މިހާރު ކުރިއަށްދާ 15 ވަނަ ގައުމީ ބާސްކެޓްބޯޅަ ލީގުގެ ދެ ވަނަ ޑިވިޝަންގެ ގްރޫޕް ސްޓޭޖުގެ މެޗުތައް ނިމި ގަދަ ހަ ޓީމާ އެކު ލީގުގެ ބުރުގެ ކުޅުން މިރޭ ފަށާނެ އެވެ.
ދެ ވަނަ ޑިވިޝަންގައި ވާދަކުރި ނުވަ ޓިމު ދެ ގްރޫޕަކަށް ބަހާލާފައިވާއިރު، ލީގު ބުރުން ފުރުސަތު ލިބުނީ ކޮންމެ ގްރޫޕެއްގެ ގަދަ ތިން ޓީމެވެ. އެއްވެސް މެޗަކުން ބަލިނުވެ، ގްރޫޕް އޭގެ އެއް ވަނަ ހޯދީ ވައިޕާސް ބީސީ އެވެ. ދެ ވަނަ ރޯޔަލްސް ހޯދިއިރު ތިން ވަނަ ހޯދީ ވުލްވްސް އެވެ. ހަތަރު ވަނަ އަދި ފަސް ވަނަ އަށް ދިޔަ ދެ ޓީމު ކަމަށްވާ ނައިޓްސް ބީސީ އާއި ވައިކިންސް ބީސީ ވަނީ މުބާރާތުން ކަޓައިފަ އެވެ.
ގްރޫޕް ބީގެ އެއް ވަނަ ހޯދީ ސްޕާޓަންސް ބީސީ އެވެ. ދެ ވަނަ ޓަލަންސް ބީސީ ހޯދިއިރު ޔޫއެން ފްރެންޑްސް ދިޔައީ ތިން ވަނަ އަށެވެ. ގްރޫޕް ސްޓޭޖުގައި ކުޅުނު ތިން މެޗުން ވެސް ބަލިވެ ހުޅުމާލެ ސްޕޯޓްސް ކުލަބު ވަނީ މުބާރާތުން ކަޓައިފަ އެވެ.
ލީގު ބުރުގެ ކުޅުން ފަށަނީ ޓަލަންސް އާއި ޔޫއެން ފްރެންޑްސް ވާދަކުރާ މެޗުންނެވެ. ދެ ވަނަ ޑިވިޝަންގައި މިރޭ ކުޅޭނީ އެ މެޗު އެކަންޏެވެ.
ފަނަރަ ވަނަ ގައުމީ ބާސްކެޓްބޯލަ ލީގުގައި މިއަދު ދެން ކުޅެން ހަމަޖެހިފައި އޮތީ ފުރަތަމަ ޑިވިޝަންގެ ފުރަތަމަ ބުރުގެ ފަހު ދެ މެޗެވެ. ހަވީރު ބައުސް ނުކުންނާނީ ސްޓިންގާސްއާ ދެކޮޅަށެވެ. މިރޭ ހަތެއް ޖަހާއިރު ރެޕްޓާސް ނުކުންނާނީ ޓީރެކްސް ބީސީއާ ދެކޮޅަށެވެ.
މުބާރާތުގެ އަންހެން ޑިވިޝަންގެ ނަތީޖާތަކަށް ބަލާއިރު، ކުޅުނު ތިން މެޗުވެސް ކާމިޔާބުކޮށް ސައިކްލޯން މިވަގުތު އޮތީ އެއްވަނައިގައެވެ. ސައިކްލޯން އެންމެ ފަހުން ކުޅުނު މެޗު ކާމިޔާބުކުރީ ކީންސް ސްޕޯޓްސް ކުލަބާއި ވާދަކޮށްގެންނެވެ. މި މެޗު ސައިކްލޯނުން ކާމިޔާބުކުރީ 126 ޕޮއިންޓް 12 ޕޮއިންޓުންނެވެ. މެޗުގެ މޮޅު ކުޅުންތެރިޔާގެ މަގާމް ހޯދި ޝައިލާން އަފްޒަލް މެޗުގައި 35 ޕޮއިންޓް ސައިކްލޯނަށް ހޯދައިދިނެވެ.
މުބާރާތުގައި އިއްޔެ ކުއީންސް ބީސީ އިންވަނީ އެލީޓް ބަލިކޮށް ދެވަނަ މޮޅު ހޯދާފައެވެ. އެލީޓާއި ކުއީންސް ވާދަކުރި މެޗު ކުއީންސް ކާމިޔާބުކުރީ 89 ޕޮއިންޓް 64 ޕޮއިންޓުންނެވެ. މެޗުގެ މޮޅު ކުޅުންތެރިޔާގެ މަގާމް ހޯދި ޝިއުރާ އަބްދުލްބާރީ ވަނީ ކުއީންސްއަށް 29 ޕޮއިންޓް ސްކޯ ކޮށްދީފައެވެ.
އިއްޔެގެ ފަހު މެޗުގައި ބެންޗުންވަނީ ޒުވާން ކުޅުންތެރިން ހިމެނޭ ލަޔަނެސްގެ މައްޗަށް ބޮޑު މޮޅެއް ހޯދާފައެވެ. މި މެޗު ބެންޗުން ކާމިޔާބުކުރީ 103 ޕޮއިންޓް 36 ޕޮއިންޓުންނެވެ. މެޗުގައި ބެންޗުގެ އިސްރާއު 58 ޕޮއިންޓް އެޓީމަށް ސްކޯ ކޮށްދިނެވެ.
