މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގައި ރޭ ކުޅުނު މެޗުތަކަށް ފަހު ގއ އަތޮޅުގެ ފައިނަލުން ކޮނޑޭ އާއި މާމެންދޫ ފުރުސަތު ހޯދައިފި އެވެ.
ރޭ ގއ. އަތޮޅުގެ ދެ ގްރޫޕްގެ ފަހު ހަތަރު މެޗެއް ވަނީ ކުޅެފަ އެވެ. ކޮނޑޭ އާއި ކަނޑުހުޅުދޫ 2-2 އިން އެއްވަރުވިއިރު، މާމެންދޫ އާއި ދާންދޫ މެޗު ވެސް ނިމުނީ 0-0 އިން އެއްވަރުވެގެންނެވެ. ނިލަންދޫ އިން 8-5 އިން ގެމަނަފުށި ބަލިކުރިއިރު، ކޮލަމާފުށި އަތުން ދެއްވަދޫ މޮޅުވީ 6-1 އިންނެވެ.
ގްރޫޕް އޭގެ މެޗުތައް ނިމުނުއިރު ތާވަލުގެ އެއް ވަނަ ކޮނޑޭ އަށް ލިބުނީ ހަތް ޕޮއިންޓާ އެކު އެވެ. ނިލަންދޫ އަށް ހަ ޕޮއިންޓާ އެކު ދެ ވަނަ ލިބުނުއިރު، ތިން ވަނަ އަށް ދިޔަ ކަނޑުހުޅުދޫ އަށް ވަނީ ހަތަރު ޕޮއިންޓް ލިބިފަ އެވެ. ގެމަނަފުށި މުބާރާތް ނިންމާލީ ޕޮއިންޓެއް ނުލިބި އެވެ.
ދެ ވަނަ ގްރޫޕް ދިޔައީ ފޯރިގަދަކޮށެވެ. މާމެންދޫ އެއް ވަނަ ހޯދީ ހަތް ޕޮއިންޓާ އެކު އެވެ. ދާންދޫ ފަސް ޕޮއިންޓާ އެކު ދެ ވަނަ ދިޔައިރު، ދާންދު އަށް ތިން ވަނަ ލިބުނީ ހަތަރު ޕޮއިންޓް ހޯދައިގެންނެވެ. ހަތަރެއްގައި ނިންމާލި ކޮލަމާފުއްޓަށް ޕޮއިންޓެއް ނުލިބެ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގެ 45 ސިކުންތު ތެރޭގައި ކަނޑުހުޅުދޫ އިން ކުރި އެޓޭކެއްގައި އެ ޓީމުގެ އަލީ އަޒްވާން އަބްދުލް އަޒީޒް ވަނީ ގޯލު ޖަހައި އެ ޓީމަށް ލީޑުނަގައިދީފަ އެވެ. ފުރަތަމަ ހާފު އެއްކޮށް ކަނޑުހުޅުދޫ އިން ލީޑުގައި އޮވެ، ރަނގަޅަށް އެޓޭކްކޮށް އިތުރު ގޯލެއް ޖެހޭތޯ މަސައްކަތް ވެސް ކުރި އެވެ. އެކަމަކު، ލީޑުފުޅާކުރުމުގެ މަސައްކަތުގައި ކުރިއެރުމެއް ނުލިބުނެވެ.
ކޮނޑޭ އިން ދެ ވަނަ ހާފް ފެށިގެން މާގިނައިރެއްނުވެ އެއްވަރުކުރި އެވެ. އެޓޭކަށް ދިޔަ ބޯޅައެއްގައި ރަނގަޅު ތަނަށް ހުސްވެ ހުރެ މި ގޯލު ޖެހީ އިނާން އަހުމަދު (ބަޓުކް) އެވެ. ކަނޑުހުޅުދޫ އިން އަލުން ލީޑުނަގަން ކުރި މަސައްކަތް ކާމިޔާބުކުރީ ތަފާތު މޮޅު ގޯލެއް ޖަހައިގެންނެވެ. ކޯނަރު ދަނޑި ކައިރިން އަޒުވާނަށް ލިބުނު ބޯޅަ އޭނާ ވަނީ ކޮނޑޭގެ ކީޕަރަށް އެއްވެސް ފުރުސަތެއް ނުދީ ގޯލުގެ މަތީ ކަނަށް ޖަހައިފަ އެވެ. މިއީ މުބާރާތުގައި ފެނުނު އެންމެ މޮޅު އެއް ގޯލެވެ.
ދެ ވަނަ ފަހަރަށް ނަތީޖާ ހަމަހަމަކުރަން ކޮނޑޭ އިން ތަޖުރިބާގެ ބޭނުންކުރި އެވެ. މި ގޯލު އެ ޓީމަށް ޖަހައިދިނީ ޝިފާޒް އާދިލް (ތުއްތު) އެވެ. ބޯޅަ ކޮންޓްރޯލް ކޮށްލުމަށް ފަހު ތުއްތު ގޯލުގެ ތެރެއަށް ބޯޅަ ފޮނުވާލީ ތިރިތިރިންނެވެ. ކޮނޑޭ ޓީމުގެ ފަސް ފައުލު ހަމަވެގެން މެޗުގެ ފަހު ސިކުންތު ކޮޅުގެ ތެރޭގައި ކަނޑުހުޅުދޫ މޮޅުވާން ދުރު ޕެނަލްޓީއެއް ލިބުނެވެ. އަހުނަފް ޒާހިރު ފޮނުވާލި ބޯޅަ ދިޔައީ ހުރަސްދަނޑިމަތިންނެވެ. މެޗުގެ މޮޅު ކުޅުންތެރިއަކީ އަޒުވާން އެވެ.
މާމެންދޫ އާއި ދާންދޫ ބައްދަލުކުރި މެޗުގައި ހަމަހަމަ ކުޅުމެއް ފެނިގެންދިޔައިރު، މޮޅު ކުޅުންތެރިއަކީ ދާންދޫގެ ގޯލުގައި މޮޅު ކުޅުމެއް ދެއްކި ޔައުގޫބް އަބްދުﷲ އެވެ. ޔައުގޫބަކީ ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރެވެ. އޭނާ އަންނަނީ ފަހަކަށް އައިސް ގޯލްޑަން ފުޓްސަލްގައި ދާންދޫ ކުޅޭ ކޮންމެ މުބާރާތެއްގައި ކަހަލަ ގޮތަކަށް ގޯލު ބަަލަހައްޓަމުންނެވެ.
ނިލަންދޫ އިން ގެމަނަފުށި ބަލިކުރި މެޗުގައި ގިނަ ގޯލުތަކެއް ފެނުނެވެ. ނިލަންދޫ ޓީމުން ޖެހި އަށް ގޯލުގެ ތެެރެއިން ތިން ގޯލު ޖަހައި މުހައްމަދު ޔަމާން ވަނީ ހެޓްރިކެއް ހަދައި، މެޗުގެ މޮޅު ކުޅުންތެރިއަކަށް ހޮވިފަ އެވެ. އަނެއް ގޯލުތައް ޖެހީ ހުސެއިން އިބްރާހިމް، ސަފްވާން ރަމްޒީ، ފަރުހާދު ރަޝީދު އަދި އަބްދުﷲ ޒިހުނީ އެވެ. ގެމަނަފުށީގެ ފަސް ގޯލުގެ ތެރެއިން ހަތަރު ގޯލު ޖެހީ އަލީ ޝާޒް ހަބީބް އެވެ. އަނެއް ގޯލު ޖެހީ މުހައްމަދު އިރުޝަމް އަބްދުﷲ އެވެ.
ކޮލަމާފުށި އަތުން ދެއްވަދޫ މޮޅުވިއިރު ގޯލުތައް ޖެހީ، އަހުމަދު މުއާޒް، ނަސޫހު ރަޝީދު، އަހުމަދު ރާހިލް ރަޝީދު، ލަމާން ޒުހައިރު އަދި މެޗުގެ މޮޅު ކުޅުންތެރިއާ އައިމަން ތައުފީގު ދެ ގޯލެވެ. ކޮލަމާފުށީގެ ހަމައެކަނި ގޯލު ޖެހީ އަބްދުﷲ ވިޝާމް އެވެ.
ގއ. ފައިނަލުގައި ކޮނޑޭ އާއި މާމެންދޫ ކުޅޭ މެޗު އޮންނާނީ މާދަމާރޭ 22:15 ގަ އެވެ.
