ޑޯޓްމަންޓް (ފެބްރުއަރީ 20) - ބޮރޫޝިއާ ޑޯޓްމަންޓް މުހިންމު ފޯވަޑް އާލިން ބްރައުޓް ހާލަންޑް އަދިވެސް މުޅިން ފިޓުނުވާ ކަމަށާއި ޖަރުމަން ލީގުގައި މިރޭ ޑޯޓްމަންޑް ކުޅޭ އޭނާ ނުފެންނާނެ ކަމަށް ޑޯޓްމަންޓްގެ ކޯޗު މާކޯ ރޯސް ބުނެފި އެވެ.
ޔޫރޮޕާ ލީގުގައި މިދިޔަ ހަފުތާގައި ރޭންޖާސް އަތުން 4-2 އިން ބަލިވެފައި އޮތުމުން ޖަރުމަން ލީގުގައި މިރޭ ބޮރޫޝިއާ މޮންޗަންގްލެޑްބެކާ ދެކޮޅަށް ކުޅޭ މެޗުން މޮޅުވުމަކީ ޑޯޓްމަންޑަށް މުހިންމު ކަމެެކެވެ. އަމިއްލަ ދަނޑުގައި ރޭންޖާސް އަތުން ބަލިވުމުން ޑޯޓްމަންޑްގެ ކޯޗު ރޯސް އަށް ވަނީ ޕްރެޝަރު ބޮޑުވެފަ އެވެ.
އެކަމަކު، މިރޭގެ މެޗުގައި ވެސް ރޯސް އަށް ޑޯޓްމަންޑްގެ މުހިންމު ފޯވަޑް ހާލަންޑްގެ ބޭނުމެއް ނުހިފޭނެ އެވެ.
އަނިޔާގެ ސަބަބުން، މިދިޔަ މަހުގެ 22 ވަނަ ދުވަހުން ފެށިގެން ހާލަންޑް ހުރީ ކުޅުމާ ދުރުގަ އެވެ. ރޯސް ބުނީ ހާލަންޑް ޓްރެއިނިންގައި ބައިވެރިވިޔަސް، އޭނާ އަދި މުޅިން ފިޓުނުވާ ކަމަށެވެ.
"ބައެއް ޓްރެއިނިންތައް އޭނާ (ހާލަންޑް) ފުރިހަމަކުރި ނަމަވެސް، އޭނާ އަދި މުޅިން ފިޓެއް ނޫން،" ރޯސް ބުންޏެވެ.
ޖަރުމަން ލީގުގައި ޑޯޓްމަންޑް އޮތީ ތާވަލްގެ އެއް ވަނައިގައި އޮތް ބަޔާން މިއުނިކަށް ވުރެ ހަ ޕޮއިންޓް ފަހަތުގަ އެވެ. ޖަރުމަން ކަޕުން ވެސް ޑޯޓްމަންޑް ވަނީ ކަޓައިފަ އެވެ. އެހެންކަމުން، ޔޫރޮަޕާ ލީގަކީ ތައްޓަކަށް ވާދަކުރުމަށް އެ ޓީމަށް އޮތް ރަނގަޅު ފުރުސަތެކެވެ.
އެކަމަކު، އަމިއްލަ ދަނޑުގައި ރޭންޖާސް އަތުން ފުރަތަމަ ލެގުން ބަލިވުމުން، ޔޫރޮަޕާ ލީގުގައި ކުރިއަށް ދިއުމަށް އޮތް މަގު ވަނީ އުނދަގޫވެފަ އެވެ. އަދި މި ނަތީޖާއާ އެކު، ރޯސްގެ މަގާމުގައި ދެމިހުންނާނެ ކަމާ މެދު ވަނީ ސުވާލު އުފެދިފަ އެވެ. -- އޭއެފްޕީ
