މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގައި ރޭ ކުޅުނު މެޗުތަކުން މޮޅުވެ، މ. މުލަކާއި ޅ. ހިންނަވަރު އަދި އދ. މާމިގިލިން އަތޮޅު ޗެމްޕިއަންކަން ހޯދައިފި އެވެ.
އދ. އަތޮޅު ފައިނަލުގައި މާމިގިލިން އޮމަދޫ ބަލިކުރީ 4-2 އިންނެވެ. މ. އަތޮޅު ފައިނަލުގައި ދިއްގަރުގެ މައްޗަށް މުލައް ކުރިހޯދީ 2-0 އިންނެވެ. އަދި ހިންނަވަރުން ޅ އަތޮޅުގެ ތަށި އުފުލާލީ ކުރެންދޫ އަތުން 3-1 އިން މޮޅުވެގެންނެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި މާމިގިލި ޓީމުން އޮމަދޫ ކޮޅަށް މޮޅު ކުޅުމެއް ދެއްކި އެވެ. މުޅި މެޗަށް ބަލާއިރު ވެސް ކޮންޓްރޯލް ނަގައިގެން މާމިގިލިން ކުޅެން މަސައްކަތް ކުރީ އޮމަދޫ އަށް ޖާގައެއްނުދީ އެވެ. މާމިގިލީގެ ގޯލުތައް ޖެހީ މުހައްމަދު އަތީފް، މޫސާ ހަސަން ފުޅު، ހައިޝަމް އަރީފް އަދި ޕެނަލްޓީ އަކުން އަހުމަދު ނިޒާމް (ނިޒާމްބެ) އެވެ. އޮމަދޫން ޖެހި ފުރަތަމަ ގޯލަކީ މާމިގިލީގެ އިސްމާއިލް ސައިފް އަތުން ބައިކޮޅަށް ވަން ގޯލެކެވެ. އަނެއް ގޯލު ޖެހީ އޮމަދޫގެ އަލީ އަޒުމީ އެވެ.
އދ އަތޮޅުގެ މޮޅު ކުޅުންތެރިޔާ އާއި އެންމެ ގިނަ ގޯލު ޖެހި ކުޅުންތެރިއަކަށް ހޮވުނީ މާމިގިލި ޓީމުގެ ހައިޝަމް އެވެ.
ޅ. އަތޮޅުން ބައިވެރިވެފައިވަނީ ދެ ރަށް ކަމަށްވާތީ ދެ ރަށުގެ ދެ މެދުގައި ކުޅެން ނިންމީ ދެ މެޗެވެ. ފުރަތަމަ މެޗުގައި ހިންނަވަރާއި ކުރެންދޫ ލަނޑެއް ނުޖެހިވީ އެއްވަރެވެ. އެހެންވެ، ރޭގެ މެޗުން މޮޅުވާ ޓީމަކަށް ޗެމްޕިއަންކަން ލިބުމުގެ ފުރުސަތު އޮތީ ފަހިވެފަ އެވެ. ހިންނަވަރުގެ ގޯލުތައް ޖެހީ ހުސެއިން މުހައްމަދު، އަލީ އަކްރަމް އަދި ހުސެއިން އައްފާޝް އެވެ. ކުރެންދޫގެ ހަމައެކަނި ގޯލު ޖެހީ މުހައްމަދު ރަފްހާން އަބްދުލް ގަނީ އެވެ.
މުބާރާތުގެ ގަވާއިދުގައިވާ ގޮތުން އެއް ކުޅުންތެރިއަކަށް ވުރެ ގިނަ ކުޅުންތެރިން ގޯލުގެ ގޮތުން އެއްވަރުވެއްޖެނަަމަ އެ މަގާމު ލިބޭނީ ގިނަ މެޗުގައި މޮޅު ކުޅުންތެރިއާގެ މަގާމު ހޯދި ކުޅުންތެރިއަކަށެވެ. މި ގޮތަށް ބަލާއިރު، އެއް ކުޅުންތެރިއަކަށް ވުރެ ގިނަ ކުޅުންތެރިންނަށް ލިބޭނަމަ ހުރިހާ ކުޅުންތެރިންނަށް ޓްރޮފީ ދޭނެ އެވެ. އެހެންވެ، ރޭ ހިންނަވަރާއި ކުރެންދޫ ކުޅުނު މެޗުގައި ގޯލު ޖެހި ކޮންމެ ކުޅުންތެރިއަށް އެންމެ ގިނަ ގޯލު ޖެހި ކުޅުންތެރިޔާގެ ޓްރޮފީ ލިބުނެވެ. އެންމެ މޮޅު ކުޅުންތެރިއަކީ ހިންނަވަރުގެ ކީޕަރު ފިރްދައުސް އިބްރާހިމް ދީދީ އެވެ.
ދިއްގަރު އަތުން މުލައް މޮޅުވިއިރު، ގޯލުތައް ޖެހީ ޔަސްފާދު ހަބީބު (މުލަކޭ) އާއި ސުޖުއާން ހުސެއިން އެވެ. މެޗުގެ މޮޅު ކުޅުންތެރިއާގެ މަގާމާއި އަތޮޅުގެ މޮޅު ކުޅުންތެރިއަކީ މުލަކޭ އެވެ. އެންމެ ގިނަ ގޯލު ޖެހީ ދިއްގަރުގެ އަދުހަމް ހަލީލް އެވެ.
ރޭ ދެން ކުޅުނީ ގދ. އަތޮޅުގެ ލީގު ބުރުގެ ފަހު ދެ މެޗެވެ. ގދ. އަތޮޅުގެ ތަށި ވަނީ ފުރަތަމަ ކުޅުނު ހަތަރު މެޗުން މޮޅުވެގެން ވާދޫ އިން ހޯދައިފަ އެވެ. ރޭ ކުޅުނު ދެ މެޗަށް ބަލާއިރު، ގައްދޫ އަތުން ހޯޑެއްދޫ ވަނީ 5-2 އިން މޮޅުވެފަ އެވެ. އަދި ތިނަދޫ އިން ވަނީ މަޑަވެލި އަތުން 8-4 އިން މޮޅުވެފަ އެވެ.
ހޯޑެއްދޫގެ މެޗުގައި އެ ޓީމުގެ ކެޕްޓަން އާދަމް ލަރީފް (ރޮނާ) ވަނީ ދެ ގޯލު ޖަހައި މެޗުގެ މޮޅު ކުޅުންތެރިޔާ އަށް ހޮވިފަ އެވެ. އަނެއް ގޯލުތައް ޖެހީ މުހައްމަދު ފާރިހު ފާއިޒް، ސައިން އަސްލަމް އަދި އަހުމަދު ޝާނިއު އަބްދުލް ގަނީ އެވެ. ގައްދޫގެ ގޯލުތައް ޖެހީ އާލިމް އަބްދުލް އަޒީޒް އާއި އަންނު އަބްދުﷲ އެވެ. ތިނަދޫގެ ހުސެއިން އަލީ ވަނީ މަޑަވެލި ކޮޅަށް ހެޓްރިކެއް ހަދައި މެޗުގެ މޮޅު ކުޅުންތެރިއާގެ މަގާމު ހޯދައިފަ އެވެ. ތިނަދޫގެ އަނެއް ގޯލުތައް ޖެހީ އިބްރާހިމް ސަނޫން، އިބްރާހިމް ހުސެއިން، މުހައްމަދު ޝިމާދު އަދި އަހުމަދު އަބްދުލް އަޒީޒް އެވެ. މަޑަވެލީގެ ގޯލުތައް ޖެހީ ނާއިފް ޝަފީގް، ސަމާހު އަންވަރު، އަބްދުﷲ ހަސަން އަދި މުހައްމަދު ސާއިފް އެވެ.
ގދ. އަތޮޅުގެ އެންމެ ގިނަ ގޯލު ޖެހީ ރޮނާ އެވެ. އެންމެ މޮޅު ކުޅުންތެރިއަކަށް ހޮވުނީ ވާދޫ ޓީމުގެ މުހައްމަދު މުސައްނިފު އެވެ.
