ޕެރިސް (ފެބްރުއަރީ 17) - އަންނަ ސީޒަންގައި ކުޅޭނެ ޓީމެއް އަދި ވެސް ނުނިންމާ ކަމަށާއި، މި ވަގުތު ހުރިހާ ވިސްނުމެއް ހުރީ މި ސީޒަންގައި ޕީއެސްޖީ އަށް ރަނގަޅު ކާމިޔާބެއް ހޯދައިދޭން ކަމަށް އެ ޓީމަށް ކުޅޭ ފްރާންސްގެ ފޯވާޑް ކީލިއަން އެމްބާޕޭ ބުނެފި އެވެ.
ޕީއެސްޖީއާ އެކު އެމްބާޕޭ ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާއިރު، ޕީއެސްޖީން އުއްމީދުކޮށްގެން ހުރީ އާ ކޮންޓްރެކްޓެއްގައި އެމްބާޕޭ ސޮއިކުރާނެ ކަމަށެވެ. މިހާރު އޮތްގޮތުން އެމްބާޕޭ މި ސީޒަން ނިމުމުން ޕީއެސްޖީ ދޫކޮށްލައިފިނަމަ އެ ޓީމަށް އެއްވެސް ޓްރާންސްފާ ފީއެއް ނުލިބޭނެ އެވެ.
އަނެއްކޮޅުން، އެމްބާޕޭގެ ހޯދުމަށް ސްޕެއިންގެ ރެއާލް މެޑްރިޑުން އޮތީ ވިއްދައިފަ އެވެ. އެމްބާޕޭ، ޕީއެސްޖީއާ އެކު އާ ކޮންޓްރެކްޓަކާ ގުޅޭ މަޝްވަަރާތައް ނުކުރާ މައިގަނޑު ސަބަބަކީ ވެސް ރެއާލާ ގުޅެން ބޭނުންވުން ކަމަށް ސްޕެއިނުގެ ނޫސްތަކުން ރިޕޯޓްކުރެ އެވެ.
އެމްބާޕޭ، 22، ވަނީ ޔުއެފާ ޗެމްޕިއަންސް ލީގުގެ ގަދަ 16 ގައި އެންމެ ފަހުން ރެއާލާއި ޕީއެސްޖީ ބައްދަލުކުރި މެޗުގެ ފަހު ވަގުތު ގޯލް ޖަހައި 1-0 އިން ޕީއެސްޖީ މޮޅުކޮށްދީފަ އެވެ.
ކުރިމަގާ ބެހޭގޮތުން ސުވާލުކުރުމުން އެމްބާޕޭ ބުނީ މިވަގުތު ކުޅެމުން އަންނަނީ ދުނިޔޭގެ އެންމެ މޮޅު އެއް ޓީމަށް ކަމަށެވެ. އަދި މި ވަގުތު އެންމެ ރަނގަޅަށް ތައްޔާރުވެ، ހުރީ ޕީއެސްޖީ އަށް ކާމިޔާބު ސީޒަނެއް ނިންމާލައިދިނުމުގެ އަމާޒުގައި ކަމަށް ވަނީ ބުނެފަ އެވެ. .
"އަހަރެންގެ ހުރިހާ ވިސްނުމެއް މި ވަގުތު ހުރީ މިސީޒަންގައި ޕީއެސްޖީއާ އެކު ކާމިޔާބު ހޯދަން، ކުރިމަގާ މެދު ގޮތެއް ނިންމަން އަދި މާ އަވަސް، އެކަމާ އަހަރެން މި ވަގުތު ނުވިސްނަން" 2017 ވަނަ ފްރާންސްގެ މޮނާކޯ ވިދާލައި ފަހުން ޕީއެސްޖީ އަށް ބަދަލުވި އެމްބާޕޭ ބުންޏެވެ.
މުސާރައިގެ ގޮތުގައި 350،000 ޔޫރޯ ހަފްތާ އަކު އެމްބާޕޭ އަށް ލިބޭއިރު އޭނާގެ މުސާރަ ބޮޑުކޮށް އާ ކޮންޓްރެކްޓެއް ދޭން ޕީއެސްޖީ އޮތީ ތައްޔާރަށެވެ. އެކަމަކު، މުސާރަ އަށް ވުރެ ބޮޑަށް އެމްބާޕޭގެ ވިސްނުން ހުރީ ކެރިއަރުގައި އާ ޗެލެންޖެއް ނަގާށެވެ.
ރެއާލްގެ ރައީސް ފްލޮރެންޓީނޯ ޕެރޭޒް، އެ ކްލަބަށް ގެންނަން އެންމެ ބޭނުންވާ ކުޅުންތެރިންގެ ތެރޭގައި އެމްބާޕޭ ހިމެނެ އެވެ. އަދި މި ސީޒަން ނިމުމުގެ ކުރިން އެމްބާޕޭ ލައްވައި ޕްރީ އެގްރީމެންޓެއް ހަދަން ރެއާލް އޮތީ ތައްޔާރަށެވެ.
ދާދި ފަހުން ސްޕެއިންގެ މެޑްރިޑާއި ފްރާންސްގެ ޕެރިހަށް ނިސްބަތްވާ ބައެއް ނޫސްތަކުން ރިޕޯޓްކޮށްފައިވާ ގޮތުގައި އަންނަ ޖުލައި މަހު އެއް ވަނަ ދުވަހު ރެއާލާ ގުޅެން އެމްބާޕޭ ނިންމާފައިވަނީ ހަތަރު އަހަރުގެ ކޮންޓްރެކްޓެއްގަ އެވެ. އަދި އެ ކޮންޓްރެކްޓްގައިވާ ގޮތުން އެމްބާޕޭ އަށް އަހަރަކު 41 މިލިއަން ޕައުންޑް (55 މިލިއަން ޑޮލަރު) ލިބޭނެ ކަމަށް ވެސް ވަނީ ރިޕޯޓްކޮށްފަ އެވެ. އެ ގޮތަށް އެ ޑީލް ގޮސްފިނަމަ އެމްބާޕޭ އަށް ލިބޭ އާމްދަނީ ވެގެންދާނީ ކްލަބަކުން ރަސްމީކޮށް ކުޅުންތެރިއަކަށް ދޭނެ އެންމެ ބޮޑު މުސާރަ އަށެެވެ.
