ލިވަޕޫލް (ފެބްރުއަރީ 24) - އިނގިރޭސި ޕްރިމިއާ ލީގުގައި މިރޭ 6-0 އިން ލީޑްސް ޔުނައިޓެޑް ބަލިކޮށް ލިވަޕޫލުން ލީގުގެ އެއް ވަނައިގައި އޮތް މެންޗެސްޓާ ސިޓީގެ ލީޑު ތިން ޕޮއިންޓަށް ކުޑަކޮށްފި އެވެ.
ސިޓީ އެއް ވަނައިގައި އޮތީ 26 މެޗުން 63 ޕޮއިންޓާ އެކު އެވެ. މިރޭގެ މޮޅާ އެކު ލިވަޕޫލް ދެ ވަނައިގައި އޮތީ 26 މެޗުން 60 ޕޮއިންޓް ހޯދައިގެންނެވެ. ތިން ވަނައިގައި އޮތް ޗެލްސީ އަށް 25 މެޗުން 50 ޕޮއިންޓް ލިބިފައިވާއިރު، ޔުނައިޓެޑް ހަތަރެއްގައި އޮތީ 26 މެޗުން 46 ޕޮއިންޓާ އެކު އެވެ. ގަދަ ހަތަރެއްގެ ރޭހުގައި ވާދަކުރަމުން އަންނަ ޓޮޓެންހަމް ހޮޓްސްޕާސް މިރޭ ވަނީ ރެލިގޭޝަނުގައި އޮތް ބާންލީ އަތުން 1-0 އިން ބަލިވެފަ އެވެ. ޓޮޓެންހަމް އަށް ވަނައިގައި އޮތީ 24 މެޗުން 39 ޕޮއިންޓާ އެކު އެވެ.
ލިވަޕޫލް ދަނޑުގައި މިރޭ ކުޅުނު މެޗު ފަށައިގެން 15 ވަނަ މިނިޓްގައި އެ ޓީމުން ލީޑުނެގީ މުހައްމަދު ސަލާހު ޖެހި ޕެނަލްޓީންނެވެ. މިއީ އެންޑީ ރޮބަޓްސަން ނެގި ހުރަހެއް ލީޑްސްގެ ސްޓުއާޓް ޑަލަސް އަތުގައި ޖެހުމުން ދިން ޕެނަލްޓީ އެކެވެ. ލީޑްސްގެ ރަފީނިއާ އެއްވަރުކޮށްދޭން ޖެހި ގޯލު ވަނީ އޮފްސައިޑްވެފަ އެވެ. މެޗުގެ 30 ވަނަ މިނިޓްގައި ސަލާހު ދިން ބޯޅައަކުން ޖޮއެލް މަޓިޕް ވަނީ ލިވަޕޫލްގެ ދެ ވަނަ ގޯލު ޖަހައިފަ އެވެ. އޭގެ ފަސް މިނިޓް ފަހުން ސަލާހު ވަނީ ދެ ވަނަ ޕެނަލްޓީއެއް ކާމިޔާބުކޮށް ލިވަޕޫލްގެ ތިން ވަނަ ގޯލު ޖަހައިފަ އެވެ. މިއީ ސަޑިއޯ މާނޭ އަށް ލީޑްސްގެ ކެޕްޓަން ލޫކް އެއިލިން ކުރި ފައުލަކަށް ރެފްރީ ދިން ޕެނަލްޓީއެކެވެ.
މެޗުގައި ލިވަޕޫލްގެ ފަހު ތިން ގޯލު ޖެހީ އިތުރު ވަގުތު ހިމެނޭ ގޮތަށް މެޗުގެ ފަހު 13 ވަރަކަށް މިނިޓް ތެރޭގަ އެވެ. ބަދަލެއްގެ ގޮތުގައި ކުޅެން އެރި ޖޯޑަން ހެންޑަސަން ދިން ބޯޅައަކުން މާނޭ މެޗުގެ 80 ވަނަ މިނިޓްގައި ލިވަޕޫލްގެ ހަތަރު ވަނަ ގޯލު ޖެހިއިރު، 90 ވަނަ މިނިޓްގައި އޭރިއާތެރެއިން ލިބުނު ބޯޅައެއް ގޯލަށް ވައްދާލައި މާނޭ އިތުރު ގޯލެއް ޖެހި އެވެ. އޭގެ ފަހުން މެޗުގެ އިތުރު ވަގުތުގައި ވާޖިލް ވެން ޑައިކް ލިވަޕޫލްގެ ހަ ވަނަ ގޯލު ޖެހީ ރޮބަޓްސަން ނެގި ކޯނަރަކުން ބޮލުންނެވެ.
ރޯއީ ހޮޖްސަން ކޯޗުކޮށްދޭ ވަޓްފޯޑް އަތުން އޭނާ ކުރިން މަސައްކަތްކުރި ކްރިސްޓަލް ޕެލަސް ވަނީ 4-1 އިން މޮޅުވެފަ އެވެ. ކްރިސްޓަލް ޕެލަސްގެ ގޯލުތައް ޖެހީ ވިލްފްރިއެޑް ޒަހާ ދެ ގޯލާއި ޖިއާން މިކޭލް މަޓޭޓާ އަދި ކޮނާ ގަލަގާ އެވެ. ވަޓްފޯޑްގެ ހަމައެކަނި ގޯލު ޖެހީ މުހައްމަދު ސިސޯކޯ އެވެ.
ހޮނިހިރު ދުވަހުގެރޭ މެންޗެސްޓާ ސިޓީ ބަލިކުރި ޓޮޓެންހަމަށް މިރޭ ބާންލީގެ ޑިފެންސް ފޫއަޅުވައިނުލެވުނެވެ. ބާންލީ މޮޅުކޮށްދިން ގޯލު ޖެހީ އެ ޓީމުގެ ފަހަތަށް ކުޅޭ ބެން މީ އެވެ.
