ގައުމީ ފިރިހެން ވޮލީބޯޅަ ޓީމުގެ ކޯޗަކަށް ހަމަޖެއްސި ބްރެޒިލްގެ ތަޖުރިބާކާރު ކޯޗު ބްރެޒިލްގެ ސާޖިއޯ ވެލޯސޯ މިއަދު ރާއްޖެ އަތުވެއްޖެ އެވެ.
ގައުމީ ވޮލީ ޓީމަށް ބިދޭސީ ކޯޗަކު މި ހަމަޖެއްސީ 2019 ވަނަ އަހަރުގެ ސައުތު އޭޝިއަން ގޭމްސް އަށް ފަހު ފުރަތަމަ ފަހަރަށެވެ. އޭގެ ފަހުން ޓީމުގެ ކޯޗަކަށް ހުރީ މުހައްމަދު ސާޖިދު (ބޮޑުކާއްޓެ) އެވެ. ގައުމީ ފިިރިހެން ވޮލީބޯޅަ ޓީމަށް މަތީ ފެންވަރުގެ ކޯޗެއް ހަމަޖައްސާފައިވަނީ ވޮލީބޯޅައިގެ ދުނިޔޭގެ ފެޑެރޭޝަން، އެފްއައިވީބީގެ ޓެކްނިކަލް ސަޕޯޓާއި ޔޫތު މިނިސްޓްރީގެ ވަރަށް ބޮޑު އެހީތެރިކަމާ އެކީގަ އެވެ.
ފާއިތުވި ހަތް ވަރަކަށް އަހަރަށް ބަލާއިރު، ވެލޯސޯ އަކީ ގައުމީ ފިރިހެން ޓީމަށް ކޯޗުކޮށްދޭނެ ހަތަރު ވަނަ ބިދޭސީ ކޯޗެވެ. މީގެ ކުރިން ތައިލެންޑްގެ ސުންޓޮން ފޮސީޓާ އާއި ސްރީލަންކާގެ ކޯޗު ސްރީ ލަންކާގެ ކުމާރް ވެންޑަކޫން (ސިސިރާ ކުމާރު) އަދި ސާބިއާގެ މަޝްހޫރު ކޯޗު، މިލޮރަޑް ކިޔާޗް ވަނީ ރާއްޖެ އަށް ކޯޗުކޮށްދީފަ އެވެ.
ވެލޯސޯއާ އެކު ގައުމީ ވޮލީ ޓީމުން މި އަހަރު ބާއްވާ އިންޓަނޭޝަނަލް މުބާރާތްތަކުގައި ވާދަކުރާއިރު، މީގެއިން އެންމެ ހާއްސަވާނެ މުބާރާތަކީ މި އަހަރު ފަހުކޮޅު މާލޭގައި ހޯސްޓްކުރާ ސެންޓްރަލް ޒޯން ވޮލީބޯޅަ މުބާރާތެވެ. އެ މުބާރާތަށް ތައްޔާރުވާން ގައުމީ ޓީމުން މެޗުތަކެއް ކުޅޭނެ ކަމަށް މީގެ ކުރިން ވީއޭއެމުން ވަނީ މައުލޫމާތު ދީފަ އެވެ.
ބަހްރޭން ގައުމީ ވޮލީބޯޅަ ޓީމުގެ ކޯޗަކަށް 2020 ވަނަ އަހަރު ހަމަޖެއްސި ވެލޯސޯ، 54، އަކީ 25 އަހަރަށް ވުރެ ގިނަ މުއްދަތެއްގެ ކޯޗިން ތަޖުރިބާ ހުރި ފަރާތެކެވެ. ބްރެޒިލްގެ މަޝްހޫރު ވޮލީބޯޅަ ކްލަބެއް ކަމަށްވާ މިނިއާސް ޓެނީސް ކްލަބަށް ގިނަ އަހަރުތަކެއް ވަންދެން ކޯޗުކޮށްދިން ވެލޯސޯ ވަނީ އެ ޓީމާ އެކު 57 ބްރެޒިލްގެ ރީޖަނަލް މުބާރާތް ކާމިޔާބުކޮށްފަ އެވެ. އެއީ އުމުރުފުރާ މުބާރާތްތަކާއި ސީނިއާ ވޮލީގެ މުބާރާތްތަކެވެ.
ބްރެޒިލްގެ އުމުރުފުރާ ގައުމީ ޓީމުތަކުގައި އެސިސްޓަންޓް ކޯޗެއްގެ ގޮތުގައި ވެސް މަސައްކަތް ކޮށްފައިވާ ވެލޯސޯ ވަނީ ދުނިޔޭގެ ލެވަލް މުބާރާތްތަކާއި ދެކުނު އެމެރިކާ ބައްރަށް ހާއްސަ މުބާރާތްތަކުގައި ކާމިޔާބީތަކެއް ހޯދައިފަ އެވެ. ބާސެލޯނާގައި 1992 ވަނަ އަހަރު ބޭއްވި އޮލިމްޕިކްސް އަށް ތައްޔާރުވި ބްރެޒިލްގެ އަންހެން ވޮލީބޯޅަ ޓީމަށް ވެސް ވެލޯސޯ ވަނީ އެހީތެރިކަން ފޯރުކޮށްދީފަ އެވެ. އެއީ ވޮލަންޓިއަރު ކޯޗެއްގެ ގޮތުގަ އެވެ.
ފިޒިކަލް އެޑިއުކޭޝަނުން ބެޗަލާސް ޑިގްރީއެއް ހާސިލްކޮށްފައިވާ ވެލޯސޯ އަކީ އެތުލީޓުންގެ އާޓިފިޝަލް އިންޓެލިޖަންސް (އޭއައި) ދެނެގަންނަން އެމެރިކާގައި ހިންގަމުން އަންނަ ޓްރައިއައުޓް ޕްލޭޔާސްގެ ކޯ ފައުންޑަރެކެވެ. ވެލޯސޯ އަކީ ކުޅުންތެރިން ޑިވެލޮޕްކުރުމުގައި ވީޑިއޯ އެނަލައިސިސް އަށް އިސްކަންދޭ ކޯޗެކެވެ. އެމެރިކާގެ ޓޮޕް އެލީޓް އެކެޑަމީގައި ވެސް ކުޅުންތެރިން ތަމްރީން ކުރުމުގެ މަސައްކަތްތަކެއް ކޮށްފައިވާ ވެލޯސޯ އަކީ ބްރެޒިލްގެ ވޮލީބޯޅަ ފެޑެރޭޝަނާ ގުޅިގެން ޑިވެލޮޕްމަންޓްގެ ގިނަ މަސައްކަތްތަކެއް ކުރަމުން އަންނަ ކޯޗެކެވެ.
ރާއްޖޭގެ ގައުމީ ޓީމުތަކަށް ހަމަޖެހިގެން ދިޔައީ މިދިޔަ އަހަރު އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ ވަޑައިގެންނެވި ދަތުރުގައި ކުރެވުނު މަޝްވަރާތަކުގެ ތެރެއިންނެވެ. އަދި ވީއޭއެމްގެ ރައީސް މުހައްމަދު ރަނޭޝް (ރަނޭ) ދާދި ފަހުން ވަނީ އެފްއައިވީބީގެ މައި ހެޑްކުއާޓަރަށް ވަޑައިގަންނަވާ ދިވެހި ވޮލީ އަށް އިތުރު ފުރުސަތުތައް ތަނަަވަސްކުރަން މުހިންމު މަޝްވަރާތަކެއް ކުރިއަށް ގެންގޮސްފަ އެވެ.
އެފްއައިވީބީގެ އެހީތެރިކަމާ އެކު ރާއްޖެ އަށް ވަނީ ދެ އަހަރުގެ ކޯޗިން ޕްރޮގްރާމެއްގެ ތެރެއިން މަތީ ފެންވަރުގެ ބީޗްވޮލީބޯޅަ ކޯޗެއް ލިބިފަ އެވެ. އެއީ ބްރެޒިލްގެ ވިނީޝިއުސް މާޓިން އެވެ. އޭނާގެ ބެލުމުގެ ދަށުން މިިދިޔަ މަހު ސްރީލަންކާގައި ބޭއްވި ސެންޓްރަލް ޒޯން ބީޗްވޮލީބޯޅަ މުބާރާތުގައި ރާއްޖޭން ކުރިއެރުންތަކެއް ހޯދި އެވެ. މިހާރު ބީޗްވޮލީ ޓީމު ތައްޔާރުވަމުން އަންނަނީ މި މަހު ލަންކާގައި ބާއްވާ ކޮމަންވެލްތު ކޮލިފައިން އަށް ތައްޔާރުވުމަށެވެ.
