މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގައި ރޭ ދުވާފަރުން ރ އަތޮޅުގެ ޗެމްޕިއަންކަން ހޯދިއިރު، މާމިގިލިން އދ އަތޮޅުގެ ފައިނަލުން ޖާގަ ޔަގީންކޮށްފި އެވެ.
ދުވާފަރުން ރޭ ވަނީ 3-2 އިން އިނގުރައިދޫ ބަލިކޮށްފަ އެވެ. ރ. އަތޮޅުން ތިން ޓީމު ވާދަކުރާއިރު، ކުޅުނު ދެ މެޗުން ވެސް ދުވާފަރު މޮޅުވުމުން އެ ޓީމަށް ޗެމްޕިއަންކަން ލިބުނީ އެވެ. މި އަތޮޅުގައި ބާކީ އޮތް މެޗަކީ ބުރާސްފަތި ދުވަހުގެރޭ އިންނަމާދޫ އާއި އިނގުރައިދޫ ކުޅޭ މެޗެވެ. އެ މެޗުން ކޮންމެ ނަތީޖާއެއް ނުކުތް ކަމުގައި ވިޔަސް ދުވާފަރާ ހަމަނުކުރެވޭނެތީ އެ ޓީމަށް ވަނީ ތަށި ދީފަ އެވެ.
އާދަމް އިލްޔަސައު ދުވާފަރަށް ލީޑުނަަގައިދީފައިވަނިކޮށް އައިހަމް އަހުމަދު (އައިހު) ވަނީ އިނގުރައިދޫ އަށް އެއްވަރުކޮށްދީފަ އެވެ. އަދި އިތުރު ގޯލެއް ޖަހައި އައިހު އިނގުރައިދޫ އަށް ލީޑުނަގައިދިނެވެ. ގައުމީ ފުޓްސަލް ޓީމުގައި ހިމެނޭ ކުޅުންތެރިންނަށް މި ފަހަރުގެ ގޯލްޑަން ފުޓްސަލް ޗެލެންޖްގައި ނުކުޅެވޭއިރު، އިނގުރައިދޫގެ ތަރި އަލީ ހާފިޒް (ހާއްޕެ) ނުކުޅެ އެވެ.
ދުވާފަރުން ނަތީޖާ އަނބުރާލީ ދެ ވަނަ ހާފުގައި ހިތްވަރުގަދަ ކުޅުމެއް ދައްކައި ދެ ގޯލު ޖަހައިގެންނެވެ. ދުވާފަރުގެ ދެ ގޯލު ޖެހީ އިސްމާއިލް އަހުމަދާއި މުހައްމަދު އިސާމް އެވެ.
ހަންޏާމީދޫގެ ހަސީބް (ކ) ކައިރިން މާމިގިލި ޓީމުގެ ނިޒާމް ބޯޅަ ހިފައިގެންދާން މަސައްކަތްކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
މާމިގިލިން ވަނީ ރޭ ހަންޏާމީދޫއާ ލަނޑެއް ނުޖެހި އެއްވަރުވެފަ އެވެ. މި މެޗުން މޮޅުވާ ޓީމަކަށް އދ. އަތޮޅު ފައިނަލުގެ ޖާގަ ލިބޭގޮތަށް އޮތްއިރު، ދެ ޓީމު އެއްވަރުވުމުން މާމިގިލި ފައިނަލަށް ދިޔައީ ލަނޑުގެ ތަފާތުންނެވެ.
މާދަމާރޭ ކުޅޭ ފައިނަލުގައި މާމިގިލި ކުޅޭނީ އދ. އޮމަދޫއާ އެެވެ. އޮމަދޫ ކުޅުނު ފުރަތަމަ ދެ މެޗުން މޮޅުވެ، ފައިނަލަށް ދިޔައިރު، ރޭ އެ ގްރޫޕްގެ އަނެއް މެޗުގައި އދ. ދަގެނތި ވަނީ 1-0 އިން އދ. ކުނބުރުދޫ ބަލިކޮށްފަ އެވެ. ކުނބުރުދޫގެ ހަސަން މައުރޫފް އެ ޓީމުގެ ގޯލު ޖެހިއިރު، ދަގެނތީގެ ލަނޑުތައް ޖެހީ މެޗުގެ މޮޅު ކުޅުންތެރިޔާ ޝާމިރު ޝައިފްގެ އިތުރުން ހަސަން ނަޒާހު އެވެ.
ބ. ތުޅާދޫ ފުރަތަމަ މެޗުން އޭދަފުށި އަތުން ބަލިވި ނަމަވެސް ރޭ ވަނީ ހިތާދޫ އަތުން 4-1 އިން މޮޅުވެފަ އެވެ. ހިތާދޫ އަތުން ތުޅާދޫ މޮޅުކޮށްދޭން އެންމެ އިސް ރޯލެއް ކުޅުނީ މެޗުގެ ފުރަތަމަ ހާފުގައި އެކަނި ކުޅުނު އަންސަރު އިބްރާހިމް (އަންކޮ) އެވެ. އަންކޮ ދެ ގޯލު ޖެހިއިރު، އެ ޓީމުގެ އަނެއް ދެ ގޯލު ޖެހީ އަހުމަދު ތަސްނީމާއި މުހައްމަދު ތަސްނީމް (މޯޑު) އެވެ. ހިތާދޫގެ ހަމައެކަނި ގޯލު ޖެހީ އަހުމަދު ހުސެއިން (އައްމަޑޭ) އެވެ.
ބުރާސްފަތި ދުވަހުގެރޭ ހިތާދޫ އަތުން ޕޮއިންޓެއް ހޯދައިގެން ވެސް އޭދަފުއްޓަށް ބ. އަތޮޅުގެ ޗެމްޕިއަންކަން ލިބޭނެ އެވެ.
ގަމާއި އިސްދޫ އަށް ދެ ވަނަ މޮޅު
ލ އަތޮޅުގެ ފުރަތަމަ މެޗުތަކުން ގަމާއި އިސްދޫ ވަނީ މޮޅުވެފަ އެވެ. ރޭ ދެ ވަނަ މެޗުތަކަށް ނުކުމެ ގަން ވަނީ ކަލައިދޫ އަތުން 8-3 އިން މޮޅުވެފަ އެވެ. އިސްދޫ ވަނީ މާމެންދޫއާ ދެކޮޅަށް ކުޅުނު މެޗުން 1-0 އިން މޮޅުވެފަ އެވެ. ފުރަތަމަ ދެ މެޗުގެ ނަތީޖާ އަށް ފަހު ކަލައިދޫ އާއި މާމެންދޫ އަށް ޗެމްޕިއަންކަން ހޯދުމުގެ ދޮރު ބަންދުވެފައިވާއިރު، އެ ފުރުސަތު އޮތީ ބުރާސްފަތި ދުވަހުގެރޭ އިސްދޫ އާއި ގަން ކުޅޭ މެޗުން މޮޅުވާ ޓީމަކަށެެވެ. އެ މެޗު އެއްވަރުކޮށްލައިގެން ވެސް ގަމަށް ލ ޗެމްޕިއަންކަން ހޯދޭނެ އެވެ.
މާމެންދޫ އަތުން އިސްދޫ މޮޅުވިއިރު، މެޗުގެ ހަމައެކަނި ގޯލު ޖެހީ އަލީ މީސާގް އެވެ. މެޗުގެ މޮޅު ކުޅުންތެރިއަކަށް ހޮވުނީ ވެސް މީސާގް އެވެ.
ކަލައިދޫގެ ކުޅުންތެރިއަކު ކައިރިން ގަމުގެ އައްމަޑޭ ބޯޅަ ހިފައިގެންދަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ކަލައިދޫ ކޮޅަށް ރޭ ގަމުން ޖެހި އަށް ގޯލުގެ ތެރެއިން ދެ ގޯލު ޖެހީ ރޭ ކެޕްޓަން ބޭންޑް އަޅައިގެން ކުޅެ، މެޗުގެ މޮޅު ކުޅުންތެރިއަކަށް ހޮވުނު އަލީ ޝާމިސް (ތޮއްޕޭ) އެވެ. ގަމުގެ އަނެއް ފަސް ގޯލު ޖެހީ އަހުމަދު ހަލީމް (އައްމަޑޭޭ)، ހަަސަން ފައްވާޒް، ޒައިދާން އަބްދުﷲ، ރައްޒާން އަބްދުލް ސަމަދު އަދި މޫސާ މުނާޒް އަލީ އެވެ. ދެން ޖެހި ގޯލަކީ ކަލައިދޫގެ ޖައުފަރު އަހުމަދު އަތުން ބައިކޮޅަށް ވަން ގޯލެކެވެ. ކަލައިދޫގެ ގޯލުތައް ޖެހީ އަހުމަދު ފަރީޝް، އިބްރާހިމް ނާއިލް އަދި މުހައްމަދު ތާއިފް ޝަކީލް އެވެ.
މުބާރާތުގައި މިރޭ ވެސް ހަ މެޗެއް ކުޅޭނެ އެވެ. އެ ގޮތުން 20:15 ގައި ފަށާނީ ދެ އަތޮޅެއްގެ ފައިނަލެވެ. އެއްކޮޅުން ކ އަތޮޅުގެ ފައިނަލުގައި ކާށިދޫ އާއި ގާފަރު ކުޅޭއިރު، އަނެއްކޮޅުން ދ. ކުޑަހުވަދޫ އާއި ބަނޑިދޫ ބައްދަލުކުރާނެ އެވެ. ދެން ކުޅޭނީ ގއ. އަތޮޅުގެ ގްރޫޕް ސްޓޭޖުގެ ހަތަރު މެެޗެވެ. އެއީ 21:15 ގައި ފަށާ މާމެންދޫ އާއި ދާންދޫގެ މެޗާއި ކޮލަމާފުއްޓާއި ދެއްވަދޫގެ މެޗުގެ އިތުރުން 22:15ގައި ކުޅޭ ކޮނޑޭ އާއި ކަނޑުހުޅުދޫގެ މެޗާއި ނިލަންދޫ އަދި ގެމަނަފުށީގެ މެޗެވެ.
