މެޑްރިޑް (ފެބްރުއަރީ 27) - ސްޕެނިޝް ލީގުގައި ރޭ ފަހު ވަގުތު ކަރިމް ބެންޒެމާ ޖެހި ގޯލުން 1-0 އިން ރެއާލް މެޑްރިޑުން ރަޔޯ ވަޔެކާނޯ އަތުން މޮޅުވެއްޖެ އެވެ.
މި މޮޅާ އެކު ރެއާލުން ވަނީ ލީގުގެ އެއް ވަނައިގައި ނުވަ ޕޮއިންޓަށް ލީޑުފުޅާކޮށްފަ އެވެ. ރެއާލަށް 26 މެޗުން 60 ޕޮއިންޓް ލިބިފައިވާއިރު، ދެ ވަނައިގައި އޮތް ސެވިއްޔާ އަށް ވަނީ 25 މެޗުން 51 ޕޮއިންޓް ލިބިފަ އެވެ. ތިން ވަނައިގައި އޮތް ރެއާލް ބެޓިސްގެ އޮތީ 25 މެޗުން 46 ޕޮއިންޓެވެ. ރޭ ސެލްޓަ ވިގޯ އަތުން 2-0 އިން މޮޅުވި އެތުލެޓިކޯ މެޑްރިޑަށް ވަނީ 26 މެޗުން 45 ޕޮއިންޓް ލިބިފަ އެވެ. ބާސެލޯނާ ފަސް ވަނައިގައި އޮތީ 24 މެޗުން 42 ޕޮއިންޓް ހޯދައިގެންނެވެ.
މެޗު ފަށައިގެން ފުރަތަމަ މިނިޓްގައި ރެއާލްގެ މާކޯ އަސެންސިއޯ ޖެހި ބޯޅަ ވަޔެކާނޯ ގޯލުގައި ހުރި ޒިނެދީން ޒިދާންގެ ދަރިފުޅު ލޫކަ ޒިދާން ވަނީ ދިފާއުކޮށްފަ އެވެ. ވަޔެކާނޯގެ ސާޖިއޯ ގާޑިއޯލާ ބޮލުން ފޮނުވާލި ހަމަލާ އަމާޒުވީ ކީޕަރު ތިބައު ކޯޓުއާ އަތަށެވެ. އޭގެ ފަހުން އަސެންސިއޯ ޖެހި ދެ ވަނަ ބޯޅަ ވެސް ލޫކަ ވަނީ މަތަކޮށްފަ އެވެ.
ފުރަތަމަ ހާފު ނިމުމުގެ ކުރިން ކަސެމީރޯ ރެއާލަށް ގޯލެއް ޖަހައިދިން ނަމަވެސް ރެފްރީ އެ ގޯލު ބަލައިނުގަތީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، އޮފްސައިޑް ކަމަށް ފެންނާތީ އެވެ. ދެ ވަނަ ހާފްގެ ފުރަތަމަ ހަމަލާ ފޮނުވާލީ ވަޔެކާނޯގެ މާރިއޯ ސުއާރޭޒް އެވެ. ކޯނަރަކުން ހުރަސްވި ބޯޅައެއްގައި ސުއާރޭޒް ބޮލުން ޖެހި ބާރު ބޯޅަ ކީޕަރު ކޯޓުއާ ވަނީ މަތަކޮށްފަ އެވެ.
މެޗުގެ 80 ވަނަ މިނިޓްގައި ވަޔެކާނޯގެ އަލްވާރޯ ގާސިއާ އޭރިއާތެރެއިން ޖެހި ބޯޅައެއް މެޗުގައި މޮޅަށް ކުޅުނު ކޯޓުއާ ވަނީ ހުއްޓުވައިފަ އެވެ. އޭގެ ތިން މިނިޓް ފަހުން ރެއާލް މޮޅުވި ގޯލު ޖެހިއިރު، އޭގެއިން ފެނުނީ ބެންޒެމާ އާއި ވިނީޝިއުސް ޖޫނިއާގެ ކޮމްބިނޭޝަން އެވެ. އޭރިއާތެރެއިން ދެ ކުޅުންތެރިން ހެދި ވަންޓޫ އަކަށް ފަހު ބެންޒެމާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ސެލްޓަ ވީގޯ ކޮޅަށް އެތުލެޓިކޯގެ ދެ ގޯލު ޖެހީ ވެސް ބްރެޒިލްގެ ފުލްބެކް ރެނާން ލޯޑީ އެވެ.
