ޓިއުރިން (ފެބްރުއަރީ 27) - އިޓާލިއަން ލީގުގައި ރޭ ޑޫސާން ވްލަހޯވިޗްގެ ދެ ގޯލާ އެކު ޔުވެންޓަސް އިން 3-2 އިން އެމްޕޮލީ ބަލިކޮށް ގަދަ ހަތަރެއްގެ ރޭހުގައި ހަމަޖެހިލައިފި އެވެ.
ރޭގެ މޮޅާ އެކު ޔުވެންޓަސް އިން ވަނީ ލީގުގެ އެއް ވަނައިގައި އޮތް އޭސީ މިލާނާ ހަތް ޕޮއިންޓަށް ގާތަށް ޖެހިލައި، ހަތަރު ވަނައިގައި ހަ ޕޮއިންޓަށް ލީޑުފުޅާކޮށްފަ އެވެ. އެއް ވަނައިގައި އޮތް މިލާނަށް ވަނީ 27 މެޗުން 57 ޕޮއިންޓް ލިބިފަ އެވެ. ދެ ވަނައިގައި އޮތް އިންޓަ މިލާނަށް 26 މެޗުން 55 ޕޮއިންޓް ލިބިފައިވާއިރު، ތިން ވަނައިގައި އޮތް ނަޕޯލީ އަށް 26 މެޗުން ވަނީ 54 ޕޮއިންޓް ލިބިފަ އެވެ. ޔުވެންޓަސް ހަތަރެއްގައި އޮތީ 27 މެޗުން 50 ޕޮއިންޓް ހޯދައިފަ އެވެ. ފަހެއްގައި އޮތް އެޓަލަންޓާ އަށް 25 މެޗުން ވަނީ 44 ޕޮއިންޓް ލިބިފަ އެެވެ.
ޔުވެންޓަސް އަށް ލީޑުނަގައިދޭން ޑެނިސް ޒަކާރިއާ އަށް ލިބުނު ފުރުސަތުގެ ބޭނުމެއް ނުހިފުނެވެ. ޔުވެންޓަސް އިން ލީޑުނެގީ މެޗުގެ 32 ވަނަ މިނިޓްގައި އޭޑްރިއަން ރަބިއޯ ނެގި ހުރަހަކުން މޮއީސޭ ކީން ބޮލުން ޖެހި ގޯލުންނެވެ. އޭގެ ހަ މިނިޓް ފަހުން އެމްޕޮލީން އެއްވަރުކުރީ ކޯނަރެއްގައި އޭރިއާތެރެއަށް ހުރަސްވި ބޯޅައެއް ޔުވެންޓަސް ޑިފެންޑަރުންނަށް ސަލާމަތްނުކުރެވިގެން އުޅެނިކޮށް ޒީމަން ޒުރްކޯސްކީ ޖެހި ގޯލުންނެވެ.
ފުރަތަމަ ހާފުގެ އިތުރު ވަގުތުގައި ޔުވެންޓަސް އަށް ލީޑުނަގައިދިނީ ވްލަހޯވިޗް އެވެ. ހުއާން ކުއަޑްރާޑޯ ޖައްސާލި ބޯޅައެއް ކޮންޓްރޯލް ކޮށްލުމަށް ފަހު ހަމަޖެހިލާފައި ވްލަހޯވިޗް ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ. މެޗުގެ 66 ވަނަ މިނިޓްގައި ވްލަހޯވިޗް އޭނާގެ ދެ ވަނަ ގޯލު ޖެހީ އަލްވާރޯ މޮރާޓާ ދިން ބޯޅައަކުންނެވެ.
ޖެނުއަރީ މަހުގެ ޓްރާންސްފާގައި 70 މިލިއަން ޑޮލަރަށް ޔުވެންޓަސް އަށް ބަދަލުވި ވްލަހޯވިޗް ވަނީ މިހާތަނަށް އެ ޓީމަށް ކުޅެދިން ހަ މެޗުން ހަތަރު ގޯލު ޖަހައިފަ އެވެ.
މެޗުގެ 76 ވަނަ މިނިޓްގައި އެމްޕޮލީގެ އަންދްރެއާ ލަ މަންޓީއާ ވަނީ އޭރިއާތެރެއިން ލިބުނު ފުރުސަތެއްގައި ގޯލެއް ޖަހައިފަ އެވެ. އެކަަމަކު، ނަތީޖާ ހަމަހަަމަކުރަން ލިބުނުއިރު، ލަ މަންޓީއާ އަށް ރަނގަޅަށް ބޯޅަ ފޮނުވާނުލެވި ފުރުސަތު ގެއްލުނީ އެވެ.
