ލިވަޕޫލް (މާޗް 3) - ޔޫކްރެއިނާއި ރަޝިއާއާ ދެމެދު ހިނގަމުން އަންނަ ހަނގުރާމައިގެ ސަބަބުން ރަޝިއާ އަށް އިނގިރޭސި ސަރުކާރުން އަޅާފައިވާ ދަތިކުރުމުގެ ފިޔަވަޅުތަކަށް އެއްބާރުލުން ދިނުމުގެ ވިސްނުމުގައި، އިނގިރޭސި ޕްރިމިއާ ލީގުގެ އެވަޓަން އިން ރަޝިއާގެ ވިޔަފާރިތަކާ ގުޅުން ކަނޑާލައިފި އެވެ.
އެވަޓަންގެ ރަޝިއަން ކޮމާޝަލް ޕާޓްނަރަކީ ޔޫއެސްއެމް އެވެ. އެވަޓަންގެ ޕާޓްނަރުންގެ ގޮތުގައި ޔޫއެސްއެމް އާއި މެގަފޯން އަދި ޔޮޓާ ގުޅިފައި އޮތްއިރު، މި ކުންފުނިތަކަކީ ރަޝިއާ އާއި އުޒްބެކިސްތާންގެ ރަށްވެހިކަން އޮންނަ ވިޔަފާރިވެރިޔާ އަލީޝާ އުސްމާނޯފްގެ ހިއްސާ އޮންނަ ކުންފުނިތަކެކެވެ. ކުރިން އާސެނަލްގެ މައިނޯރިޓީ ހިއްސާދާރަކަށް ހުރި އުސްމާނޯފްގެ ހިއްސާ އެވަޓަންގައި އެބައޮތެވެ.
އުސްމާނޯފަކީ ރަޝިއާގެ ރައީސް ލަޑިމިއާ ޕުޓިންގެ އަރިސް މީހަކަށް ވާތީ އެވަޓަން އިން ނިންމީ އުސްމާނޯފްގެ ވިޔަފާރިތަކާ ގުޅުން ކަނޑާލާށެވެ.
ޕުޓިންގެ އަރިސް މީހެއް ކަމަަަށްވާ ޗެލްސީގެ ވެރިޔާ ރަޝިއާގެ ރޯމަން އަބްރަމޮވިޗް ވެސް ވަނީ އިނގިރޭސި ސަރުކާރުގެ ފިއްތުންތަކާ ހެދި ޗެލްސީ ވިއްކާލަން ނިންމައިފަ އެވެ. އިނގިރޭސި ސަރުކާރުން ރަޝިއާ ވިޔަފާރިތަކަށް އަޅާ ދަތިކުރުމުގެ ފިޔަވަޅުތަކަށް ގިނަ ކްލަބްތަކުން އަންނަނީ ބޯލަނބަމުންނެވެ.
ރަޝިއާގެ ގައުމީ އެއާލައިން "އެއިރޯފްލޮޓް"އާ އެކު ހަދާފައިވާ ސްޕޮންސާޝިޕް އެއްބަސްވުން ކުރިއަށް ނުގެންދިއުމަށް މެންޗެސްޓާ ޔުނައިޓަޑުން ވަނީ ނިންމައިފަ އެވެ.
އެވަޓަންގެ ކޯޗު ފްރޭންކް ލަމްޕާޑް ބުނީ ކްލަބް ހިންގުމުގެ ކަންކަމުގައި ނިންމާ ނިންމުންތަކަކީ އޭނާގެ ކޮންޓްރޯލުން ބޭރުގެ ކަންކަން ކަމަށެވެ. އަދި އުންމީދަކީ އަބަދުވެސް ކްލަބްގެ ކުޅުންތެރިންނާއި ސަޕޯޓަރުންގެ މަސްލަހަތަށް ބަލާފައި ކްލަބުގެ މެނޭޖްމަންޓުން ކަންކަން ނިންމުން ކަމަށް ލަމްޕާޑް ބުނެފައިވެ އެވެ.
