއިރު، ސައިކްލޯން ބީސީ އަށް އެންމެ ރަނގަޅު ފައިޓެއް ދިން ޓީމަކީ ކުއީންސް އެވެ. ކުއީންސް އަށް ދިމާވެފައިވާ މައްސަލަތަކާ އެކު އެ ޓީމަށް ގައުމީ ލީގު ދިފާއުކުރުމަކީ ބޮޑު ޗެލެންޖަކަށް ވާނެ އެވެ. ޒުވާނުންގެ މަރުކަޒު އެތެެރެ ކޯޓުގައި މިރޭ ކުޅޭ މެޗު ފަށާނީ 21:30ގަ އެވެ.
