މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގެ އަތޮޅު މުބާރާތުގެ ޗެމްޕިއަންކަން ހދ. ނާވައިދު އާއި ހއ. އިހަވަންދޫ އަދި ށ. ކަނޑިތީމުން ހޯދައިފި އެވެ.
އިހަވަންދޫ އިން އަތޮޅު ތަށި ދިފާއުކުރީ ރޭ ކުޅުނު ފައިނަލުގައި ހޯރަފުށި އަތުން 2-0 އިން މޮޅުވެގެންނެވެ. ހދ. ވައިކަރަދޫ އަތުން އެ އަތޮޅު ފައިނަލުގައި 7-1 އިން ނާވައިދޫ މޮޅުވިއިރު، މިލަންދޫ 2-1 އިން ބަލިކޮށް ކަނޑިތީމުން ވަނީ ށ. އަތޮޅުގެ ޗެމްޕިއަންކަން ހޯދައިފަ އެވެ.
ރެހެންދި ފުޓްސަލް ދަނޑުގައި ރޭ ކުޅުނު ހއ. އަތޮޅުގެ ފައިނަލުގައި އިހަވަންދޫ އިން ހޯރަފުށި ކޮޅަށް ގޯލު ޖަހާފައިވަނީ ފުރަތަމަ ހާފުގެ ފަހުކޮޅާއި ދެ ވަނަ ހާފުގެ ކުރީކޮޅުގަ އެވެ. ފުރަތަމަ ހާފުގެ ފަހު ކޮޅުގައި އިބްރާހިމް ސުހޭލް އޭރިއާބޭރުން ޖެހި ގޯލަކުން އިހަވަންދޫ އަށް ލީޑުނަގައިދިންއިރު، ހޯރަފުށީގެ އަބްދުﷲ ޔާމީން (ޔާނު) އާއި އަލީ ޝިމާހު ފޮނުވާލި ބޯޅަތައް އިހަވަންދޫގެ ކީޕަރު ވަނީ މަތަކޮށްފަ އެވެ. ދެ ވަނަ ހާފުގައި އިހަވަންދޫގެ ދެ ވަނަ ގޯލު ޖެހީ ކައުންޓަ އެޓޭކެއްގައި ހުސެއިން ނަޝީދު އެވެ.
އިހަވަންދޫގެ ކުޅުންތެރިން ތަށްޓާ އެކު އުފާފާޅުކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ހއ.ގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިޔާގެ ޓްރޮފީ ހޯދީ 10 ގޯލު ޖެހި އިބްރާހިމް ހާމިދު އެވެ.
ނާވައިދޫގެ އަބްދުﷲ ޝާފިއު (ޝާއްޕެ) ވަނީ ރޭ ވައިކަރަދޫ ކޮޅަށް ހަތަރު ގޯލު ޖަހައިފަ އެވެ. އަނެއް ގޯލުތައް ޖެހީ އަހުމަދު ހަމީދު (އައްމަޑޭ)، މުހައްމަދު ނާޝިދު (ނާއްޓޭ) އަދި އަބްދުﷲ ނާސިފް އެވެ. ވައިިކަރަދޫގެ ގޯލު ޖެހީ އަހުމަދު ރައުޝަން އެވެ.
ހދ.ގެ އެންމެ މޮޅު ކުޅުންތެރިއަކަށް ހޮވުނީ ނާވައިދޫގެ އައްމަޑޭ އެވެ. އެންމެ ގިނަ ގޯލު ޖެހި ކުޅުންތެރިންނަކީ ޝާއްޕެ އާއި އައްމަޑޭ އެވެ. ދެ ކުޅުންތެރިން ވެސް ވަނީ ނުވަ ގޯލު ޖަހައިފަ އެވެ.
ށ. އަތޮޅުގެ ފައިނަލުގައި ކަނޑިތީމުން މިލަންދޫ އަތުން ހޯދީ އުނދަގޫ މޮޅެކެވެ. ކަނޑިތީމުގެ ދެ ގޯލު ވެސް ޖެހީ މެޗުގެ މޮޅު ކުޅުންތެރިއަކަށް ހޮވުނު އިބްރާހިމް ނަދާދު އެވެ. މިލަންދޫގެ ހަމައެކަނި ގޯލު ޖެހީ އަހުމަދު ޝަނީ އެވެ. ށ. އަތޮޅުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިއަކީ ނަދާދު އެވެ. އޭނާ ވަނީ ޖުމްލަ ހަތް ގޯލު ޖަހައިފަ އެވެ.
ށ. އަތޮޅުގެ ޗެމްޕިއަންކަން ހޯދި ކަނޑިތީމު ކުޅުންތެރިން އުފާފާޅުކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ރޭ ކުޅުނު އެހެން މެޗުތަކަށް ބަލާއިރު، ކ. ގާފަރުން ވަނީ 4-1 އިން ކ. މާފުށި ބަލިކޮށްފަ އެެވެ. ގާފަރުގެ ނާއިހް މުފީދާއި ގައިސާން އަބޫބަކުރު މާހިރު ކޮންމެ ކުޅުންތެރިއަކު ދެ ގޯލު ޖެހިއިރު، މާފުށީގެ ހަމައެކަނި ގޯލު ޖެހީ ހަސަން އިމްރާން އެވެ.
ކ. އަތޮޅު އަނެއް މެޗުގައި، ކާށިދޫން ވަނީ 4-1 އިން ތުލުސްދޫ ބަލިކޮށްފަ އެވެ. ކާށިދޫގެ ގޯލުތައް ޖެހީ އަބްދުﷲ ސުޒޭރު ދެ ގޯލާއި އަކުމަލް މުހައްމަދާއި އަހުމަދު ނާސިހު އެވެ.
ރޭ ކުޅުނު ދ އަތޮޅު މެޗުގައި ކުޑަހުވަދޫ ވަނީ 5-2 އިން ބަނޑިދޫ ބަލިކޮށްފަ އެވެ. ކުޑަހުވަދޫގެ ޝައުކަތު އަމީން ވަނީ ހެޓްރިކެއް ހަދައިފަ އެވެ. އަނެއް ގޯލުތައް ޖެހީ މުހައްމަދު އަރީޝް އާއި އަބްދުލް މުގުސިދު އެވެ. ބަނޑިދޫގެ ދެ ގޯލު ޖެހީ އަފްރާހު އިބްރާހިމް އެވެ.
