ލިޔޯން, ފްރާންސް (މާޗް 8) - މީގެ ހަފްތާއެއްހާ ދުވަސް ކުރިން ޔޫކްރެއިންގެ ސިޓީ އޮޑެސާގައި ދިރިއުޅެމުންދިޔަ ޓެނިސް ކުޅުންތެރިޔާ ޑަޔާނާ ޔަސްޓްރެމްސްކާ ބޮމުގެ ހަމަލާތަކުން ސަލާމަތްވެ، ފްރާންސަށް އައިސް ލިޔޯން އޯޕަން ޓެނިސް މުބާރާތުގައި ވާދަކޮށް ރަނަރަޕަށް ދިއުމުން ލިބުނު ފައިސާ ޔޫކްރެއިންގެ ހަނގުރާމައިގައި އެހީއަށް ބޭނުންވާ ފަރާތްތަކަށް ހަދިޔާކުރަން ނިންމައިފި އެވެ.
ދުނިޔޭގެ 140 ވަނައިގައި އޮތް ޑަޔާނާ ފައިނަލުގައި ބަލިވީ ޗައިނާގެ ޒޭންގާ ވާދަކޮށް 3-6, 6-3, 6-4 އިންނެވެ. ޒޭންގް އަކީ ދުނިޔޭގެ ރޭންކިންގެ 64 ވަނައިގައި އޮތް ކުޅުންތެރިއެކެވެ. ރަނަރަޕަށް ދިއުމުން ޑަޔާނާ އަށް ފައިސާގެ އިނާމުގެ ގޮތުގައި 15،700 ޑޮލަރު ލިބުނުއިރު، އޭނާ ވަނީ އެ ޔޫކްރެއިންގެ ހަނގުރާމައިގައި ހާލު ޖެހުނު މީހުންނަށް ހަދިޔާކުރަން ނިންމައިފަ އެވެ.
"އަހަންނަށް މި ލިބުނު ފައިސާ ހަރަދުކުރާނީ ޔޫކްރެއިންގެ ފައުންޑޭޝަނަށް. ޔޫކްރެއިން މީހުން އަހަރެންގެ މި މެޗު ބަލަން ތިބި ނަމަ ބުނެލަން އޮތީ އެންމެ ވާހަކައެއް. ތި މީހުންނަކީއޭ އެންމެ ހިތްވަރުގަދަ ބަޔަކީ. އަހަރެން ވެސް ޔޫކްރެއިނަށްޓަކައި ހަނގުރާމަ ކުރަން ބޭނުމޭ،" އުމުރުން 21 އަހަރުގެ ޑަޔާނާ ބުންޏެވެ.
ޑަޔާނާ، ލިޔޯން އޯޕަންގައި ވާދަކުރަން ފްރާންސަށް އައީ މިދިޔަ ހޮނިހިރު ދުވަހު އެވެ. ފްރާންސަށް އައުމަށް ފަހު އެ ގައުުމުގެ މީޑިއާ އަށް ދިން އިންޓަވިއުއެއްގައި ބުނެފައިވަނީ، ފާއިތުވި ދިުވަސްތަކުގައި ހޭލެވެނީ ދިރިއުޅޭ އެކި ސަރަހައްދުތަކަށް ބޮމުގެ ހަމަލާތީ މިހުންގެ ރުއިމުގެ އަޑުތަކާ އެކު ކަމަށެވެ. ޑަޔާނާ އާއި އޭނާގެ އާއިލާ ކާރު ޕާކު ކުރަން ހުންނަ ތަނެއްގައި ބޮމުގެ ހަމަލާތަކުން ސަލާމަތްވާން ހުންނަން ޖެހުނު ކަމަށް ވެސް އޭނާ ވަނީ ބުނެފަ އެވެ.
ޑަޔާނާ ފްރާންސަށް އައީ ރުމޭނިއާ މަގުންނެވެ. ޑަޔާނާ އާއި އޭނާގެ 15 އަހަރުގެ ކޮއްކޮ، އިވާނާ ބޯޓެއްގައި ރުމޭނިއާ އަށް އައިއިރު، އެ ދެ މީހުންގެ މަންމަ އާއި ބައްޕަ ވަނީ ޔޫކްރެއިންގައި މަޑުކުރަން ނިންމައިފަ އެވެ. ލިޔޯން މުބާރާތަށް ފަހު ޑަޔާނާ އަށް މިހާރު ވަނީ އެމެރިކާގައި ވަރަށް އަވަހަށް ފަށަން ނިންމާފައިވާ އިންޑިއަން ވެލްސް މުބާރާތުގެ ވައިލްޑް ކާޑު ފުރުސަތެއް ލިބިފަ އެވެ.
