މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ)ގެ އޮންލައިން ޕާޓްނަރަކަށް "އަދަދު" ހަމަޖައްސައިފި އެވެ.
"އަދަދު"އާ އެކު ބާސްކެޓްބޯލް އެސޯސިއޭޝަނުން އެއްބަސްވުމުގައި ގާއިމްކުރިއިރު، އެސޯސިއޭޝަންގެ ފަރާތުން އެއްބަސްވުމުގައި ސޮއިކުރީ، އެމްބީއޭގެ ރައީސް އަހްމަދު އާދަމް (އެޑަމް) އެވެ. އަދި "އަދަދު"ގެ ފަރާތުން ސޮއިކުރީ އެސޯސިއޭޓް އެޑިޓަރު (ސްޕޯޓްސް)، އައްޒާމް އަލިފުޅު އެވެ.
ރާއްޖޭގައި އެންމެ ޒަމާނީ ވަސީލަތްތައް ތައާރަފްކޮށްގެން މުބާރާްތައް ހިންގާ އެސޯސިއޭޝަނެއްގެ ގޮތުގައި ފާހަގަކުރެވޭ އެމްބީއޭއާ އެކު "އަދަދު" އިން ހެދި ކޮންޓްރެކްޓާ އެކު، ބާސްކެޓްބޯޅަ ޕްރޮމޯޓްކުރުމުގެ ގިނަކަންކަން ކުރުމަށް ވަނީ އެއްބަސްވެފަ އެވެ.
އޭގެ ތެރޭގައި ކުޅުންތެރިން ޕްރޮމޯޓްކުރުމާއި ބާސްކެޓްބޯޅަ އެސޯސިއޭޝަން ހިންގުމުގައި ކުރަމުން އަންނަ ކަންތައްތަކާއި ޑިވެލޮޕްމަންޓާ ގުޅޭ މައުލޫމާތުތައް ތަފްސީލްކޮށް "އަދަދު" އިން ގެނެސްދޭނެ އެވެ. އަދި އޭގެ އިތުރުން އެމްބީއޭ އިން ރާވާހިންގާ މުބާރާތްތަކުގެ މައުލޫމާތު ގަވާއިދުން، "އަދަދު" ނޫހުން ގެނެސްދޭނެ އެވެ.
މީގެ އިތުރުން ވެސް މި އެއްބަސްވުމުގެ ތެރެއިން ބާސްކެޓްބޯޅަ ކްލަބްތަކުގެ ޕްރޮމޯޓް ކުރުމަށް، އެމްބީއޭ އާއި "އަދަދު" ގުޅިގެން ކްލަބްތަކަށް ފުރުސަތުތަކެއް ފަހިކޮށްދޭން ވަނީ މަޝްވަރާކުރެވިފަ އެވެ.
މިދިޔަ އަހަރު އޭޕްރީލް މަހު ވުޖޫދުވި "އަދަދު" ނޫހަކީ ރާއްޖޭގެ އެންމެ ބޮޑު ކުޅިވަރު އެސޯސިއޭޝަން ކަމަށްވާ ފުޓްބޯލް އެސޯސިއޭޝަން (އެފްއޭއެމް)ގެ ވެސް ޕާޓްނަރެކެވެ. އަދި މި އަހަރު ރާއްޖޭގައި ބޭއްވި އުރީދޫ ސާފް ޗެމްޕިއަންޝިޕްގެ އޮންލައިން އަދި ޕީއާރް ޕާޓްނަރަކީ ވެސް "އަދަދު" އެވެ. އަދި "އަދަދު" އަކީ ކްރިކެޓް ބޯޑް އޮފް މޯލްޑިވްސް (ސީބީއެމް)ގެ ވެސް ޕާޓްނަރެކެވެ.
އަދި ބެޑްމިންޓަން ޑިވެލޮޕްމަންޓް ޕާޓްނަރެއްގެ ގޮތުގައި "އަދަދު" އިން ވަނީ ރިވައިވަލް ސްޕޯޓްސް ކްލަބާ އެކު ވެސް އެއްބަސްވުމެއް ގާއިމްކޮށްފަ އެެވެ. މީގެ އިތުރުން މުޅި ރާއްޖެ އަށް ހުޅުވާލައިގެން ގޯލްޑަން ފުޓްސަލް އެސޯސިއޭޝަނުން ބާއްވާ ގޯލްޑަން ފުޓްސަލް މުބާރާތުގެ ޕީއާރް ޕާޓްނަރަކީ ވެސް "އަދަދު" އެވެ.
