މިލާން (މާޗް 2) - އިޓާލިއަން ކަޕްގައި ރޭ އޭސީ މިލާނާއި އިންޓަ މިލާން ކުޅުނު ސެމީ ފައިނަލްގެ ފުރަަތަމަ ލެގުގެ މެޗު ލަނޑެއް ނުޖެހި 0-0 އިން އެއްވަރުވެއްޖެ އެވެ.
ރޭގެ މެޗު ފެށުމުގެ ކުރިން ޔޫކްރެއިނާއި ރަޝިއާއާ ދެމެދު ކުރަމުން އަންނަ ހަނގުރާމަ ނިމުމަކަށް ގެނައުމަށް އެދި މިލާނުގެ ދެ ކްލަބުން އެކުއެކީގައި ޝުއޫރުފާޅުކުރި އެވެ. އެކަމަށްޓަކައި، މިލާނަށް ކުރިން ކުޅުނު ފޯވާޑް، ޔޫކްރެއިންގެ އަންދްރޭ ޝެވްޗެންކޯ ވަނީ ޝުކުރުއަދާކޮށްފަ އެވެ.
ރޭގެ މެޗު ފަށައިގެން މިލާނަށް ގޯލެއް ޖަހައިދޭން އެންމެ ރަނގަޅު ހަމަލާއެއް ފޮނުވާލީ އަލެކްސިސް ސަލަމާކާ އެވެ. އޭނާ ޖެހި ބޯޅަ އިންޓަގެ ކީޕަރު ސާމިރް ހަންޑަނޯވިޗް ވަނީ މަތަކޮށްފަ އެވެ. އޭގެ ފަހުން ފަަހަތުން ފަށައިގެން ބޯޅަ ހިފައިގެން ގޮސް، މިލާންގެ ފުލްބެކް ތިއޯ ހެނާންޑޭޒް ފޮނުވާލި ބޯޅަ ދިޔައީ އަރިމަތިން ބޭރުންނެވެ.
ފުރަތަމަ ހާފުގައި އިންޓަ އިން އެންމެ ފުރަތަމަ ނުރައްކާކުރީ ތުރުކީގެ މިޑްފީލްޑަރު ހަކަން ޗަނޮނޮގްލޫ ފޮނުވާލި ހިލޭ ޖެހުމުންނެވެ. އެ ބޯޅަ ދިޔައީ މިލާން ޑިފެންޑަރެއް ބޮލުގައި ޖެހިފައި ބޭރަށެވެ.
އަނިޔާގެ ސަބަބުން ޒްލަޓާން އިބްރަހިމޮވިޗް ނުލައި މިލާނުން ކުޅެމުންދިޔައިރު، ދެ ވަނަ ހާފު ފަށައިގެން އެ ޓީމުގެ ޕޯޗުގީސް ފޯވާޑް ރަފައެލް ލެއާއޯ އޭރިއާ ރޮނގުކައިރިން ދުރު ކަނަށް ފޮނުވާލަން ޖެހި ބޯޅަ އިންޓަ ކީޕަރު ހަންޑަނޯވިޗް ވަނީ ހުއްޓުވައިފަ އެވެ.
އޭގެ ފަހުން އިންޓަގެ ޑެންޒެލް ޑަމްފްރީސް ގޯލު ކުރިމައްޗަށް ނެގި ހުރަސް އެ ޓީމުގެ ކުޅުންތެރިއަކަށް ލިބުމުގެ ކުރިން މިލާންގެ ކަލޫލޫ ވަނީ ރަނގަޅަށް ޑިފެންސްކޮށްފަ އެވެ. އިންޓަގެ ކުރިއަށް ކުޅޭ ލަޓާރޯ މާޓީނޭޒާއި އެޑިޒް ޖެކޯ އަދި އަލެކްސިސް ސަންޗޭޒަށް މި މެޗުގައި އެދެވޭ ކުޅުމެއް ނުދެއްކެ އެވެ.
މެޗުގެ ފަހު ފުރުސަތަކަށް މިލާންގެ ބްރެޒިލް ވިންގް، ޖޫނިއާ މެސިއަސް އޭރިއާތެރެއިން ޖެހި ބޯޅައެއް ދިޔައީ ގޯލާ ސީދާނުވެ އެވެ.
އިޓާލިއަން ކަޕްގެ އަނެއް ސެމީގައި މިރޭ ޔުވެންޓަސް ބައްދަލުކުރަނީ ފިއޮރެންޓީނާއާ އެވެ.
