ޕެރިސް (ފެބްރުއަރީ 28) - ދުބާއީ ޗެމްޕިއަންޝިޕްގެ ކުއާޓާ ފައިނަލުން ސާބިއާގެ ނޮވަކް ޖޮކޮވިޗް ކެޓުމާ އެކު ފަހަކަށް އައިސް ތަފާތު މޮޅު ފޯމެއްގައި ގިނަ މުބާރާތްތަކެއް ކުޅެމުން އަންނަ ރަޝިއާގެ ޑަނީލް މެޑްވެޑޭވް ދުނިޔޭގެ ރޭންކިންގެ އެއް ވަނަ އަށް ޖެހިލައި، ތާރީހީ ކާމިޔާބެއް ހޯދައިފި އެވެ.
މިދިޔަ 18 އަހަރު ތެރޭ ޓެނިހުގެ ފިރިހެން ރޭންކިންގެ އެއް ވަނައިގައި ޖޮކޮވިޗާއި، ސްޕެއިނުގެ ރަފައެލް ނަޑާލް، ސްވިޒަލެންޑްގެ ރޮޖާ ފެޑެރާ އަދި އިނގިރޭސި އެންޑީ މަރޭ ނޫނީ އެހެން ކުޅުންތެރިއަކަށް ޖާގަ ނުލިބެ އެވެ. މެޑްވެޑޭވް، ރޭންކިން އެއް ވަނަ އަށް އެރިއިރު، މިއީ 2004 ވަނަ އަހަރުގެ ފަހުން ޓެނިހުގެ ވަރުގަދަ ހަތަރު ކުޅުންތެރިން ފަހަތަށް ޖައްސާލާފައި އެހެން ކުޅުންތެރިއަކު ޓެނިހުގެ ރޭންކިން ކުރިއަށް ޖެހިލި ފުރަތަމަ ފަހަރެވެ.
ކޮވިޑް-19 ވެކްސިން މައްސަލައިގައި ގިނަ ގޮންޖެހުންތަކާ ކުރިމަތިލާން ޖެހިފައިވާ ޖޮކޮވިޗަށް، ރޭންކިން އެއް ވަނަ މި ގެއްލުނީ 361 ހަފްތާގައި މަގާމު ދެމެހެއްޓި ފަހުންނެވެ. ޖޮކޮވިޗަކީ އެންމެ ދިގު މުއްދަތަކަށް ރޭންކިން އެއް ވަނަ ދެމެހެއްޓުމުގެ ރެކޯޑް އޮތް ކުޅުންތެރިޔާ އެވެ.
މެޑްވެޑޭވަކީ ޓެނިސް ތާރީހުގައި އެއް ވަނަ އަށް އެރި ރަޝިއާ އަށް ނިސްބަތްވާ ތިން ވަނަ ކުޅުންތެރިޔާ އެވެ. މީގެ ކުރިން ރަޝިއާ ކުޅުންތެރިންގެ ގޮތުގައި ވާދަކޮށް ދުނިޔޭގެ ރޭންކިން ކުރިއަށް ޖެހިލީ ޔެވްގެނީ ކަފެލްނިކޯފް އާއި މަރާތު ސަފިން އެވެ.
މިދިޔަ އަހަރުގެ ޔޫއެސް އޯޕަން ޗެމްޕިއަންކަން ހޯދި އުމުރުން 26 އަހަރުގެ މެޑްވެޑޭވް ވަނީ މިދިޔަ މަހުގެ އޮސްޓްރޭލިއަން އޯޕަން ފައިނަލުގައި ނަޑާލް އަތުން ބަލިވެފަ އެވެ. މި ފަހަރުގެ ރޭންކިންގައި ނަޑާލް ވެސް ވަނީ އެއް ދަރަޖަ ކުރިއަށް ޖެހިލައިފަ އެވެ.
ރޭންކިންގެ ޕޮއިންޓްތަކަށް ބަލާއިރު، މެޑްވެޑޭވް އަށް ވަނީ 8615 ޕޮއިންޓް ލިބިފަ އެވެ. ޖޮކޮވިޗް ދެ ވަނައިގައި އޮތީ 8465 ޕޮއިންޓާ އެކު އެވެ. ތިން ވަނައިގައި އޮތް ޖަރުމަނުގެ އަލެކްސަންޑަ ޒްވެރެވް އަށް ވަނީ 7515 ޕޮއިންޓް ލިބިފަ އެވެ. ހަތަރަކަށް ޖެހިލި ނަޑާލަށް ލިބިފައިވަނީ 6515 ޕޮއިންޓެވެ. އަދި ފަސް ވަނައިގައި އޮތް ގްރީސްގެ ސްޓެފާނޯސް ސިޓްސިޕާސް އަށް ވަނީ 6445 ޕޮއިންޓް ލިބިފަ އެވެ.
