އުރީދޫ ދިވެހި ޕްރިމިއާ ލީގުގައި މިރޭ މެޗުގެ އިތުރު ވަގުތުގައި ޖެހި ދެ ގޯލާ އެކު ކްލަބް އީގަލްސް އިން ފަހަތުން އަރައި 2-1 އިން ޓީސީ ސްޕޯޓްސް ކްލަބް ބަލިކޮށްފި އެވެ.
މިފަހަރުގެ ލީގަށް ޓީސީން ގެނައި ބިދޭސީ ދެ ކުޅުންތެރިންނަކީ ކުރިން އީގަލްސް އަށް ފަސް ސީޒަނުގައި ކުޅެ އެ ޓީމާ އެކު 2016 ވަނަ އަަހަރުގެ ޕްރެޒިޑެންޓްސް ކަޕް ކާމިޔާބުކުރި ހޯދި ސްރީ ލަންކާ ގައުމީ ޓީމުގެ ކެޕްޓަން ސުޖަން ޕެރޭރާގެ އިތުރުން ޓީސީ އަށް 2017 އަދި 2018 ގައި ކުޅުނު ޑިފެންޑަރު މިސްރުގެ އަލާ އީސާ އެވެ. މި ދެ ކުޅުންތެރިން ވެސް މި މެޗުގެ ފުރަތަމަ އެގާރައިގައި ވަނީ ހިމަނައިފަ އެވެ. އީގަލްސް އިން ވަނީ ލީގަށް އިޓަލީގެ މިޑްފިލްޑަރެއް ކަމަށްވާ ގިއަންކޯމޯ ފަވޭރޯ ގެނެސްފަ އެވެ. އޭނާ އަކީ އެންމެ ފުރަތަމަ މިދިޔަ ސީޒަނުގެ ތިން ވަނަ ޑިވިޝަނަށް އައި ކުޅުންތެރިއެކެވެ.
ކީޕަރު ސުޖަން (ވ) އީގަލްސްގެ އަހުމަދު ހަސަން (އައްމަޑޭ) ކައިރިން ބޯޅަ ހިފައިގެން.-- ފޮޓޯ: މުހައްމަދު ޝާބިން/ އަދަދު
މިރޭގެ މެޗުގެ ފުރަތަމަ ހާފުގެ ފުރަތަމަ 30 މިނެޓަށް ބަލާއިރު ދެ ޓީމުވެސް ފެނުނީ ދާދި އެއްވަރަކަށެވެ. ދެޓީމަށްވެސް މާ ނުރައްކާތެރި ހަމަލާތަކެއް އުފެއްދޭގޮތެއްނުވި އެވެ. ފުރަތަމަ ހާފުގެ ފަހު 15 މިނެޓަށް ބަލާއިރު ދެ ޓީމުން ވެސް ރަނގަޅު ބޯޅަތަކެއް ފޮނުވާލި އެވެ.
އީގަލްސް އަށް ފުރަތަމަ ލިބުނު ފުރުސަތަކީ ކޯނަރަކުން ތަނަވަސްކުރި ފުރުސަތެކެވެ. އީގަލްސްގެ އަހުމަދު ނޫމާން (ހެލްމެޓް) ބޮލުން ފޮނުވާލި ބޯޅަ ގޯލަށް އަމާޒުކޮށްލަން ފުރުސަތު ލިބުނީ އެ ޓީމުގެ ހަސަން ރާއިފް އަހުމަދު (ހަންނަ) އަށެވެ. އޭނާގެ ބޮލުގައި ޖެހިފައި ބޯޅަ ދިޔައީ ބޭރަށެވެ. ފުރަތަމަ ހާފުގައި އީގަލްސްއިން ފޮނުވާލި އެންމެ ނުރައްކާތެރި ހަމަލާ ފޮނުވާލީ ޑިފެންޑަރު ހިސާމް ސަލީމް (ކޮކީ) އެވެ. ކޮކީ ފޮނުވާލި ބޯޅަ ކުޅުމުގެ ތެރެއަށް އައީ ގޯލްގެ އަރިމަތީ ދަނޑީގައި ޖެހިފައެވެ.
ފުރަތަމަ ހާފުގެ އިތުރު ވަގުތުގައި ޓީސީއަށް ލީޑު ނަގައިދިނީ ޓީސީގެ ފޯވާޑް މުހައްމަދު މުސްލިހު (މުއްޓި) ތަނަވަސްކޮށްދިން ފުރުސަތަކުން އަހުމަދު ސާމިއު އެވެ. މުއްޓި އީގަލްސްގެ ޑިފެންޑަރު ފަހަތަށް ކުޅުނު މޮޅު ބޯޅައެއްގައި ކީޕަރު ތާހާ ކުރިއަށް ނުކުތް ވަގުތު ބަލައި ސާމިއު ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
އީގަލްސް ހަންނަ އާއި އަހުމަދު ރިޒުވާން (ރިޒޭ)ގެ ސްޕީޑްގެ ބޭނުންކޮށް އީގަލްސް އިން ހަމަލާތައް އުފައްދަން މުޅި ދެ ވަނަ ހާފަށް ބެލިޔަސް ގިނަ މަސައްކަތްތަކެއް ކުރި އެވެ. ދެ ވަނަ ހާފުގެ ފުރަތަމަ 25 މިނެޓަށް ބަލާއިރު އީގަލްސް އިން އެންމެ ނުރައްކާތެރި ހަމަލާއެއް ފޮނުވާލީ ހަންނަ އެވެ. އަރިމަތިން ލިބުނު ބޯޅަ ހިފައިގެން ވަދެ އޭނާ ނިންމީ ހަނި އޭންގަލުން ގޯލަށް ޖަހާށެވެ. އެކަމަކު، ބޯޅަ އަމާޒުވީ އަރިމަތީ ދާ ގަނޑަށެވެ. އޭގެ މިނެޓެއް ފަހުން ހަންނަ ތިރިތިން ނެގި ބާރު ބޯޅައެއް އޭރިއާތެރޭގައި ހުސްކޮށް އަަރައި ހުރި ރިޒޭ އަށް ލިބުމުގެ ކުރިން ކީޕަރު ސުޖަން ސަލާމަތްކުރި އެވެ.
ރިޒޭ ގޯލު ޖެހުމަށް ފަހު އުފާފާޅުކުރަނީ: އީގަލްސް އިން ނަތީޖާ އަނބުރާލީ އިތުރު ވަގުުތުގައި ދެ ގޯލު ޖަހައިގެން.-- ފޮޓޯ: މުހައްމަދު ޝާބިން/ އަދަދު
އީގަލްސް އިން ނަތީޖާ ހަމަހަމަކުރީ 90 މިނެޓު ހަމަވެގެން ދެއްކި އިތުރު ވަގުތުގެ ފުރަތަމަ މިނެޓުގަ އެވެ. ޓީސީގެ ޑިފެންޑަރެއްގެ ގޮތުގައި މިރޭ ބޭނުންކުރި ސާދު ނިޒާރު ދިފާއުކުރަން މަސައްކަތްކުރި ބޯޅަ ހޯދައި ހަންނަ އޭރިއާ ތެރެއަށް ވަދެ ރިޒޭ އަށް ޖައްސާލުމުން އޭނާ ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ.
އީގަލްސް މެޗުން މޮޅުވީ އިތުރު ވަގުތުގެ އެންމެ ފަހު މިނިޓްގައި ހަންނަ ޖެހި ގޯލުންނެވެ. އީގަލްސްގެ އަބްދުﷲ ސަމީހު މޫސާ އޭރިއާ ތެރެއަށް ނެގި ހުރަހަކުން ހަންނަ ބޮލުން ފޮނުވާލި ބޯޅަ ގޯލަށް ވަނީ އަރިމަތީ ދަނޑީގައި ޖެހި، ކީިޕަރު ސުޖަން އަތުގައި ވެސް ޖެހިފަ އެވެ. ޓީސީގެ ޑިފެންޑަރު އަލާ އެ ބޯޅަ ދިފާއުކުރިއިރު ބޯޅަ އޮތީ ރޮނގު ހުރަސްކޮށްފައެވެ.
ދިވެހި ޕްރިމިއާ ލީގުގެ މެޗެއް ދެން އޮންނާނީ އަންނަ ހޯމަ ދުވަހުގެ ހަވީރެވެ. އެ މެޗުގައި ވާދަކުރާނީ ސުޕަ ޔުނައިޓެޑް (ސަސް) އާއި ޓީސީ އެވެ. ހޯމަ ދުވަހުގެ ރޭ ކުޅޭނީ މާޒިޔާ އާއި އީގަލްސް އެވެ.
