މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް ކަމަށްވާ ސޮނީސްޕޯޓްސް ގޯލްޑަން ފުޓްސަލް ޗެލެންޖްގެ މި ފަހަރުގެ މުބާރާތުގެ ކުޅުން ރޭ ފެށުނުއިރު، ހދ. ނޭކުރެންދޫ އާއި ހދ. ނާވައިދޫ 2-2 އިން އެއްވަރުވެއްޖެ އެވެ.
ނުވަދިހަ އެއް ޓީމާ އެކު މި ފަހަރުގެ ގޯލްޑަން ފުޓްސަލް ޗެލެންޖް ބާއްވާއިރު، ރޭ ކުލަ ގަދަ ރަސްމިއްޔާތަކާ އެކު މުބާރާތް ފެށީ އެންމެ ފަހުގެ ޗެމްޕިއަން ތ. ތިމަރަފުށިން މި ފަހަރުގެ މުބާރާތުގެ ތަށި ދައްކާލުމުގެ އިވެންޓަކާ އެކު އެވެ. އެންމެ ފަހުން 2019 ވަަަނަ އަހަރު ބޭއްވި މުބާރާތެކޭ އެއްގޮތަށް މި ފަހަރުގެ މުބާރާތުގެ މެޗުތައް ވެސް ކުޅެނީ ހުޅުމާލެ ރެެހެންދި ފުޓްސަލް ދަނޑުގަ އެވެ.
ރޭ ކުޅުނު ޒޯން އެކެއްގެ ހަ މެޗަށް ބަލާއިރު، އެންމެ ފޯރިގަދަކޮށް ދިޔައީ ނޭކުރެންދޫ އާއި ނާވައިދޫގެ މެޗެވެ. ދެ ވަނަ ހާފު ފެށިގެން ގާތްގާތުގައި ނާވައިދޫ އިން ދެ ގޯލު ޖެހި އެވެ. އަބްދުﷲ ވިސާމް ނާވައިދޫ އަށް ލީޑުނަގައިދިންތާ އިރުކޮޅެއްގެ ތެރޭގައި އަބްދުﷲ ޝާފިއު (ޝާއްޕެ) ވަނީ އެ ޓީމުގެ ލީޑުފުޅާކޮށްދީފަ އެވެ. ލ. ކުނަހަންދޫ އަށް އުފަން ނަމަވެސް މި މުބާރާތަށް ނޭކުރެންދޫ އަށް ރަށްވެހިކަން ބަދަލުކޮށްގެން ގައުމީ ޓީމުގެ ޑިފެންޑަރު ހުސެއިން ސިފާއު ޔޫސުފް (ކުރޯ) ކުޅެނީ އެ ޓީމަށެެވެ.
ނޭކުރެންދޫ އިން މި މެޗުގައި ނަތީޖާ ހަމަހަމަކުރީ ފަހު ވަގުތު ގޯލު ޖަހައިގެންނެވެ. މެޗުގެ 30 ވަނަ މިނިޓްގައި ނޭކުރެންދޫގެ ފުރަތަމަ ގޯލު ޖެހީ މުހައްމަދު ފަރުހާން (ފަރުއްކޮ) އެވެ. މެޗު ނިމެން ގާތްވެފައިވަނިކޮށް ފަރުއްކޮ ދިން ބޯޅައަކުން ނޭކުރެންދޫ އަށް އެއްވަރުކޮށްދިނީ އެ ޓީމުގެ ކެޕްޓަން މުހައްމަދު ވިލްފް އެވެ.
ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗެއްގެ ތެރެއިން.-- ފޮޓޯ: އަބްދުﷲ އިޔާން/ އަދަދު
ރޭ ކުޅުނު ފުރަތަމަ މެޗުގައި ހއ. ހޯރަފުށިން ވަނީ 3-1 އިން ހއ. ވަށަފަރު ބަލިކޮށްފަ އެވެ. ހޯރަފުށީގެ ގޯލު ޖަހައިދިނީ އަބްދުﷲ ޔާމީނާއި އިބްރާހިމް ބިޝާރު އަދި އަލީ ޝިމާހު އެވެ. ވަށަަފަރުގެ ހަމައެކަނި ގޯލު ޖަހައިދިނީ މުހައްމަދު ޒާއިދު މުސްތަފާ އެވެ. ދެ ވަނަ މެޗުގައި ހދ. ކުމުންދޫ ވަނީ 4-2 އިން ހދ. ފިނޭ އަތުން ބަލިވެފަ އެވެ. ފިނޭގެ ހަތަރު ގޯލުގެ ތެރެއިން ދެ ގޯލު ޖެހީ ޝަމީލް ރަޝީދެވެ. އަނެއް ދެ ގޯލު ޖެހީ ކެޕްޓަން އަލީ މިސްބާހާއި މުހައްމަދު އާނިމް އެވެ.
ތިން ވަނަ މެޗުގައި ހދ. ދިއްދޫ އިން ވަނީ 8-1 އިން ހއ. މާރަންދޫ އަތުން ބޮޑު މޮޅެއް ހޯދައިފަ އެވެ. ދިއްދޫގެ ގޯލުތައް ޖެހީ ހައިޝަމް ރަޝީދު ހަތަރު ގޯލާއި ހިޝާމް ހަސަން ވަހީދު، އާދަމް ނަަސީމް އަދި ތައުމީން ނޫހު އެވެ. މާރަންދޫގެ ހަމައެކަނި ގޯލު ކާމިޔާބުކުރީ އިހުސާން ޖަލީލް އެވެ. ރޭ ށ. މިލަންދޫ އިން ވަނީ 2-0 އިން އެ އަތޮޅު ބިލެއްފަހި ބަލިކޮށްފަ އެވެ. މިލަންދޫގެ ގޯލުތައް ޖެހީ ހަސަން ނާސިހު އާދަމް އާއި އަބްދުﷲ ނާޖީ އެވެ.
ށ. ކޮމަންޑޫ އަތުން ށ. ފޯކައިދޫ މޮޅުވީ 3-1 އިންނެެވެ. ފޯކައިދޫގެ ގޯލުތައް ޖެހީ މުހައްމަދު ރިޝްވާން (ފުކޭ)، ހުސެއިން ނަބީހް އަދި އިބްރާހިމް މުޝީރް އެވެ. ކޮމަންޑޫގެ ހަަމައެކަނި ގޯލު ކާމިޔާބުކުރީ ސާމިހު އެެވެ.
މުބާރާތުގައި މިރޭ ވެސް ހަަ މެޗެއް ކުޅޭނެ އެވެ. އެ މެޗުތަކަކީ ހއ. ބާރަށާއި އިހަވަންދޫ ކުޅޭ މެޗާއި ހއ. މުރައިދޫ އާއި ހއ. ކެލާ ކުޅޭ މެޗުގެ އިތުރުން ދެން އޮންނާނީ ހދ. ކުޅުދުއްފުއްޓާއި ހދ. ވައިކަރަދޫ ކުޅޭ މެޗާއި ހދ. ނެއްލައިދޫ އާއި ހދ. މަކުނުދޫ ކުޅޭ މެޗެެވެ. އަދި ށ. މަރޮއްޓާއި ށ. ކަނޑިތީމުގެ މެޗުގެ އިތުރުން ށ. ފީވަކާއި ށ. ގޮއިދޫގެ މެޗު ވެސް މިރޭ އޮންނާނެ އެވެ.
