ގައުމީ ބާސްކެޓްބޯޅަ ލީގުގެ ފުރަތަމަ ބުރުގައި ކިންގްސް ބާސްކެޓްބޯޅަ ކުލަބާއި ޓީރެކްސް ބާސްކެޓްބޯޅަ ކްލަބް އިއްޔެ ވާދަކުރި މެޗުގައި ޓީރެކްސްގެ ކެޕްޓަން ހުސައިން ހަލީމް (ޗިކަނޭ) އަށް ބޮޑު އަނިޔާއެއް ވެއްޖެ އެވެ.
ޗިކަނޭ އަށް އަނިޔާވީ ކިންގްސް އަތުން ޓީރެކްސް ބަލިވި މެޗުގެ އެންމެ ފަހު ކުއާޓާގެ ފަސް ވަނަ މިނެޓުގައެވެ.
ކިންގްސް ޑެކޯރޭ ޖޯންސް އޭޓެކަށް އެރި ވަގުތު އެ ބޯޅަ ޑިފެންކުރަން އުޅުމުގެ ތެރޭގައި ވެއްޓި ލިބުނު ސީރިއަސް އަނިޔާއަށް ވަގުތުން ވަނީ ހޮސްޕިޓަލަށް ގެންގޮސްފަ އެވެ. ޗިކަނޭ ޑިފެންސަށް އެރި ވަގުތު ދެ ކުޅުންތެރިން އެއްކޮށް ކަހަލަގޮތަކަށް ވެއްޓި ފްލޯގައި އޭނާގެ ބޯ ޖެހުނެވެ. އެޓޭކަށް އެރި ޑެކޯރޭ ވެއްޓުނީ ޗިކަނޭގެ ގައި މައްޗަށެވެ.
ކިންގްސްއާ ދެކޮޅަށް އިއްޔެ ކުޅުނު މެޗުގެ ތެރެއިން ޗިކަނޭ ޕޮއިންޓެއް ސްކޯކުރަނީ.-- ފޮޓޯ: މޯލްޑިވްސް ބާސްކެޓްބޯލް އެސޯސިއޭޝަން/ އަބްދުﷲ އަބީދު
ޗިކަނޭ އަށް އަނިޔާވުމާ އެކު ފެނުނީ ކުޅިވަރުގެ ރީތި ނަމޫނާ އެކެވެ. ބާސްކެޓްބޯޅަ އާއިލާގެ ބަދަހިކަމާއި އެއްބައިވަންތަކަމެވެ. ދެ ޓީމުގެ ކުޅުންތެރިންނާއި އޮފިޝަލުން ވަނީ ޗިކަނޭ އަށް ފަރުވާ ދިނުމަށް އަވަސްވެގެންފަ އެެވެ. އަދި އެންބިއުލާންސް ގެނެސް އޭނާ ފޮނުވީވެސް ދެ ޓީމުގެ ކުޅުންތެރިންނާއި މެޗު ބަލަން އައިސްތިބި ސަޕޯޓަރުންގެ އެހީތެރިކަމާ އެކުގަ އެވެ.
ޗިކަނޭ އަށް އަނިޔާވި ވަގުތު ހިނގައިދިޔަ ކަންތައްތައް ސިފަކުރައްވަމުން މޯލްޑިވްސް ބާސްކެޓްބޯޅަ އެސޯސިއޭޝަންގެ ރައީސް އަހުމަދު އާދަމް ވިދާޅުވީ ޗިކަނޭ ވެއްޓި އަނިޔާވި ވަގުތު ވާދަވެރިކަން މަޑު ޖައްސާލައި އޭނާ ހޮސްޕިޓަލަށް ގެންގޮސް އަވަސް ފަރުވާއެއް ދިނުމަށް މުޅި ބާސްކެޓް އާއިލާ އެއްކޮށް އެހީވި ކަމަށެވެ.
މެޗުގައި އިދިކޮޅަށް ކުޅުނު ކިންގްސްގެ ކުޅުންތެރިންނާއި، ކުޅިވަރު އެކުވެނި އިންޑޯ ކޯޓުގައި މެޗު ބަލަން އައިސް ތިބި އެހެން ކްލަބުތަކުގެ ކުދިން ވެސް އެހީވެވޭނެ ގޮތްތަކެއް ހޯދައި އެންބިއުލާންސް އަންނަން ވާއިރަށް ސައިކަލްތައް ދުރައް ޖައްސާ މަގު ހަދައިދިނެވެ. އަދި ޗިކަނޭ ކޯޓުން ނެރެގެން ގެންދިޔަ ވަގުތު އެންމެން ހިތްވަރު ދިންކަން އެޑަމް ފާހަގަކުރެއްވި އެވެ.
"ދެ ކްލަބްގެ ކުދިން ދިޔައީ ޗިކަނޭ އަށް ހިތްވަރުދެމުން. ގައުމީ ޓީމުގެ ތިން ކޯޗުން ދިޔަކީ ކުރެވެން ހުރި ކަމެއްކުރަމުން. ޗިކަނޭގެ ސްޓްރެޗަރުގައި ހިފައިގެންތިބީ މުޅި ބާސްކެޓް އާއިލާ" އެޑަމް ވިދާޅުވި އެވެ.
ޗިކަނޭ އަށް މިވަގުތު ފަރުވާދެމުން އަންނަނީ ހޮސްޕިޓަލުގަ އެވެ. އޭނާއަށް ހެޔޮދުއާގެ މެސެޖުތައް މުޅި ކުޅިވަރުގެ އާއިލާއިން ދަނީ ފޯރުކޮށްދެމުންނެވެ.
ޓީރެކްސްގެ އޮފިޝަލަކު "އަދަދު" އަށް ބުނީ ޗިކަނޭގެ އަނިޔާ ދެެނެގަންނަން އިތުރު ޓެސްޓްތަކެއް ހަދަމުން އަންނަ ކަމަށާއި ދެން މި މުބާރާތުގައި ކުޅެވުމުގެ ފުރުސަތު ނެތް ކަމަށެވެ. އަދި މިހާރު އެންމެ އިސްކަމެއް ދެނީ ޗިކަނޭގެ ރިކަވަރީ ވީ އެންމެ ރަނގަޅަކަށް ގެންދިއުމަށް ކަމަށް ޓީރެކްސް އިން ބުނެފައިވެ އެވެ.
