މިލާން (މާޗް 5) - އިޓާލިއަން ލީގުގައި ރޭ ލަޓާރޯ މާޓީނޭޒްގެ ހެޓްރިކާ އެކު 5-0 އިން ސެލަނިޓާނާ ބަލިކޮށް އިންޓަ މިލާން ލީގުގެ އެއް ވަނަ އަށް ޖެހިލައިފި އެވެ.
އެންމެ ފަހުގެ ޗެމްޕިއަން އިންޓަ އެއް ވަނަ އަށް އެރީ 27 މެޗުން 58 ޕޮއިންޓް ހޯދައިގެންނެވެ. ދެ ވަނައިގައި އޮތް ނަޕޯލީ އާއި ތިން ވަނައިގައި އޮތް އޭސީ މިލާނަށް ވަނީ 27 މެޗުން 57 ޕޮއިންޓް ލިބިފަ އެވެ. ޔުވެންޓަސް ހަތަރު ވަނައިގައި އޮތީ 27 މެޗުން 50 ޕޮއިންޓާ އެކު އެވެ. މާދަމާރޭ ނަޕޯލީ އާއި މިލާން ކުޅޭ މެޗުން މޮޅުވާ ޓީމެއް އެއް ވަނަ އަށް އަރާނެ އެވެ.
ރޭގެ މެޗު ފަށައިގެން ސެލަނިޓާނާ އަށް ލީޑުނަގައިދޭން ސިމޯން ވާޑީ އަށް އޭރިއާތެރެއިން ލިބުނު ފުރުސަތުން އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ. އޭގެ އިރުކޮޅެއް ފަހުން އިންޓަގެ މާޓީނޭޒް ޖެހި ބޯޅައެއް އަމާޒުވީ ގޯލުގެ ހުރަސްދަނޑިއަށެވެ. އެކަމަކު، މެޗުގެ 20. ވަނަ މިނިޓްގައި ނިކޯލޯ ބަރޭލާ ދިން ބޯޅައެއް އޭރިއާތެރެއިން ކޮންޓްރޯލް ކޮށްލައި މާޓީނޭޒް ވަނީ ގޯލުގެ ތިރީ ކަނަށް ބޯޅަ ފޮނުވާލައިފަ އެވެ. ފުރަތަަމަ ހާފު ނިމުމުގެ ކުރިން މާޓީނޭޒް އޭނާގެ ދެ ވަނަ ގޯލު ޖެހީ ވެސް ބަރޭލާ ދިން ބޯޅައަކުންނެވެ.
ދެ ވަނަ ހާފުގެ ކުޅުން ފަށައިގެން 11 މިނިޓް ތެރޭ މާޓީނޭޒް ވަނީ ތިން ވަނަ ގޯލު ޖަހައި ހެޓްރިކް ފުރިހަމަކޮށްފަ އެވެ. މިއީ އެޑިން ޖެކޯ ނަގައިދިން ހުރަހަކުން ގޯލުގެ މަތީ ދާގަނޑަށް ބޯޅަ ފޮނުވާލައިގެން މާޓީނޭޒް ޖެހި ގޯލެކެވެ.
އޭގެ ފަހުން އިންޓަގެ ފަހު ދެ ގޯލު ޖެހީ ޖެކޯ އެވެ. އޭނާ ދެ ގޯލު ކާމިޔާބުކުރީ ފަސް މިނިޓްގެ ތެރޭގަ އެވެ. މެޗުގެ 64 ވަނަ މިނިޓްގައި ރޮބިން ގޮސެންސް ނެގި ހުރަހަކުން ޖެކޯ އޭނާގެ ފުރަތަމަ ގޯލު ޖެހިއިރު، އޭގެ ފަސް މިނިޓް ފަހުން ޖެކޯ އަނެއް ގޯލު ޖެހީ ކައުންޓަ އެޓޭކެއްގައި ޑެންޒެލް ޑަމްފްރީސް ނަގައިދިން ހުރަހަކުންނެވެ.
