އިނގިރޭސިވިލާތުގެ ބާމިންހަމްގައި މި އަހަރުގެ ޖުލައި މަހު އޮންނަ ކޮމަންވެލްތް ގޭމްސް އަށް ރާއްޖޭގެ އަންހެން ޓޭބަލް ޓެނިސް ޓީމް ކޮލިފައިވެއްޖެ އެވެ.
ޖުލައި 28 އިން އޮގަސްޓް 8 އަށް އޮންނަ ކޮމަންވެލްތް ގޭމްސް އަކީ ރައްޖޭ އިން މި އަހަރު ވާދަކުރާނެ ފަސް ގޭމްސްގެ ތެރެއިން މި ވަގުތު އެންމެ ބޮޑަށް ތައްޔާރުވަމުން އަންނަ މުބާރާތެވެ. މެދުކެނޑުމަކަށް ފަހު ރާއްޖޭން ވާދަކުރާ ފުރަތަމަ ކޮމަންވެލްތު ގޭމްސްގައި ދިވެހި އެތުލީޓުންނަށް ވަނީ އެކި ކުޅިވަރުތަކުން 17 ޖާގަ ލިބިފަ އެވެ. އަންހެން ޓީޓީ ޓީމު ސީދާ ކޮލިފިކޭޝަންގެ ތެރެއިން ކަމަށްވުމާ އެކު މިއީ ރާއްޖެ އަށް ލިބުނު އިތުރު ސްލޮޓެކެވެ.
މި ގޭމްސް އަށް ކޮލިފައިން މުބާރާތްތަކެއް މިދިޔަ މަހާއި މި މަހު ކުޅެން ނިންމި ނަމަވެސް ފަހު ވަގުތު މި މެޗުތައް ނުކުޅެ ރޭންކިން އަށް ބަލައި ގަދަ 16 ޓީމަށް ފުރުސަތު ދޭން ވަނީ ނިންމައިފަ އެވެ. ރާއްޖޭގެ އަންހެން ޓޭބަލް ޓެނިސް ޓީމަށް ފުރުސަތު ލިބުނީ ގޭމްސްގައި ހިމެނޭ ގައުމުތަކުގެ ރޭންކިން އަށް ބަލާއިރު ގަދަ 16 ޓީމުގެ ތެރޭގައި ހިމެނޭތީ އެވެ.
ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ރައީސް އަލީ ރަޝީދު (އައްޔަ) ވިދާޅުވީ ގަދަ 16 ޓީމަށް ފުރުސަތު ދޭން ކޮމަންވެލްތު ގޭމްސް ފެޑަރޭޝަނުން ނިންމީ ބައެއް ގައުމުތަކުގައި ކޮވިޑްގެ ހާލަތު އޮތް ގޮތުން ކޮލިފައިން މުބާރާތް ކުރިއަށް ގެންދަން އުނދަގޫވާނެތީ އެވެ.
"އަޅުގަނޑުމެންގެ އަންހެން ޓީމު އެބަހިމެނޭ ގަދަ 16 ގެ ތެރޭގައި. އެގޮތަށް ބަލާފައި ކޮލިފައިވީ. މިވަގުތު ރޭންކިން އަށް ބަލާއިރު ރާއްޖެއަށް ފަހިވި ފުރުސަތެއް މިއީ،" އައްޔަ ވިދާޅުވި އެވެ.
އައްޔަ ވިދާޅުވީ މި ފުރުސަތު ލިބުމާ އެކު އެންމެ ފުރަތަމަ ވެސް މި މަސައްކަތްކުރަނީ ރާއްޖޭގެ އޮލިމްޕިކް ކޮމިޓީއާ ގުޅިގެން ފުރިހަމަކުރަންޖެހޭ ކަންކަން ކުރުމަށް ކަމަށެވެ. އެ ގޮތުން ޓީމުގެ ތަމްރީންތައް ކުރިއަށްގެންދާނެ ގޮތްތަކާ މެދު ވެސް މަޝްވަރާތައް ފަށާފައިވާނެ ކަމަށް އައްޔަ ވިދާޅުވި އެވެ.
މާލޭގައި ހުންނަ ޓޭބަލް ޓެނިސް އެސޯސިއޭޝަންގެ ރަސްމީ ހޯލް މި ވަގުތު ވަނީ މަރާމާތަށް ބަންދުކޮށްފަ އެވެ. އެހެންވެ، ގައުމީ ޖޫނިއާ ޓީމާއި ސީނިއާ ޓީމު ވެސް ފަރިތަކުރަމުން އަންނަނީ ހުޅުމާލެ ސްޕޯޓްސް ކޮމްޕްލެކްސްގައި ހުންނަ ޓީޓީ ހޯލުގަ އެވެ.
އައްޔަ ވިދާޅުވީ ކޮމަންވެލްތް ގޭމްސް އަކީ ރާއްޖޭގެ ޓީޓީ އަށް ލިބޭ ބޮޑު ފުރުުސަތެއް ކަމަށާއި، އެހެންކަމުން މި މުބާރާތަށް ރަނގަޅަށް ތައްޔާރުވުން މުހިންމު ކަމަށެވެ. އެހެންވެ، މުބާރާތުގެ ކުރިން ރާއްޖެ އިން ބޭރަށް ޓީމު ފޮނުވައިގެން ތަމްރީން ހެދުމަކީ މައިގަނޑު ވިސްނުން ކަމަށާއި، އެ ކަމަށް މަސައްކަތް ކުރެވެމުން އަންނަ ކަމަށް އައްޔަ ވިދާޅުވި އެވެ.
"ބޮޑަށް ރާއްޖެއިން ބޭރުގައި ތަމްރީން ހެދޭނެ ގޮތެއް މި ބަލަނީ. ރޯދަ މަހަށް ފަހު އެކަންކަން ހަމަޖެހޭނެ ކަމަށް މި ބަލަނީ،" އައްޔަ ވިދާޅުވި އެވެ.
ޓީމު ކުޅިވަރުތަކަށް ބަލާއިރު ފަހަކަށް އައިސް އެންމެ ބޮޑު ކުރިއެރުމަކާއި ކާމިޔާބީތަކެއް ހޯދި އެއް ކުޅިވަރަކީ ޓޭބަލް ޓެނިހެވެ. އެ ގޮތުން އެންމެ ފަހުން ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ އަންހެން ޓީމު އިވެންޓުން ރަން މެޑަލް ހޯދައި، އަންހެން ޑަބަލްސް އަދި އަންހެން ސިންގަލްސް ރަން މެޑަލް ވެސް ރާއްޖެ އިން ހޯދި އެވެ. އެ މުބާރާތުން ރިހި ދެ މެޑަލް ވެސް ރާއްޖެ އިން ހޯދި އެވެ. އޭގެ ފަހުން 2019 ވަނަ އަހަރު ބޭއްވި ސައުތު އޭޝިއަން ގޭމްސްގައި އަންހެން ޓީޓީ ޓީމު ވަނީ ލޯ މެޑަލް ވެސް ހޯދައިފަ އެވެ.
ކޮމަންވެލްތު ގޭމްސްގައި ވާދަކުރާ ހުރިހާ ގައުމެއް އަދި ފައިނަލް ނުވިކަމުގައި ވިޔަސް ގާތްގަނޑަކަށް 72 ގައުމުން މި ފަހަރުގެ ގޭމްސްގައި ވާދަކުރާނެ ކަމަށް މީޑީއާ ރިޕޯޓްތައް ބުނެ އެވެ.
ކޮމަންވެލެތު ގޭމްސްގެ އިތުރުން މި އަހަރު ރާއްޖެ އިން އިތުރު ހަތަރު ގޭމްސް އެއްގައި ވާދަކުރާނެ އެވެ. އެއީ ޗިލްޑްރެން އޮފް އޭޝިއަން ގޭމްސް، އިސްލާމިކް ސޮލިޑާރިޓީ ގޭމްސް، އޭޝިއަން ގޭމްސް އަދި އޭޝިއަން ޔޫތު ގޭމްސް އެވެ.
