މެންޗެސްޓާ (26 ފެބްރުއަރީ) - ރަޝިއާގެ އަސްކަރިއްޔާ އިން ޔޫކްރޭނަށް ދެމުންދާ ހަމަލާތަކާ ގުޅިގެން، ރަޝިއާގެ ގައުމީ އެއާލައިން "އެއިރޯފްލޮޓް"އާ އެކު ހަދާފައިވާ ސްޕޮންސާޝިޕް އެއްބަސްވުން ކުރިއަށް ނުގެންދިއުމަށް މެންޗެސްޓާ ޔުނައިޓަޑުން ނިންމައިފި އެވެ.
ރަޝިއާ އިން ޔޫކްރޭނާ ދެކޮޅަށް ދެމުންދާ ހަމަލާތަކާ ގުޅިގެން، އިނގިރޭސިވިލާތުގެ ސަރުކާރުން ވެސް ވަނީ ރަޝިއާއާ ދެކޮޅަށް ފިޔަވަޅުތަކެއް އަޅައިފަ އެވެ. އެގޮތުން، ރަޝިއާގެ ފްލައިޓުތައް އިނގިރޭސިވިލާތުގެ ވައިގެ ސަރަހައްދު ބޭނުންކުރުން ވަނީ މަނާކޮށްފަ އެވެ.
ޔުނައިޓަޑްގެ ޕާޓްނަރެއްގެ ގޮތުގައި އެއިރޯފްލޮޓް ހަމަޖެއްސީ 2013 ވަނަ އަހަރެވެ. އަދި ޔޫރަޕްގެ މުބާރާތްތަކުގައި، ޔުނައިޓަޑުން ކުރަންޖެހޭ ދަތުރުތައް އާންމުކޮށް ކުރަނީ އެއިރޯފްލޮޓް އެއާލައިނުގަ އެވެ. މިހާރު ޔުނައިޓަޑާއި އެއިރޯފްލޮޓް ހަދާފައިވާ ސްޕޮންސާޝިޕް އެއްބަސްވުން ހަމަވާނީ 2023 ވަނަ އަހަރެވެ.
ޔުނައިޓަޑުން ނެރުނު ބަޔާނެއްގައި ބުނެފައިވަނީ ޔޫކްރޭންގައި ހިނގަމުންދާ ކަންތައްތަކާ ގުޅިގެން، އެއިރޯފްލޮޓާއެކު ހަދާފައިވާ ސްޕޮންސާޝިޕާ އެކު އިތުރަށް ކުރިއަށް ނުދާން ނިންމާފައިވާ ކަމަށެވެ.
"ދުނިޔޭގެ އެކި ކަންކޮޅުތަކުގައި ތިބި މި ކްލަބުގެ ސަޕޯޓަރުންގެ ޝުއޫރުތައް މި ކްލަބުން ބަލައިގަންނަން. މި ދަނޑިވަޅުގައި، ހާލުގައި ޖެހިފައިވާ ހުރިހާ ފަރާތްތަކަށް ހަމްދަރުދީވަން،" ޔުނައިޓަޑްގެ ބަޔާނުގައި ބުނެފައިވެ އެވެ.
ޔުނައިޓަޑުން އެއިރޯފްލޮޓާއެކު ހަދާފައިވާ ސްޕޮންސާޝިޕް ނިންމާލިކަމަށް އިއުލާންކުރި ނަމަވެސް، އެއިރޯފްލޯޓްގެ ވެބްސައިޓްގައި އެ އެއާލައިންގެ ޕާޓްނަރެއްގެ ގޮތުގައި ޔުނައިޓަޑްގެ ނަން އަދިވެސް އެބައޮތެވެ. -- އޭއެފްޕީ
