މެންޗެސްޓާ (މާޗް 9) - ޗެމްޕިއަންސް ލީގުގެ ގަދަ16 ގެ ދެ ވަނަ ލެގުގައި މިރޭ ސްޕޯޓިން ލިސްބަންއާ ދެކޮޅަށް މެންޗެސްޓާ ސިޓީ ނުކުންނައިރު، ފުރަތަމަ ލެގުގައި ބޮޑު ތަފާތަކުން މޮޅުވެފައި އޮތަސް ދުލެއް ދޭން ބޭނުންނުވާ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
މިދިޔަ މަހު ސްޕޯޓިން ލިސްބަންގެ ދަނޑުގައި ކުޅުނު ފުރަތަމަ ލެގުން ސިޓީ މޮޅުވީ 5-0 އިންނެވެ.
ފަސް ލަނޑުގެ ތަފާތަކުން ފުރަތަމަ ލެގުގައި މޮޅުވެފައިވާ ޓީމެއް، ޗެމްޕިއަންސް ލީގުން މިހާތަނަށް ކަޓާފައެއް ނުވެ އެވެ. އެކަމަކު، ގާޑިއޯލާ ބުނީ މި މެޗުގައި އެއްވެސް ދުލެއް ދިނުމުގެ ވިސްނުމެއްގައެއް ނޫނެވެ.
"ފުޓްބޯޅައިގައި ވާނެގޮތެއް ނޭނގޭނެ ބުނާކަށް. ރަތްކާޑު ނުވަތަ އިދިކޮޅަށް ކުޅޭ ޓީމުގެ ފެންވަރު ރަނގަޅުވެެން، މެޗެއްގެ ނަތީޖާ ބަދަލުވެދާނެ. އެހެންވެ މިރޭގެ މެޗަށް ނެރޭނީ އެންމެ ވަރުގަދަ ޓީމު،" ގާޑިއޯލާ ބުންޏެވެ.
އެކަމަކު މި މެޗަށް ނުކުންނައިރު ސިޓީގެ ޑިފެންޑަރުންނަށް ސަސްޕެންޝަނާއި ފިޓްނަސްގެ މައްސަލަތައް ދިމާވެ، ގާޑިއޯލާ ވަނީ ފިކުރުބޮޑުވެފަ އެވެ. ކައިލް ވޯކާ މި މެޗަށް ސަސްޕެންޑްވެފައި ހުރިއިރު، ޖައޯ ކަންސެލޯ އާއި ރުބެން ޑިއާސް އަދި ނޭތަން އާކޭ އަށް އަނިޔާގެ ސަބަބުން މިރޭގެ މެޗުގައި ނުކުޅެވޭނެ އެވެ.
ގާޑިއޯލާ ބުނީ ސިޓީގެ ސްކޮޑުގައި މި ވަގުތު ފިޓުކޮށް ތިބި 14 ކުޅުންތެރިން ތެރޭގައި ހިމެނެނީ ތިން ޑިފެންޑަރުން ކަމަށެވެ.
އެހެންކަމުން، މިރޭގެ މެޗުގައި ޔޫކްރޭންގެ ޑިފެންޑަރު އޮލެކްސަންދާ ޒިންޗެންކޯ ފެނުމުގެ ފުރުސަތު އެބައޮތެވެ. ސިޓީގެ އިއްތިހާދު ސްޓޭޑިއަމްގައި ސްޕޯޓިންއާ ދެކޮޅަށް މިރޭ ކުޅޭ މެޗު ފަށާނީ ރާއްޖެ ގަޑިން 1 ޖަހާއިރު އެވެ.
