ކިޔޭވް، ޔޫކްރެއިން (މާޗް 2) - ރަޝިއާ އިން ޔޫކްރޭނާ ދެކޮޅަށް ފަށައިފައިވާ ހަނގުރާމައިގެ ސަބަބުން ޔޫކްރެއިންގައި ތާށިވެފައިތިބި ކުޅުންތެރިން އެހެން ގައުމުތަކަށް ފޮނުވުުގެ މަސައްކަތް އެ ކްލަބްތަކުން ކުރަމުން އެބަދެ އެވެ.
އެ ގޮތުން މިހާތަނަށް ޔޫކްރެއިންގެ އެއް ކްލަބް ކަމަށްވާ ޝަހުތަރު ޑޮނެސްކުން ވަނީ އެ ކްލަބްގައި ހިމެނޭ 12 ކުޅުންތެރިއަކު ރޫމޭނިއާ އަށް ފޮނުވާލައިފަ އެވެ. މީގެ އިތުރުން ޔޫކްރެއިންގެ ޑިނިޕްރޯ އަށް ކުޅެމުން އަންނަ ބިދޭސީ ކުޅުންތެރިން ވެސް ރޫމޭނިއާ މަގުން ފޮނުވާލުމުގެ މަސައްކަތް އަންނަނީ ކުރެވެމުންނެވެ.
ޔޫކްރެއިންގައި ތިބި ކުޅުންތެރިންތައް ސަލާމަތްކުރުމުގެ މަސައްކަތުގައި ޔުއެފާ އާއި ރުމޭނިއާ އަދި މޮލްޑޯވާ އިން އަންނަނީ އެކުއެކީގައި މަސައްކަތްތަކެއް ކުރަމުންނެވެ.
ޔޫކްރެއިން ފުޓްބޯޅަ އެސޯސިއޭޝަނުން ވަނީ އެކަމަށްޓަކައި ޔުއެފާގެ ރައީސް ސްލޮވީނިއާގެ އަލެކްސަންޑަ ޗެފެރިން އާއި މޮލްޑޯވާ ފުޓްބޯޅަ ރައީސް ލިއޯނިޑް އޮލެއިނިޗެންކޯ އަށް ޝުކުރު އަދާކޮށްފަ އެވެ.
މިދިޔަ ބުރާސްފަތި ދުވަހު ރަޝިއާ އިން ޔޫކްރެއިނަށް ގަދަބާރުން އަރައިގަނެގެން، ހަނގުރާމައެއް ފެށުމާ އެކު ޔޫކްރެއިންގައި ތިބި ފުޓްބޯޅަ ކުޅުންތެރިންތައް އަވަހަށް އެ ގައުމު ދޫކޮށްދާން ބޭނުންވި އެވެ. އެކަމަކު، އެހާ އަވަހަށް އެކަން ކުރެވޭނެ ގޮތެއް ހަމަނުޖެހި، ޔޫކްރެއިންގެ އެކި ސިޓީތަކުގައި ކުޅުންތެރިން ތާށިވި އެވެ. ވަކިވަކި ތަންތަނުގައި ކުޅުންތެރިން ބޭތިއްބުމުގެ ބަދަލުގައި ކްލަބްތަކުން އަވަސްވެގަތީ ހުރިހާ ކުޅުންތެރިން އެއްތަނަކަށް ޖަމާކޮށް، ޔޫކްރެއިނުން އެކުއެކީގައި އެ ކުޅުންތެރިން ފޮނުވާލެވޭނެ ގޮތްތަކެއް ހަމަޖައްސާށެެވެ. އެކަންކަން ކުރުމުގައި ޔޫކްރެއިންގެ ކްލަބްތަކުން ވަނީ އެކި ކުޅުންތެރިން ނިސްބަތްވާ ގައުމުތަކުގެ އެމްބަސީތަކާ ވާހަކަ ދައްކައި، ހައްލުތަކެއް ހޯދައިފަ އެވެ.
ޔޫކްރެއިނާ މެދު ރަޝިއާ އިން އަަމަލުކުރަމުން އަންނަ ގޮތާ ހެދި ފީފާ އާއި ޔުއެފާ އިން ވަނީ ރަޝިއާ ސަސްޕެންޑް ކޮށްފަ އެވެ. އަދި އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ވަނީ ރަޝިއާ އާއި ބެލަރޫސްގެ އެތުލީޓުންނަށް ފިޔަވަޅު އަޅަން އެކިއެކި ކުޅިވަރުތަކުގެ ބައިނަލްއަގުވާމީ ފެޑެރޭޝަންތަކަށް އަންގައިފަ އެވެ.
