ރާއްޖޭގެ ހުރިހާ ރަށަކަށް ބައިވެރިވެވޭ ގޮތަށް ހިންގޭ އެންމެ ފޯރިގަދަ ފުޓްސަލް މުބާރާތް ކަމަށްވާ ގޯލްޑަން ފުޓްސަލް ޗެލެންޖްގެ މި ފަހަރުގެ މެޗުތައް ލައިވްކޮށް ދެއްކުމުގައި ދިމާވާ އެންމެ ބޮޑު ގޮންޖެހުމަކީ ސައިބާ އެޓޭކްތަކެއް ކުރިމަތިވުން ކަމަށް ގޯލްޑަން ފުޓްސަލް އެސޯސިއޭޝަނުން ބުނެފި އެވެ.
މި މަހު 19 ވަނަ ދުވަހު ގޯލްޑަން ފުޓްސަލް އެސޯސިއޭޝަނުން 91 ޓީމާ އެކު ކުޅޭ މި އަހަރުގެ މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022"ގެ މެޗުތައް ވަނީ ފަށައިފަ އެވެ. މިހާތަނަށް ކުޅުނު ގިނަ މެޗުތަކެއް ލައިވްކޮށްފައިވާއިރު، ރޭގެ މެޗުތައް ލައިވްކުރުމުގައި ގިނަ ގޮންޖެހުންތަކެއް ކުރިމަތިވިކަމަށް ގޯލްޑަން ފުޓްސަލް އެސޯސިއޭޝަނުން ވަނީ ބުނެފަ އެވެ.
ގޯލްޑަން ފުޓްސަލް އެސޯސިއޭޝަންގެ ރައީސް ރިލްވާން މޫސާ "އަދަދު" އަށް ވިދާޅުވީ ގޯލްޑަން ފުޓްސަލް އެސޯސިއޭޝަންގެ ރަސްމީ ފޭސްބުކް ޕޭޖުން ލައިވްތައް ކުރަމުން ގެންދަނިކޮށް މިދިޔަ ދެ ރޭގައި ވެސް ލައިވް ހުއްޓުމަކަށް އައީ ފުލުފުލުގައި އައި ސައިބާ އެޓޭކްތަކެއްގެ ސަބަބުން ކަމަށެވެ.
ގޯލްޑަން ފުޓްސަލް ޗެލެންޖްގެ ގުރުއަތުލުމުގެ ރަސްމިއްޔާތުގެ ތެރެއިން ރިލްވާން ވާހަކަ ދައްކަވަނީ.-- ފޮޓޯ: މުހައްމަދު ޝާބިން/ އަދަދު
"މި ރާވައިގެން ކުރެވޭ ކަމެއްގެ ގޮތުގައި މި ފެންނަނީ ބޮޓް އައިޑީތަކެއް ބޭނުންކޮށްގެން ޕޭޖް ރިޕޯޓްކުރުމުން މި ފެށެނީ. ދެން ލައިވް ލިންކް ރިޕޯޓް ކޮށްފައި އަޅުގަނޑުމެންގެ ޕޭޖު ހިންގާ މީހުންގެ އެކައުންޓްތައް ވެސް ރިޕޯޓްކޮށް ލައިވް މުޅިން ހުއްޓާލަން ޖެހޭ ފަހަރު ވެސް އެބައާދޭ،" ރިލްވާން ވިދާޅުވި އެވެ.
"މީގެ ހުރިހާ ގޮންޖެހުންތަކަކާ އެކީ ވެސް މެޗުތައް ލައިވްކުރަން އަޅުގަނޑުމެން މަސައްކަތް މި ކުރަނީ. މި ފަދަ ފިޑި އަމަލެއް ބަޔަކު ކުރާތީ އެކަން އަޅުގަނޑުމެން ކުށްވެރިކުރަން. މީގެ އަޅުގަނޑުމެން މި މެޗުތައް ލައިވް ކުރަން އެބަޖެހޭ. އެއީ ރަށްރަށުގެ ބޮޑު ސްކްރީނާއި އިޖުތިމާއީ މަރުކަޒުގައި ޒުވާނުން އެއްވެގެން ތިބެ ބަލާ މުބާރާތެއް މިއީ،"
މި އުނދަގޫ ހާލަތުގައި ވެސް ޓީމުތަކުންނާއި ސްޕޮންސަރުން ދެމުން އަންނަ އެއްބާރުލުމަށް ރިލްވާން ވަނީ ޝުކުރު އަދާކުރައްވައިފަ އެވެ.
މި ފަހަރުގެ ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކީ ސޮނީ ސްޕޯޓްސް އެވެ. ޕްލެޓިނަމް ޕާޓްނަރަކަށް އުރީދޫ މޯލްޑިވްސް އެވެ. އަދި ގޯލްޑް ޕާޓްނަރުންނަކީ ކޮކާކޯލާ އާއި ކުއިކްއެޒީމެރިން (ޑޫސަން) އެވެ. މުބާރާތުގެ ސިލްވާ ޕާޓްނަރުންނަކީ އަލްޝާލީ މެރިން، ފެންސީ ފުޑް އަދި މައި ކޮލެޖެވެ. މުބާރާތުގެ ޕީއާރް ޕާޓްނަރެއްގެ ގޮތުގައި "އަދަދު" ނޫސް މަސައްކަތްކުރާއިރު، އޮންލައިން ޕާޓްނަރެއްގެ ގޮތުގައި "ވަން އޮންލައިން" އާއި "ފަހުމިނެޓް" ވެސް މަސައްކަތްކުރެ އެވެ.
މިހާރު ކުރިއަށްދަނީ މުބާރާތުގެ ހއ އާއި ހދ އަދި ށ އަތޮޅު ބުުރުގެ މެޗުތަކެވެ.
