މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގައި ރޭ ކުޅުނު ފައިނަލް މެޗުތަކުން، ކ އަތޮޅުގެ ޗެމްޕިއަންކަން ގާފަރު ހޯދިއިރު، ދ އަތޮޅުގެ ތަށި ކުޑަހުވަދޫ އިން އުފުލާލައިފި އެވެ.
ރެެހެންދި އެއް ނަމްބަރު ފުޓްސަލް ދަނޑުގައި ރޭ ކުޅުނު ފައިނަލް މެޗުން ގާފަރުން ކާށިދޫ ބަލިކުރީ ފޯރިގަދަ މެޗަކަށް ފަހު 2-1 އިންނެވެ. ދ އަތޮޅުން ބައިވެރިވީ ކުޑަހުވަދޫ އާއި ބަނޑިދޫ އެވެ. ދެ ޓީމުގެ މެދުގައި ދެ ލެގު ކުޅުނުއިރު، ދެ މެޗުން ވެސް މޮޅުވީ ކުޑަހުވަދޫ އެވެ. ފުރަތަމަ މެޗުން 5-2 އިން މޮޅުވިއިރު، ރޭ ކުރިހޯދީ 5-0 އިންނެވެ.
ކާށިދޫގެ އަކްމަލް (ކ) ބޯޅަ ފޮނުވާލާއިރު، ގާފަރުގެ ކެޕްޓަން ނާއިހު ކައިރީގައި.-- ފޮޓޯ: ޝާބިލް ފޮޓޯސް/ފޭސްބުކް
ގާފަރުން ރޭގެ މެޗު ފަށައިގެން ކާށިދޫ ކައިރިން ގޯލެއް ޖަހަން ކުރި އެޓޭކްތަކުގައި ކުރިއެރުމެއް ހޯދުނީ އެ ޓީމުގެ އެޓޭކްގައި އިސް ރޯލެއް ކުޅުނު ފުޓްސަލްގެ ނަން މަޝްހޫރު ތަރި އަލީ މާއިޝް (މައްޓު) ޖެހި ގޯލުންނެވެ. އެކަމަކު، ފުރަތަމަ ހާފު ނިމުމުގެ ކުރިން ލިބުނު ހަނި ފުރުސަތެއްގައި ކާށިދޫގެ ކެޕްޓަން އަބްދުﷲ ސުޒޭރު ވަނީ ގޯލެއް ޖަހައިފަ އެވެ. ސުޒޭރު ދުރުން ފޮނުވާލި ބޯޅަ ގާފަރު ކީޕަރު ފައްޔާޒު ފަޔާޒް (ފައިއްޓެ) އަށް ނުހިފެހެއްޓި އަމާޒުވީ ގޯލުގެ ދުރު ކަނަށެވެ.
ދެ ވަނަ ހާފުގައި ގާފަރުގެ އަނެއް ގޯލު ޖެހީ މާހިރު އެވެ. މިއީ ރަނގަޅު އެޓޭކެއްގައި ލިބުނު ފުރުސަތުގެ ބޭނުންހިފައިގެން ޖެހި ގޯލެކެވެ. މެޗުގެ ފަހު މިނިޓާ ހަމައަށް ކާށިދޫން ޕްރެޝަރުކޮށް ގޯލެއް ޖެހޭތޯ ބަލަމުންދިޔައިރު، އެ ޓީމުން ނުރައްކާތެރި އެއް ހަމަލާ ފޮނުވާލި އެވެ. ކާށިދޫގެ ހަމަލާއެއްގައި ބޯޅަ މަތިން އައި ވަގުތު ސުޒެއިރު ބޮލުން ޖެހި ބޯޅަ ބޭރުވީ ގޯލުގެ ދަނޑީގައި ޖެހިފަ އެވެ.
ކ އަތޮޅުގެ މޮޅު ކުޅުންތެރިއަކަށް ހޮވުނީ ގާފަރުގެ ކެޕްޓަން ނާއިހު މުފީދު (ނާހް) އެވެ. އެންމެ ގިނަ ގޯލު ޖެހީ 9 ގޯލު ކާމިޔާބުކުރި ސުޒެއިރު އެވެ.
ކުޑަހުވަދޫ ކުޅުންތެރިން ތަށްޓާ އެކު އުފާފާޅުކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ކުޑަހުވަދޫ އިން ޖެހި ފަސް ގޯލުގެ ތެެރެއިން ދެ ގޯލު ޖެހީ މެޗުގެ މޮޅު ކުޅުންތެރިޔާ ޖުމައިލް ޖަމީލް (ޖުމްބެ) އެވެ. އަނެއް ގޯލުތައް ޖެހީ ހާރޫން އިބްރާހިމް (ހާންޑޯ) އާއި އަބްދުﷲ މުގްސިތު އަދި ޝައުކަތު އަމީން އެވެ. ކުޑަހުވަދޫގެ ކޯޗަކީ ގައުމީ ފުޓްސަލް ޓީމުގެ ކޯޗު އަބްދުﷲ ނަސީރު (އަބޯ) އެވެ.
ދ އަތޮޅުގެ މޮޅު ކުޅުންތެރިއަކަށް ހޮވުނީ ކުޑަހުވަދޫގެ ޝައުކަތު އެވެ.
މުބާރާތުގައި މިރޭ ތިން ފައިނަލެއް ކުޅޭނެ އެވެ. އދ އަތޮޅު ފައިނަލުގައި 20:15 ގައި މާމިގިލި ކުޅޭނީ އޮމަދޫއާ އެވެ. އޭގެ ގަޑިިއިރެއް ފަހުން މ އަތޮޅު ފައިނަލުގައި މުލަކާއި ދިއްގަރު ވާދަކުރާއިރު، ހަމަ އެ ވަގުތުގައި ޅ އަތޮޅު ފަހު މެޗުގައި ހިންނަވަރާއި ކުރެންދޫ ބައްދަލުކުރާނެ އެވެ. މިރޭ ފަހުން އޮތީ ގދ އަތޮޅުގެ ދެ މެޗެވެ. ގައްދޫ އާއި ހޯޑެއްދޫ އެއް މެޗުގައި ކުޅޭއިރު އަނެއް މެޗުގައި ބައްދަލުކުރާނީ މަޑަވެއްޔާއި ތިނަދޫ އެވެ.
