ގޯލްޑަން ފުޓްސަލް ޗެލެންޖްގައި ރޭ ކުޅުނު ގްރޫޕްގެ ދެ ވަނަ މެޗުން މޮޅުވެ، މ. ދިއްގަރު އަތޮޅު ފައިނަަލަށް ދިޔައިރު، ރޭ މ. މުލައް، އދ. އޮމަދޫ، އދ. މާމިގިލި، ފ. ބިލެއްދޫ އަދި ފ. މަގޫދޫ ވެސް ކުޅުނު މެޗުތަކުން މޮޅުވެއްޖެ އެވެ.
ދިއްގަރުން ވަނީ ކުޅުނު ފުރަތަމަ މެޗުގައި މ. ނާލާފުށި އަތުން ވެސް މޮޅުވެފަ އެެވެ. ރޭ މަޑުއްވަރީގެ މައްޗަށް 4-1 އިން ކުރިހޯދައި ދިއްގަރުން މ އަތޮޅު ފައިނަލުގެ އެއް ޖާގަ މި ވަނީ ޔަގީންކޮށްފަ އެވެ. މ. އަތޮޅުގެ އަނެއް ގްރޫޕްގައި ރޭ ކޮޅުފުށި އަތުން 1-0 އިން މުލައް ވަނީ މޮޅުވެފަ އެވެ. ކުޅުނު ދެ މެޗުން ވެސް މޮޅެއް ނުލިބި ކޮޅުފުށި، އެ ޓީމު ވަނީ ކަޓައިފަ އެވެ. މި ގްރޫޕުން އަތޮޅު ފައިނަލުގެ ޖާގަ އަކަށް ވާދަކުރަނީ މުލަކާއި މުއްޔެވެ.
އދ. އޮމަދޫ އިން ވަނީ ރޭ 7-1 އިން އެ އަތޮޅު ކުނބުރުދޫ ބަލިކޮށްފަ އެވެ. އޮމަދޫ އިން ފުރަތަމަ މެޗުގައި ވަނީ ދަގެނތި ވެސް ބަލިކޮށްފަ އެވެ. އެހެންކަމުން ކުޅުނު ދެ މެޗުން ހޯދި މޮޅާ އެކު އޮމަދޫ އަށް މި ވަނީ އަތޮޅު ފައިނަލުން ފުރުސަތު ލިބިފަ އެވެ. އަތޮޅު ފައިނަލުގެ އަނެއް ޖާގައަށް ވާދަކުރަނީ މާމިގިއްޔާއި ހަންޏާމީދޫ އެވެ. ހަންޏާމީދޫން ވަނީ ފުރަތަމަ މެޗުގައި 2-1 އިން ފެންފުށި ބަލިކޮށްފަ އެވެ. ރޭ ފެންފުށި އަތުން މާމިގިލި މޮޅުވީ 4-0 އިންނެވެ.
ގޯލްޑަން ފުޓްސަލް ޗެލެންޖްގައި ރޭ މ. މުލަކާއި ކޮޅުފުށި ބައްދަލުކުރި މެޗުގެ ތެެރެއިން.
ރޭ ފ. ނިލަންދޫގެ މައްޗަށް ބިލެތްދޫ ކުރިހޯދީ 3-1 އިންނެވެ. އަދި މަގޫދޫ އަތުން 7-0 އިން ބަލިވެ ފީއަލި ވަނީ ކަޓައިފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުގައި ކޮޅުފުށި ކޮޅަށް މުލަކުގެ ހަމައެކަނި ގޯލު ޖެހީ މެޗުގެ މޮޅު ކުޅުންތެރިޔާގެ މަގާމު ހޯދި މިފްދާދު އަހުމަދު އެވެ. ދިއްގަރު ޓީމުން ރޭ މަޑުއްވަރީ ކޮޅަށް ޖެހި ހަތަރު ގޯލުގެ ތެެރެއިން ދެ ގޯލު ޖެހީ މެޗުގެ މޮޅު ކުޅުންތެރިޔާ އާދަމް ހަލީލް އެެވެ. އަނެއް ދެ ގޯލު ޖެހީ އަހުމަދު މިދުހަތު މަހުމޫދާއި ނޫހު މައްސޫދު އެވެ. މަޑުއްވަރީގެ ހަަމައެކަނި ގޯލު ޖެހީ އިބްރާހިމް މުއާޒް އެވެ.
މާމިގިލި ޓީމުން ރޭ ފެންފުށި ކޮޅަށް ގޯލުތައް ޖެހީ ހައިޝަމް އަރީފް އާއި ހިސާމް ސަލީމް އެވެ. މީގެ ތެެރެއިން މެޗުގެ މޮޅު ކުޅުންތެރިއަކަށް ހޮވުނު ހައިޝަމް ވަނީ ހެޓްރިކެއް ހަދައިފަ އެވެ. ރޭ އދ. އޮމަދޫގެ ކެޕްޓަން އަދި މެޗުގެ މޮޅު ކުޅުންތެރިޔާގެ މަގާމު ހޯދި މޫސާ އަރީފް ވަނީ ހެޓްރިކެއް ހަދައިފަ އެވެ. އެ ޓީމުގެ އަލީ އަޒުމީ ވެސް ހެޓްރިކެއް ހެދިއިރު، އަނެއް ގޯލު ޖެހީ ހަސަން ސާމް އެވެ. ކުނބުރުދޫގެ ހަމައެކަނި ގޯލު ޖެހީ ފަތުހީ އެވެ.
ނިލަންދޫ ކޮޅަށް ބިލެތްދޫން ތިން ގޯލު ވައްދާލިއިރު، މުނީފް އަބްދުﷲ ނަސީރު ދެ ގޯލު ޖެހި އެވެ. މޮޅު ކުޅުންތެރިޔާގެ އެވޯޑް ވެސް މުނީފަށް ލިބުނުއިރު، އެ ޓީމުގެ އަނެއް ގޯލު ޖެހީ ޒުހުރީ އެވެ. ނިލަންދޫގެ ހަމައެކަނި ގޯލު ޖެހީ ފުރަތަމަ ޑިވިޝަނުގެ ކްލަބްތަކަށް ކުޅުނު ފާރޫގު އިސްމާއިލް އެވެ. ފީއަލި ކޮޅަށް މަގޫދޫގެ ގޯލުތައް ޖެހީ އަބްދުﷲ މުއާޒް، މޫސާ މާހިލް މިގުދާދު ކޮންމެ ކުޅުންތެރިއަކު ދެ ގޯލާއި އަހުމަދު މުއާޒް، މޫސާ އައްސަދު އަންވަރު އަދި މުސްތަފާ އެެވެ. މޮޅު ކުޅުންތެރިއަކީ އަބްދުﷲ މުއާޒް އެވެ.
މުބާރާތުގައި މިރޭ ވެސް ހަ މެޗެއް ކުޅޭނެ އެވެ. ކ އަތޮޅުގެ ދެ މެޗުގައި ހުރާ ކުޅޭނީ ކާށިދޫއާ އެވެ. މާފުށި ބައްދަލުކުރާނީ ގުރައިދޫއާ އެވެ. ގއ. ދެ މެޗުގައި، ކަނޑުހުޅުދޫ ބައްދަލުކުރާނީ ނިލަންދޫއާ އެވެ. އަދި ދެއްވަދޫ ނުކުންނާނީ މާމެންދޫއާ ދެކޮޅަށެވެ. ތ. އަތޮޅުގެ ދެ މެޗުގައި އެންމެ ފަހުގެ ޗެމްޕިއަން ތިމަރަފުށި ކުޅޭނީ ވޭމަންޑޫއާ އެވެ. ގާދިއްފުށިން ކިނބިދޫއާ ކުޅޭ މެޗު ވެސް އޮންނާނެ އެވެ.
