މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގެ އަހަރުގެ ފުރަތަމަ މުބާރާތް ކަމަށްވާ 8 ބޯލް އެސޯސިއޭޝަން ކަޕް 2022 ފަށައިފި އެވެ.
ރޭ ފެށި 8 ބޯލް އެސޯސިއޭޝަން ކަޕުގައި މި އަހަރު 78 ކުޅުންތެރިން ވާދަކުރެ އެވެ. މުބާރާތް ރޭވިފައިވާ ގޮތަށް ބަލާއިރު، ގްރޫޕް ސްޓޭޖް ކުޅުމަށް ފަހު ކޮންމެ ގްރޫޕަކުން އެންމެ މޮޅު ދެ ކުޅުންތެރިން ނޮކްއައުޓް ބުރަށް ދަތުރުކޮށް ކުރިއަށްދާނެ އެވެ. މިގޮތުން 78 ކުޅުންތެރިން ވަނީ 16 ގްރޫޕަކަށް ބަހާލައިފަ އެެވެ. ގްރޫޕް ސްޖޭޖުގައި އެކަނި ވެސް މިފަހަރު 144 މެޗު ކުޅޭނެ އެވެ.
އެސޯސިއޭޝަން ކަޕްގައި މި އަހަރު ދެ ޑިވިޝަނެއް ނުހިމެނެ އެވެ. އެހެން ކަމުން އަންހެން އަދި ފިރިހެން ކުޅުންތެރިން މިކްސްކޮށް ކުޅޭނީ ގްރޫޕް ސްޓޭޖުގަ އެވެ.
8 ބޯލް އެސޯސިއޭޝަން ކަޕްގެ ނަމުގައި ރޭ ފެށި ބިލިއާޑް މުބާރާތުގެ މެޗެއްގެ ތެރެއިން.-- ފޮޓޯ: އަބްދުﷲ އިޔާން/ އަދަދު
މިދިޔަ އަހަރުގެ 8 ބޯލް އެސޯސިއޭޝަން ކަޕުގެ ޗެމްޕިއަނަކީ ހުސައިން ފަޔާޒު އެވެ. އަދި ދެ ވަނަ ހޯދީ މުހައްމަދު ޝަރީފް އެވެ.
އެމްޕީބީއޭ އިން މި އަހަރަށް ރާވާފައިހުރި ހަރަކާތްތަކަށް ބަލާއިރު ދިހަ މުބާރާތެއް ވަނީ ތާވަލްކޮށްފަ އެވެ. އެ ގޮތުން މި މަހު ކުރިއަށްދާ 8 ބޯލް އެސޯސިއޭޝަން ކަޕަށް ފަހު އަންނަ މަހު އޮންނާނީ 8 ބޯލް ޗެމްޕިއަންޝިޕެވެ. އޭގެ ފަހުން މެއި މަހު އިންޓަ އޮފީސް ބިލިއާޑް މުބާރާތް އޮންނާނެ އެވެ. ޖޫން މަހު މޯލްޑިވްސް އޯޕަންގެ ނަމުގައި ބައިނަލްއަގްވާމީ މުބާރާތެއް ބާއްވަން ތާވަލްކޮށްފައިވާއިރު، އޮގަސްޓް މަހު އޮންނާނީ 10 ބޯލް އެސޯސިއޭޝަން ކަޕެވެ. އޭގެ ފަހުން 10 ބޯލް ޗެމްޕިއަންޝިޕް އޮންނާނެ އެވެ.
އަހަރުގެ އެންމެ ފަހު ހަތަރު މުބާރާތްތަކަކީ ސެޕްޓެމްބަރު މަހު އޮންނަ 9 ބޯލް އެސޯސިއޭޝަން ކަޕާއި، 9 ބޯލް ޗެމްޕިއަންޝިޕްގެ އިތުރުން އޮކްޓޯބަރު މަހު އޮންނަ ގައުމީ ބިލިއާޑް މުބާރާތާއި ނޮވެމްބަރު މަހު އޮންނަ އިންޓަ އެޓޯލް ބިލިއާޑް މުބާރާތެވެ.
އެމްޕީބީއޭގެ ހޯލްގެ ޖާގަ އިތުރުކޮށް މިދިޔަ އަހަރު އެ ފެސިލިޓީ ހުޅުވާފައިވަނީ ބައިނަލްއަގްވާމީ ފެންވަރުގެ މުބާރާތްތައް ވެސް ބޭއްވޭ ފެންވަރަށް ތަރައްގީ ކުރުމަށްފަހުގަ އެވެ. މާލޭގައި ހުންނަ ގައުމީ ބިލިއާޑް ސެންޓަރުގެ އިތުރުން ހުޅުމާލޭ ސްޕޯޓްސް ކޮމްޕްލެކްސްގައި ވެސް ވަނީ ފެންވަރު ރަނގަޅު ބިލިއާޑް ފެސިލިޓީއެއް ގާއިމްކޮށްފަ އެވެ.
