ނޭޕްލްސް، އިޓަލީ (ފެބްރުއަރީ 25) - ޔޫރޮޕާ ލީގުގައި ރޭ ނަޕޯލީ ދަނޑުގައި 4-2 އިން އެ ޓީމު ބަލިކޮށް ބާސެލޯނާ އިން މުބާރާތުގެ ގަދަ 16 ޓީމުގެ ބުރުން ފުރުސަތު ހޯދައިފި އެވެ.
މިދިޔަ ހަފްތާގައި ބާސެލޯނާ ދަނޑުގައި ކުޅުނު މެޗު ނިމުނީ 1-1 އިން އެއްވަރުވެގެންނެވެ. ރޭ ނަޕޯލީގެ ޑިއޭގޯ މަރަޑޯނާ ސްޓޭޑިއަމްގައި ކުޅުނު މެޗުން މޮޅުވާ ޓީމަކަށް އަނެއް ބުރުގެ ފުރުސަތު އޮތްއިރު އެ ޖާގަ ހޯދީ ބާސެލޯނާ އިންނެވެ.
ބާސެލޯނާ އިން މެޗުގެ އަށް ވަނަ މިނިޓްގައި ލީޑުނެގީ އަޑަމާ ޓްރައޯރޭ ދިން ބޯޅައަކުން ޖޯޑީ އަލްބާ ޖެހި ގޯލުންނެވެ. މެޗުގެ 13 ވަނަ މިނިޓްގައި ފްރެންކީ ޑި ޔޯން ބާސެލޯނާ އަށް ލީޑުނަގައިދިނީ އޭރިއާބޭރުން ގޯލުގެ ދުރު ކަނަށް ބޯޅަ ފޮނުވާލައިގެންނެވެ.
ނަޕޯލީ އަށް ވަނީ ވިކްޓަ އޮސީމެއިން އަށް ކުރި ފައުލަކަށް ދިން ޕެނަލްޓީ އެއް ދީފަ އެވެ. މެޗުގެ 23 ވަނަ މިނިޓްގައި ލޮރެންޒޯ އިންސީނިއޭ ވަނީ އެ ޕެނަލްޓީން ނަޕޯލީގެ ފުރަތަމަ ގޯލު ޖަހައިފަ އެވެ. ފުރަތަމަ ހާފު ނިމުމުގެ ކުރިން ބާސެލޯނާ އިން އަލުން ދެ ގޯލަށް ލީޑުފުޅާކުރި އެވެ. މެޗުގެ 45 ވަނަ މިނިޓްގައި އަލްބާ ނެގި ހުރަހަކުން ޖެރާޑް ޕީކޭ ވަނީ އޭރިއާތެރެއިން ބޯޅަ ކޮންޓްރޯލް ކޮށްލައި ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ދެ ވަނަ ހާފްގެ ކުޅުން ފަށައިގެން މެޗުގެ 59 ވަނަ މިނިޓްގައި ޓްރައޯރޭ ހުސްކޮށްލާފައި އޭރިއާތެރެއިން ޕިއޭ އެމެރިކް އޮބާމަޔަން އަށް ދިން ބޯޅަ އޭނާ ވަނީ ގޯލުގެ މަތީ ކަނަށް އަމާޒުކޮށްލައިފަ އެވެ. މެޗު ނިމެން ތިން މިނިޓަށް ވެފައި ހުއްޓައި ބާސެލޯނާގެ އޭރިއާތެރެއިން ލިބުނު ފުރުސަތެއްގައި ނަޕޯލީގެ މަޓެއޯ ޕޮލިޓާނޯ ވަނީ ގޯލެއް ޖަހައިފަ އެވެ. އިތުރު ގޯލެއް ޖަހަން ނަޕޯލީން ކުރި މަސައްކަތް ކާމިޔާބެއްނުވެ، 5-3 ގެ އެގްރިގޭޓުން ބަލިވެ، އެ ޓީމު ކެޓީ އެވެ.
ޔޫރޮޕާ ލީގުގައި ރޭ ކުޅުނު އެހެން ފާހަގަކޮށްލެވޭ މެޗުތަކަށް ބަލާއިރު، ޕޯޓޯ އާއި ލާޒިއޯ 2-2 އިން އެއްވަރުވެ، ޕޯޓޯ އަނެއް ބުރަށް ދިޔައީ އެގްރިގޭޓުން ކުރިހޯދައިގެންނެވެ. ރޭންޖާސް އާއި ބޮރޫޝިއާ ޑޯޓްމަންޑްގެ މެޗު ވެސް ނިމުނީ 2-2 އިން އެއްވަރުވެގެންނެވެ. ރޭންޖާސް އަށް ކުރި ލިބުނީ 6-4ގެ އެގްރިގޭޓް ނަތީޖާ އަކުންނެވެ. ކްރޮއޭޝިއާގެ ޑިނަމޯ ޒަގްރެބް ދަނޑުގައި 1-0 އިން ސެވިއްޔާ ބަލިވި ނަމަވެސް 3-2 ގެ އެގްރިގޭޓުން ކުރި ލިބުމުން އަނެއް ބުރުގެ ފުރުސަތު ލިބުނީ ސެވިއްޔާ އަށެެވެ.
