ލިވަޕޫލް (ފެބްރުއަރީ 23) - އެންމެ ފަހުން ކުޅުނު މެޗުން މެންޗެސްޓާ ސިޓީ ބަލިވެފައި އޮތް ކަމުގައި ވިޔަސް އަދިވެސް ލީގުގެ ފޭވަރިޓަކީ ސިޓީ ކަމަށް ލީގުގެ ދެ ވަނައިގައި އޮތް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ސިޓީ ވަނީ މިދިޔަ ހޮނިހިރު ދުވަހުގެރޭ އަމިއްލަ ދަނޑުގައި ޓޮޓެންހަމް ހޮޓްސްޕާސް އަތުން 3-2 އިން ބަލިވެފަ އެވެ. މިރޭ ލިވަޕޫލުން ލީގުގައި އަމިއްލަ ދަނޑުގައި ލީޑްސް ޔުނައިޓެޑް ބަލިކޮށްފިނަމަ އެއް ވަނައިގައި ސިޓީގެ ލީޑު ތިން ޕޮއިންޓަށް ކުޑަވާނެ އެވެ. ސިޓީ މި ވަގުތު އެއް ވަނައިގައި އޮތީ 26 މެޗުން 63 ޕޮއިންޓާ އެކު އެވެ. ދެ ވަނައިގައި އޮތް ލިވަޕޫލަށް 25 މެޗުން ލިބިފައިވަނީ 57 ޕޮއިންޓެވެ.
މިރޭ ލީޑްސްއާ ދެކޮޅަށް ކުޅެން އޮތް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކްލޮޕް ބުނީ އަބަދުވެސް ފޭވަރިޓަކަށްވާނީ ކުރީގައި އޮންނަ ޓީމު ކަމަށެވެ.
"އަހަރެމެންނަށް އޮތް ހާލަތު ބަދަލެއް ނުވޭ. ހުރިހާ މެޗަކުން މޮޅުވުން ނޫން ގޮތެއް ނެތް. ސިޓީ ހުރިހާ މެޗަކުން މޮޅުވެއްޖިއްޔާ އެ މީހުންނަކީ ޗެމްޕިއަނުން. ތި މީހުންނަށް ތަސައްވުރު ކުރަން ފަސޭހަ ގޮތެއް އެއީ ސިޓީ ހުރިހާ މެޗަކުން މޮޅުވާނެކަން. އަހަންނަށް ވެސް އެ ގޮތަށް ވިސްނޭތީ އަދިވެސް ފޭވަރިޓެއް ބުނަންޏާ ސިޓީ ކަމަށް މި ބުނަނީ،" ކްލޮޕް ބުންޏެވެ.
ލީޑްސް އޮތީ ރެލިގޭޝަނުގައި ކަމަށް ވިސްނައިގެން މިރޭ އެ ޓީމާ ދެކޮޅަށް ކުޅޭ މެޗު ފަސޭހަކޮށްލައިފިނަމަ އޭގެ ގެއްލުން ލިވަޕޫލަށް ވަރަށް ބޮޑުވާނެ ކަމަށް ކްލޮޕް ދެކެ އެވެ. ކްލޮޕް ބުނީ ދަނޑުމަތީގައި "ނިދާފައި" ތިބެ ކުޅެގެން ލީޑްސް ބަލިކުރެވޭނެ ކަމަށް ދެކުމަކީ ގޯހަކަށްވާނެ ކަމަށެވެ.
މިރޭ ލީޑްސްއާ ދެކޮޅަށް ޓީމު ނެރޭނީ އަންނަ އާދިއްތަ ދުވަހުގެރޭ ޗެލްސީއާ ދެކޮޅަށް ކުޅޭ ލީގު ކަޕް ފައިނަލް މެޗަށް ވިސްނުން ބަހައްޓައިގެންތޯ ކްލޮޕާ ސުވާލުކުރުމުން ބުނީ މި ވަގުތު ސިކުނޑީގައި ހުރީ ލީޑްސް މެޗުގެ ކަންތައްތައް ކަމަށެވެ.
އަނިޔާގެ ސަބަބުން މިރޭގެ މެޗުގައި ވެސް ލިވަޕޫލްގެ ޑިއޯގޯ ޖޮޓާ އާއި ރޮބާޓޯ ފިރްމީނޯ ނުކުޅޭނެ ކަމަށް ކްލޮޕް ވަނީ ބުނެފަ އެވެ. އަދި އެ ދެ ކުޅުންތެރިން ލީގު ކަޕް ފައިނަލަށް ފިޓްވާނެތޯ އުފެދިފައިވާ ސުވާލަށް ޖަވާބުދޭން އަދި އަވަސް ކަމަށް ކްލޮޕް ވަނީ ބުނެފަ އެވެ.
ލީޑްސް އިން 2001 ވަނަ އަހަރު ލިވަޕޫލް ދަނޑުގައި މޮޅުވި ފަހުން ދެން އެ ޓީމާ ދެކޮޅަށް ކުޅުނު 11 މެޗުން ވެސް މޮޅެއް ނުހޯދެ އެވެ. ލިވަޕޫލުން ވަނީ ހުރިހާ މުބާރާތެއްގައި އެ ޓީމު އެންމެ ފަހުން ކުޅުނު އަށް މެޗުން މޮޅުވެފަ އެވެ. އޭގެ ތެރޭގައި އިނގިރޭސި ޕްރިމިއާ ލީގުގެ ފަަސް މެޗު ހިމެނެ އެވެ.
ލިވަޕޫލާއި ލީޑްސް ކުޅޭ މެޗު ފަށާނީ ރާއްޖެ ގަޑިން މިރޭ 1 ޖަހާއިރު އެވެ.
