މިއުނިކް (މާޗް 5) - ޖަރުމަނު ލީގުގައި މިރޭ ބަޔާން މިއުނިކްގެ ކެޕްޓަން ތޯމަސް މުލާ އަތުން ބައިކޮޅަށް ވަން ގޯލުން އެ ޓީމު 1-1 އިން ބަޔާ ލެވަކޫސަންއާ އެއްވަރުވެއްޖެ އެވެ.
ބަޔާން އެއް ވަނައިގައި އޮތީ 25 މެޗުން 59 ޕޮއިންޓާ އެކު އެވެ. ދެ ވަނައިގައި އޮތް ބޮރޫޝިއާ ޑޯޓްމަންޑަށް ވަނީ 24 މެޗުން 50 ޕޮއިންޓް ލިބިފަ އެވެ. ޑޯޓްމަންޑް މި ހަފްތާގައި ކުޅެން އޮތް މެޗު ފަސްކުރަން ޖެހުނީ އެ ޓީމާ ދެކޮޅަށް ކުޅެން އޮތް މައިންޒް ޓީމުގައި ކޮވިޑް-19ގެ ހާލަތު ގޯސްވެފައިވާތީ އެވެ.
ޖަރުމަނު ލީގުގައި މި ހަފްތާގައި ކުޅޭ މެޗުތަކުގައި ވެސް ރަޝިއާ އިން ޔޫކްރެއިނާ ދެކޮޅަށް ކުރާ ހަނގުރާމައާ ދެކޮޅަށް ޝުއޫރު ފާޅުކުރުމުގެ ހަރަކާތްތަކެއް ކުރިއަށްދާ ގޮތަށް އޮތީ ހަމަޖެހިފަ އެވެ. އެ ގޮތުން މެޗު ފެށުމުގެ ކުރިން ސުކޫތެއް ގެނައިއިރު، ޓީމުގެ ކެޕްޓަން ބޭންޑާއި ބައެއް ކްލަބްތަކުގެ ސްޕޮންސަރުންގެ ނަން ހިމަނާފައިވާ ލޯގޯތަކުގެ ތެރެއިން ވެސް ވަނީ ޔޫކްރެއިނަށް އޮތް ސަޕޯޓް ދައްކުވައިދީފަ އެވެ.
އަލިއާންޒް އެރީނާގައި މިރޭ ކުޅުނު މެޗުގެ 18 ވަނަ މިނިޓްގައި ބަޔާނަށް ލީޑުނަގައިިދިނީ ނިކްލަސް ސޫލާ އެވެ. ކޯނަރެއްގައި އޭރިއާތެރެއިން ލެވަކޫސަން ޑިފެންޑަރުންނަށް ސަލާމަތް ނުކުރެވިދިޔަ ބޯޅައެއް ލިބުނީ ސޫލާ އަށެވެ. އޭނާ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
މެޗުގެ 36 ވަނަ މިނިޓްގައި ލެވަކޫސަންގެ ކަރީމް ޑެމީރްބައި ހިލޭ ޖެހުމަކުން ނެގި ބޯޅަ ޑިފެންސްކުރަން މުލާ މަސައްކަތްކުރިއިރު، އޭނާ ފައިގައި ޖެހިފައި ބޯޅަ ވަނީ ބައިކޮޅަށެވެ. އެ ބޯޅަ މުލާ ފައިގައި ނުޖެހުނު ނަމަ ބަޔާންގެ ގޯލުގައި ހުރި ސްވެން އުލްރާއި އަށް ލިބުމުގެ ފުރުސަތު އޮތެވެ.
ބަޔާން މޮޅުކޮށްދޭން ރޮބަޓް ލެވަންޑޯސްކީ ޖެހި ބޯޅަ އަރިމަތިން ދިޔައިރު، އެ ޓީމުގެ މާސެލް ސަބީޓްޒާ ޖެހި ބޯޅަ ލެވަކޫސަންގެ ކީޕަރު ލޫކަސް ރަޑޭކީ ވަނީ މަތަކޮށްފަ އެވެ. ލެވަކޫސަނަކީ މި ސީޒަނުގައި ބަޔާން ދަނޑުގައި ނަތީޖާއެއް ނެރުނު ޖަރުމަނުގެ ތިން ވަނަ ކްލަބް އެވެ.
ބަޔާންގެ ކޯޗު ހޫލިއަން ނާގަލްސްމަން ބުނީ މެޗުގެ އޮއެވަރު ބަދަލުވަމުންދިޔަ ގޮތަށް ބަލާއިރު، މިއީ އެންމެ ގޯސް ނަތީޖާއެއް ކަމަށް ނުބުނެވޭނެ ކަމަށެވެ. އަދި މި މެޗުގައި މުލާ އަތުން ބައިކޮޅަށް ގޯލެއް ވަނުމުން އެއީ ހުރިހާ ކަމެއް ނިމުނީ އެއް ނޫން ކަމަށާއި މި ފަދަ ކަންކަމާ ކުރިމަތިލެވޭ ވަރަށް މުލާގެ ފުޓްބޯޅަ ތަޖުރިބާ ހުންނާނެ ކަމަށް ނާގަލްސްމަން ވަނީ ބުނެފަ އެވެ.
ޖަރުމަނު ލީގުގައި މިރޭ އާރްބީ ލައިޕްޒިގާއި ފްރެއިބާގް ކުޅުނު މެޗު 1-1 އިން ނިމުނުއިރު، ސްޓުޓްގާޓް އިން ވަނީ އަމިއްލަ ދަނޑުގައި 3-2 އިން ބޮރޫޝިއާ މުންޗެންގްލަޑްބެކް ބަލިކޮށްފަ އެވެ.
