ލިވަޕޫލް (މާޗް 8) - ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ދެ ވަނަ ލެގުގައި މިރޭ އިންޓަ މިލާނުން ލިވަޕޫލާ ދެކޮޅަށް ކުޅޭ މެޗަށް އަންނަނީ ޓޫރިސްޓުންގެ ވިސްނުމުގައެއް ނޫން ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ފުރަތަމަ ލެގުގައި އިންޓަ ދަނޑުގައި ލިވަޕޫލް ވަނީ 2-0 އިން މޮޅުވެފަ އެވެ. މިރޭ އަމިއްލަ ދަނޑުގައި އެއްވަރުކޮށްލައިގެން ވެސް ލިވަޕޫލަށް ކުއާޓާ ފައިނަލުގެ ޖާގަ ހޯދޭނެ އެވެ. އެކަމަކު، މިއީ ލިވަޕޫލުން އަމިއްލަ ދަނޑުގައި ކުޅުނު ކަމުގައި ވިޔަސް ފަސޭހަކޮށްލެވޭނެ މެޗެއް ނޫން ކަމަށް ކްލޮޕް ވަނީ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ބުނެފަ އެވެ.
"މީގެ ވާންޖެހޭ ގޮތް އެންމެނަށް ވެސް އެބަ އެނގޭ. ސްކޯ އަކީ 2-0. އަހަރެންގެ ނަޒަރުގައި އެ ނަތީޖާ އަކީ ފުޓްބޯޅައިގެ ތާރީހަށް ބެލިޔަސް އެންމެ ގިނައިން އަނބުރާލާފައިވާ ސްކޯ. އެހެންވީމަ މިއީ ނިމިފައި އޮތް ކަމަށް ދެކިގެން އަހަރެމެންނަށް ނުތިބެވޭނެ،" ކްލޮޕް ބުންޏެވެ.
"އިންޓަ އަކީ ވަރުގަދަ ޓީމެއް. ވަރަށް ބެލެންސް ކުޅުންތެރިން ތިބި ޓީމެއް. ޔަގީނުން ވެސް މި މެޗަށް އިންޓަ އަންނަނީ ޓޫރިސްޓުންގެ ވިސްނުމުގައެއް ނޫން. އަނެއް ބުރަށް ދެވޭތޯ ފައިޓްކުރަން،"
އިންޓަ އިން މި ހަފްތާގައި އިޓާލިއަން ލީގުގައި ކުޅުނު މެޗުން ވަނީ 5-0 އިން ސެލަނިޓާނާ ބަލިކޮށްފަ އެވެ. ކްލޮޕް ދެކޭގޮތުގައި އެއީ އިންޓަ ކުޅުންތެރިންގެ ކޮންފިޑެންސް ރަނގަޅުވާނެ ސަބަބެކެވެ.
މިރޭގެ މެޗުގެ ކުރިން ލިވަޕޫލަށް ލިބޭނެ އެންމެ ބޮޑު ހިތްހަމަޖެހުމަކީ އަނިޔާގެ ސަބަބުން ކުޅުމާ ދުރުގައި ހުރި މުހިންމު ތިން ކުޅުންތެރިން ޓީމުގެ ޕްރެކްޓިހުގައި ބައިވެރިވާން ފަށާފައިވުމެވެ. އެ ތިން ކުޅުންތެރިންނަކީ ޖޮއެލް މަޓިޕާއި ތިއާގޯ އަލްކަންޓާރާ އަދި ރޮބާޓޯ ފިރްމީނޯ އެވެ.
ލިވަޕޫލާއި އިންޓަ މިލާން މެޗު ފަށާނީ މިރޭ ރާއްޖެ ގަޑިން ދަންވަރު 1 ޖަހާއިރު އެވެ. ހަމަ އެ ވަގުތު ބަޔާން މިއުނިކް ދަނޑުގައި އޮސްޓްރިއާގެ ރެޑްބުލް ސަލްޒްބާގާ ކުޅޭނެ އެވެ. ސަލްޒްބާގް ދަނޑުގައި ކުޅުނު ފުރަތަމަ ލެގުގެ މެޗު ނިމުނީ 1-1 އިން އެއްވަރުވެގެންނެވެ.
